سەناتتىڭ جالپى وتىرىسىندا قىلمىستىق كودەكستەگى 130-باپ ("جالا جابۋ") اكىمشىلىك قۇقىق بۇزۋشىلىق تۋرالى كودەكسكە اۋىستىرىلاتىنى ايتىلدى.

بۇگىن سەناتتىڭ جالپى وتىرىسىندا ءماجىلىستىڭ ءبىر توپ دەپۋتاتىنىڭ باستاماشىلدىعىمەن دايىندالعان "قازاقستان رەسپۋبليكاسىنىڭ كەيبىر زاڭنامالىق اكتىلەرىنە اتقارۋشىلىق ءىس جۇرگىزۋدى جانە قىلمىستىق زاڭنامانى جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" زاڭ جوباسى تالقىعا سالىندى. زاڭ جوباسىن دەپۋتات اسىلبەك سماعۇلوۆ تانىستىردى.

"زاڭ جوباسىندا قىلمىستىق كودەكسكە ەنگىزىلەتىن تۇزەتۋلەر بار. ولار ۇلتتىق قوعامدىق سەنىم كەڭەسىنىڭ ەكىنشى وتىرىسىندا پرەزيدەنت قاسىم-جومارت توقاەۆ بەرگەن تاپسىرمانى ورىنداۋعا باعىتتالعان. بۇل - جالا جابۋدى قىلمىستىق سيپاتتان ارىلتۋ. وسىعان وراي دەپۋتاتتار جالا جابۋدى اكىمشىلىك قۇقىق بۇزۋشىلىق تۋرالى كودەكسكە اۋىستىرۋعا باستاما جاسادى. بۇل حالىقارالىق تاجىريبەگە، ياعني ەكونوميكالىق ىنتىماقتاستىق جانە دامۋ ۇيىمىنىڭ سىبايلاس جەمقورلىققا قارسى ىستامبۇل ءىس-قيمىل جوسپارىنىڭ ۇسىنىسىنا سايكەس كەلەدى", - دەدى ول.

سونىمەن قاتار، دەپۋتات قىلمىستىق كودەكسكە ەنگىزىلەتىن تاعى ءبىر وزگەرىسكە توقتالدى.

"الەۋمەتتىك ۇلتتىق، رۋلىق، ناسىلدىك، تەكتىك توپتىق نەمەسە ءدىني ارازدىقتى قوزدىرۋ ءۇشىن جاۋاپكەرشىلىكتى كوزدەيتىن قىلمىستىق كودەكستىڭ 174-بابىنا تۇزەتۋلەر ەنگىزىلدى. اتاپ ايتقاندا، "قوزدىرۋ" ءسوزى "تۇتاندىرۋ" سوزىمەن الماستىرىلادى. ايىپپۇل جازانىڭ بالامالى ءتۇرى رەتىندە ەنگىزىلەدى", - دەدى اسىلبەك سماعۇلوۆ.

اتالعان زاڭ جوباسىن ەكىنشى وقىلىمدا داۋىسقا قويىلىپ، دەپۋتاتتار قۇجاتتى قابىلدادى.

Abai.kz