قىرعىزستان پرەمەر-ءمينيسترى مۇحاممەدكالي ابىلگازيەۆ وتستاۆكاعا كەتتى. بۇل تۋرالى قىرعىزستان ۇكىمەتىنە سىلتەمە جاساپ، ازاتتىقتىڭ قىرعىز قىزمەتى حابارلادى.

بۇعان دەيىن ەلدە "بيلاين" ساۋدا ماركاسىنا تيەسىلى "سكاي موبايل" كومپانياسىنا راديوتولقىن ساتۋ ءىسى بويىنشا تەرگەۋ باستالعان. بۇل ىستە ابىلگازيەۆتىڭ دە ەسىمى اتالعان. كەيىن ول ەڭبەك دەمالىسىنا كەتۋگە ءماجبۇر بولعان. ابىلگازيەۆ ءوز مالىمدەمەسىندە "بۇل جايت تولىق جۇمىس ىستەۋگە كەدەرگى كەلتىرەتىنىن" ايتقان.

شەنەۋنىك راديوتولقىنىن ساتۋ ىسىنە قاتىسى جوعىن، وزىنە تاعىلعان ايىپ ورىنسىز ەكەنىن ايتتى. سوزىنشە، تەرگەۋ ورىندارى وزىنە حابارلاسپاعان.

ابىلگازيەۆ 27 مامىردا "تەرگەۋگە قىسىم جاساماس ءۇشىن جانە تەرگەۋدىڭ ءادىل ءوتۋى ءۇشىن" قىسقا ۋاقىتقا دەمالىسقا كەتكەن.

قازىرگە بار دەرەككە ساي، "بيلاين" ۇيالى بايلانىس وپەراتورى 200 مگتس جيىلىكتى يەلەنگەن AlaTV كومپانياسىن 1,8 ملن دوللارعا ساتىپ العان. 2020 جىلى ناۋرىزدا "بيلاين" AlaTV كومپانياسىنىڭ تولقىنىن 4G ينتەرنەت ءۇشىن قايتا راسىمدەگەن. "بيلاين" مۇنى راسىمدەۋگە 700 سوم تولەگەن.

بۇل ءىس بويىنشا بىرنەشە شەنەۋنىك قامالعان. ازاتتىقتىڭ قىرعىز قىزمەتىنىڭ حابارلاۋىنشا، ءىستى تەرگەپ جاتقان مەملەكەتتىك قاۋىپسىزدىك كوميتەتى جانە باس پروكۋراتۋرا ۇستالعانداردىڭ ەسىمىن جاريالاماي وتىر. تەك مەملەكەتتىك بايلانىس اگەنتتىگىنىڭ ەكس-ديرەكتورى ناتاليا چەرنوگۋبوۆانىڭ قامالعانى بەلگىلى بولدى.

قازىر پرەمەر-مينيستر مىندەتىن ءبىرىنشى ۆيتسە-پرەمەر كۋباتبەك بورونوۆ ۋاقىتشا اتقارادى.

Abai.kz