ولار وقشاۋلانعاندار. اسقار مامين، اسحات ايماعامبەتوۆ، ساپارحان وماروۆ، نۇرلان ەرمەكباەۆ، بەردىبەك ساپارباەۆ...

كەشە قازاقستاننىڭ دەنساۋلىق ساقتاۋ ءمينيسترى ەلجان ءبىرتانوۆ ىندەت جۇقتىرعانىن ايتتى. ءوزى ايتتى. فەيسبۋكتەگى رەسمي پاراقشاسىندا.

«دوستار، وكىنىشكە قاراي سوڭعى رەت كوروناۆيرۋسقا تاپسىرعان تەستىم وڭ ناتيجە كورسەتتى. بۇل سيمپتومسىز ەمەس، سوندىقتان ينفەكتسيالىق اۋرۋحاناعا جاتقىزىلدىم»، - دەپ جازدى مينيستر.

ءبىرتانوۆ مىرزا سونىڭ الدىندا عانا ۇكىمەت باسشىسى اسقار مامينمەن بىرگە جامبىل وبلىسىنا جۇمىس ساپارىمەن بارعان كورىنەدى. ۇكىمەت باسشىسى 12 ماۋسىم كۇنى جامبىل وبلىسىندا ۆاكتسينا شىعاراتىن بيوفارماتسەۆتيكالىق زاۋىتتىڭ قۇرىلىسىن باستاپ بەرگەن بولاتىن.

اتالعان ءىس-شارا كەزىندە پرەمەر-ءمينيستردىڭ قاسىندا كوروناۆيرۋس جۇقتىرعان ءبىرتانوۆتان بولەك، ءبىلىم جانە عىلىم ءمينيسترى اسحات ايماعامبەتوۆ جانە جامبىل وبلىسىنىڭ اكىمى بەردىبەك ساپارباەۆ بولعان.

جۇمىس ساپارى كەزىندە ءبىرتانوۆتىڭ رەسپيراتورلىق ماسكامەن جۇرگەنىنە قاراماستان، جوعارىدا اتى اتالعان شەندىلەر كوروناۆيرۋسقا تەست تاپسىرىپتى. ءۇش مارتە. ءۇش جولى دا ۆيرۋس انىقتالماپتى. سويتسە دە، شەندىلەر وقشاۋلانۋدى ءجون ساناپتى.

اسقار مامين – قر پرەمەر-ءمينيسترى

«12 ماۋسىمدا پرەمەر-مينيستر اسقار مامين دەنساۋلىق ساقتاۋ ءمينيسترى ەلجان بىرتانوۆپەن بىرگە جامبىل وبلىسىنا ءىس-ساپارمەن بارعان. ءبىرتانوۆتىڭ covid-19-عا بايلانىستى تاپسىرعان تەستىنىڭ قورىتىندىسى شىقتى. وسىعان بايلانىستى ۇكىمەت باسشىسى اسقار مامين دە تەست تاپسىردى. اسقار مامين قازىر وقشاۋلانعان رەجيمدە، ۆيدەو بايلانىس ارقىلى جۇمىس ىستەپ جاتىر»، - دەپتى پرەمەر-ءمينيستردىڭ ءباسپاسوز حاتشىسى زارينا نۇرلانوۆا.

اسحات ايماعامبەتوۆ – قر ءبىلىم جانە عىلىم ءمينيسترى

«ءبىلىم جانە عىلىم ءمينيسترى COVID-19-دى انىقتاۋعا تەست تاپسىردى. ناتيجەسى تەرىس بولىپ شىقتى. اسحات قاناتۇلىنىڭ جاعدايى جاقسى. ەرەجە بويىنشا، وقشاۋلانىپ، قاشىقتان جۇمىس ىستەيدى. سونداي-اق، حاتتاماعا سايكەس بەلگىلى ءبىر ۋاقىت وتكەن سوڭ ول قايتادان تەست تاپسىرادى»، - دەيدى مينيسترلىكتىڭ ءباسپاسوز قىزمەتىندەگىلەر.

