اتا-انالار بالاسىنىڭ ۇبت تاپسىرۋ پروتسەسىن ونلاين كورە الادى. بۇل تۋرالى ۇلتتىق تەستىلەۋ ورتالىعىنىڭ ديرەكتورى ديدار سماعۇلوۆ ءمالىم ەتتى.

«كارانتيندى ساقتاۋعا بايلانىستى ەلىمىزدە ادامداردىڭ جاپپاي جينالاۋىنا تىيىم سالىنعانىن اتام وتكىم كەلەدى. بۇل ەرەجەلەردى ەلەۋمەۋ – تۇلەكتەرىمىز ءۇشىن قوسىمشا تاۋەكەلدەر ەكەنىن ءتۇسىنۋ كەرەك. سوندىقتان، مەن الدىن الا بارلىق اتا-انالاردان كەشىرىم سۇراپ، ولاردى تۇسىنىستىك تانىتۋىنا شاقىرامىن. ويتكەنى، ولارعا ۇلتتىق بىرىڭعاي تەستىلەۋ وتكىزۋ پۋنكتىندە بولۋعا رۇقسات ەتىلمەيدى. عيمارات اۋماعىن قۇقىق قورعاۋ ورگاندارىنىڭ قىزمەتكەرلەرى قورشايدى. بىراق، ءاربىر اتا-انا تەستىلەۋدى تاپسىرۋ پروتسەسىن ونلاين كورە الادى. بۇل ءۇشىن ءاربىر اۋديتوريانىڭ ونلاين كورسەتىلىمى قامتاماسىز ەتىلەدى»، - دەدى د. سماعۇلوۆ ورتالىق كومۋنيكاتسيالار قىزمەتىندە.

وسى ورايدا ول ونلاين كورسەتىلىم سىلتەمەلەرى مەن رەسۋرستار ۇلتتىق تەستىلەۋ ورتالىعىنىڭ سايتىندى ءارى الەۋمەتتىك جەلىلەردە جاريالاناتىنىن ايتتى.

بۇدان بۇرىن حابارلانعانداي، ديدار سماعۇلوۆ بيىلعى ۇبت-نى وتكىزۋ ءتارتىبى جايىندى تۇسىنىك بەردى.

كارانتيندىك شەكتەۋلەرگە بايلانىستى ەلدىڭ بارلىق ايماقتارىنداعى ۇبت وتكىزۋ ورىندارىندا كۇشەيتىلگەن مەديتسينالىق-سانيتارلىق شارالار ەنگىزىلەدى. عيماراتقا كىرگىزۋ كەزىندە تەستىلەنۋشىلەردىڭ اراسىنداعى ەكى مەترلىك اراقاشىقتىقتى قاتاڭ ساقتاۋ ارقىلى ماسكالى رەجيم جۇزەگە اسىرىلادى. ءار تەستىلەنۋشى 5 باقىلاۋ كەزەڭىنەن وتەتىن بولادى، ونىڭ ىشىندە سىرتقى كيىمدى دەزينفەكتسيالىق ەرىتىندىلەرمەن زالالسىزداندىراتىن ارنايى ءدالىز ارقىلى ءوتۋ ەسكەرىلگەن.

بيىل ۇلتتىق بىرىڭعاي تەستىلەۋ 20 ماۋسىم مەن 5 شىلدە ارالىعىندا وتەدى.

Abai.kz