الماتى قالالىق مامانداندىرىلعان اۋدانارالىق تەرگەۋ سوتى قوعامدىق بەلسەندى ءاسيا تولەسوۆاعا قاتىستى بۇلتارتپاس شارا قولدانۋ تۋرالى سوت وتىرىسى ءوتتى.

6-ماۋسىم كۇنى الماتى قالاسىندا وتكەن ميتينگ كەزىندە ءاسيا تولەسوۆانىڭ پوليتسيا قىزمەتكەرىنە قول كوتەرگەن ۆيدەوسى تارالعان. وسىنىڭ نەگىزىندە ءىىم وعان قاتىستى قك "بيلىك وكىلىن قورلاۋ" جانە "بيلىك وكiلiنىڭ قىزمەتتىك مىندەتتەرىن ورىنداعانى ءۇشىن ودان كەك الۋ ماقساتىندا ومiرiنە نە دەنساۋلىعىنا قاۋiپتى ەمەس كۇش قولدانۋ" بابى (378, 380) بويىنشا ءىس قوزعالعانىن حابارلاعان بولاتىن.

اتالعان باپتار بويىنشا، 8,1 ملن تەڭگە ايىپپۇل سالۋ نە سول مولشەردە تۇزەۋ جۇمىستارىنا جىبەرۋ نەمەسە 800 ساعاتقا دەيىنگى مەرزىمگە قوعامدىق جۇمىسقا تارتۋ نە 3 جىلعا دەيىن باس بوستاندىعىن شەكتەۋ نە باس بوستاندىعىنان ايىرۋ قاراستىرىلعان.

ال، 10-ماۋسىم كۇنى ونلاين فورماتتا وتكەن سوت وتىرىسىنا ءاسيانىڭ ادۆوكاتى ءالىمجان ورالباي، اناسى جانار جاندوسوۆا قاتىستى. سۋديا جانار جاندوسوۆاعا  ونلاين سوتتى مونيتور ارقىلى تۇسىرۋگە رۇقسات ەتكەنىمەن، ونى كوپشىلىككە كورسەتىپ، جاريا ەتۋگە سۋديا تىيىم سالعان.

سۋديا تولەسوۆاعا ءۇش جىلعا دەيىن باس بوستاندىعىنان ايىرۋدى قاراستىراتىن باپ بويىنشا ايىپ تاعىلعانىن، بىراق ايرىقشا جاعدايدا سوت قاماۋعا الۋ جونىندە بۇلتارتپاۋ شاراسىن قولدانا الاتىنىن ايتتى. تولەسوۆانى ەكى ايعا قاماۋعا الۋ جونىندە نەگىز جوق ەكەنىن ايتا كەلە سۋديا ءىس ماتەريالدارىندا تولەسوۆانىڭ جاڭا قىلمىسقا بارۋى مۇمكىن ەكەنىن كورسەتەتىن دەرەكتەر بار ەكەنىن كەلتىرىپ، ونى 10 تاۋلىككە قاماۋ جونىندە شەشىم شىعاردى.

ايتا كەتەيىك، ءاسيا تولەسوۆا بۇعان دەيىن بىرنەشە قارسىلىق شارالارىنا قاتىسقان بەلسەندى. ول 2019 جىلى پرەزيدەنت سايلاۋىنىڭ الدىندا الماتىدا وتكەن مارافون كەزىندە "شىندىقتان قاشىپ قۇتىلمايسىڭ. ءادىل سايلاۋ ءۇشىن" دەپ جازىلعان پلاكات ىلگەنى ءۇشىن 15 تاۋلىككە قامالعان.

Abai.kz