ساپارحان وماروۆ – قر اۋىل شارۋاشىلىعى ءمينيسترى

«ناتيجەسى تەرىس بولىپ شىقتى. الايدا كوروناۆيرۋس ينفەكتسياسىنىڭ دياگنوستيكاسى جانە ەمدەۋ حاتتاماسىنا سايكەس، اۋىل شارۋاشىلىعى مينيسترلىگىنىڭ باسشىسى بەلگىلى ءبىر ۋاقىت بويى قايتا تەست تاپسىرۋ كەرەك. ال قازىر قاۋىپسىزدىك ساقتاپ، وقشاۋلاندى»، - دەيدى اشم ءباسپاسوز حاتشىسى جانجىگىت ومارحان.

نۇرلان ەرمەكباەۆ – قر قورعانىس ءمينيسترى

ال قر قورعانىس ءمينيسترى نۇرلان ەرمەكباەۆ 11 ماۋسىمنان باستاپ وقشاۋلانىپ جۇمىس ىستەپ جاتىر ەكەن. بۇل تۋرالى مينيسترلىكتىڭ ءباسپاسوز حاتشىسى حابارلاعان. بىراق، ماسكەۋدەگى جەڭىستىڭ 75 جىلدىعىنا ارنالعان شارالارعا بارادى ەكەن.

«نۇرلان ەرمەكباەۆ 2020 جىلدىڭ 11 ماۋسىمىنان باستاپ ءوزىن-ءوزى وقشاۋلاۋ رەجيمىنە كوشتى. مەرەكەلىك ءىس-شارالارعا قر قورعانىس ءمينيسترى ءوزىنىڭ رەسەيلىك ارىپتەسى سەرگەي شويگۋدىڭ شاقىرتۋىمەن بارادى. ءوزىن-ءوزى وقشاۋلاۋ بويىنشا شارالار شەت ەلدەرگە بارۋ ءتارتىبىن، دارىگەرلەردىڭ ۇسىنىستارىن، سونداي-اق سانيتارلىق-ەپيدەميولوگيالىق جاعدايدىڭ جاي-كۇيىن ەسكەرە وتىرىپ قابىلداندى»، - دەلىنگەن رەسمي حابارلامادا.

بەردىبەك ساپارباەۆ – جامبىل وبىلىسىنىڭ اكىمى

جامبىل وبلىسى اكىمى بەردىبەك ساپارباەۆ تا ۆيرۋسقا بايلانىستى تەست تاپسىرعان. ونىڭ دە قورىتىندىسى وڭ بولىپتى. ۆيرۋس انىقتالماعان. بىراق، اكىم ءوزىن-ءوزى وقشاۋلاپتى. ۆيدەو بايلانىس رەجيمىندە جۇمىس جاساپ جاتىر ەكەن.

«وسى ساپار الدىندا جانە ساپاردان كەيىن وبلىس اكىمى تەستىلەۋدەن ءوتتى. ەكەۋىنىڭ دە ناتيجەسى - تەرىس. ەندى اكىم قازىر وقشاۋلانۋدا، بارلىق ءىس-شارالار ونلاين رەجيمىندە وتەدى»، - دەپتى وبلىس اكىمدىگىنىڭ ءباسپاسوز قىزمەتى.

ايتا كەتەيىك، ەلجان ءبىرتانوۆ كوروناۆيرۋس جۇققان العاشقى شەنەۋنىك ەمەس. بۇعان دەيىن ءماجىلىس دەپۋتاتى بەكبولات تىلەۋحان، پرەزيدەنتتىڭ ءباسپاسوز حاتشىسى بەرىك ءۋالي، الماتى قالاسىنىڭ دەنساۋلىق ساقتاۋ باسقارماسىنىڭ باسشىسى، بۇرىنعى دەنساۋلىق ۆيتسە-ءمينيسترى كامالجان نادىروۆتان كوروناۆيرۋس تابىلعان ەدى.

Abai.kz