پرەمەر-مينيستر اسقار ءماميننىڭ توراعالىعىمەن ەل اۋماعىندا كوروناۆيرۋس ينفەكتسياسىنىڭ تارالۋىنا جول بەرمەۋ جونىندەگى ۆەدومستۆوارالىق كوميسسيانىڭ (ۆاك) سەلەكتورلىق وتىرىسى ءوتتى. پرەزيدەنت قاسىم-جومارت توقاەۆتىڭ تاپسىرماسىنا سايكەس، ەلىمەزدەگى ەپيدەميولوگيالىق جاعدايدى تۇراقتاندىرۋ بويىنشا قوسىمشا شارالار قارالدى.

قازاقستاندا كوروناۆيرۋس ينفەكتسياسىنا بايلانىستى ەپيدەميولوگيالىق جاعدايعا بايلانىستى ۆەدومستۆوارالىق كوميسسيا 2020 جىلدىڭ 20-21 ماۋسىم كۇندەرى، ياعني دەمالىس كۇندەرى قوسىمشا شەكتەۋ شارالارىن ەنگىزەدى.

قازاقستان اۋماعىندا كوروناۆيرۋستىڭ تارالۋىنا جول بەرمەۋ جونىندەگى ۆەدومستۆوارالىق كوميسسيا مىناداي شەشىمگە كەلدى:

1) نۇر-سۇلتان، الماتى، قاراعاندى، شىمكەنت، پاۆلودار جانە ەكىباستۇز قالالارى بويىنشا;

- ويىن-ساۋىق ورتالىقتارىنىڭ، ساۋدا ۇيلەرىنىڭ، ازىق-تۇلىكتىك جانە ازىق-تۇلىكتىك ەمەس بازارلاردىڭ قىزمەتى توقتاتىلسىن;

- قوعامدىق تاماقتانۋ ورىندارىنىڭ قىزمەتىنە تەك اشىق الاڭدا الەۋمەتتىك قاشىقتى ساقتاعان جاعدايدا عانا رۇقسات بەرىلەدى;

- قوعامدىق كولىكتىڭ قىزمەتىنە شەكتەۋ قويۋ;

- قوعامدىق ورىنداردىڭ جۇمىسىن توقتاتۋ: ساياباقتار، جاعايجايلار، اكۆاپاركتەر.

- فيتنەس-ورتالىقتاردىڭ قىزمەتىن توقتاتۋ;

- 65 جاستان اسقان ادامدارعا كوشەگە شىعۋعا شەكتەۋ قويۋ.

2) حالىق سانى 50 مىڭنان اساتىن ەلدى مەكەندەردە:

- قوعامدىق ورىنداردىڭ: ساياباقتاردىڭ، سكۆەرلەردىڭ، جاعالاۋلاردىڭ، اكۆاپاركتەردىڭ جۇمىس ىستەۋىن توقتاتا تۇرۋ;

- 65 جاستان اسقان ادامداردىڭ كوشەگە شىعۋىن شەكتەۋ.

3) وڭىرلەردىڭ باس سانيتاردارىگەرلەرىنىڭ قاۋلىلارىنا سايكەس نۇر-سۇلتان، الماتى، قاراعاندى، شىمكەنت، پاۆلودار جانە ەكىباستۇز قالالارىنا اۋماقتىق جاقىن ورنالاسقان تۋريستىك ايماقتارعا كىرۋدى جابۋ، ال كورسەتىلگەن ايماقتارداعى ادامدارعا الەۋمەتتىك قاشىقتى ساقتاۋ.

ۇكىمەت باسشىسى وڭىرلەردىڭ اكىمدىكتەرىنە قىسقا مەرزىمدە ماسەلەنى شەشۋدى تاپسىردى:

- مەديتسينالىق ۇيىمدار بازاسىندا قوسىمشا زەرتحانالار اشۋ ارقىلى حالىق اراسىندا پتر-تەستىلەۋدى قامتۋدى كەڭەيتۋ;

- اۋرۋحانالارداعى جۇقپالى جانە پروۆيزورلىق ورىنداردىڭ سانىن ارتتىرۋ;

- جەدەل مەديتسينالىق جاردەم ستانتسيالارىمەن شۇعىل جانە شۇعىل شاقىرۋلارعا ۋاقتىلى قىزمەت كورسەتۋدى قامتاماسىز ەتۋ;

- ۇيدە وتىرعان پاتسيەنتتەرگە امبۋلاتوريالىق-ەمحانالىق كومەك دەڭگەيىندە ساپالى ديناميكالىق باقىلاۋدى (قاشىقتان، ۇتقىر بريگادالار) جۇزەگە اسىرۋ;

- حالىقپەن بەلسەندى اقپاراتتىق-ءتۇسىندىرۋ جۇمىستارىن جۇرگىزۋ.

Abai.kz