بۇگىن ءماجىلىستىڭ جالپى وتىرىسىندا دەپۋتاتتار ۇكىمەتتىڭ  جانە  ەسەپ كوميتەتىنىڭ 2019 جىلعى رەسپۋبليكالىق بيۋدجەتتىڭ اتقارىلۋى تۋرالى ەسەپتەرىن قارادى. 

ءماجىلىس توراعاسى نۇرلان نىعماتۋلين اتاپ وتكەندەي، بولىنگەن جانە جۇمسالعان بيۋدجەت قارجىسى حالقىمىزدىڭ ءال-اۋقاتىن ارتتىرۋعا باعىتتالىپ، ناقتى الەۋمەتتىك-ەكونوميكالىق ماسەلەلەردى شەشۋى كەرەك.

وتكەن جىلى جالپى ىشكى ءونىم ءوسىمى 4,5% قۇراپ، سىرتقى ساۋدا اينالىمى 97 ملرد. دوللارعا جەتتى. 2,7 ملن. قازاقستاندىقتىڭ ەڭبەك اقىسى ءوستى. «نۇرلى جول»، «نۇرلى جەر» مەملەكەتتىك باعدارلامالارىن جۇزەگە اسىرۋ جانە ايماقتاردى دامىتۋدا  13 ملن. شارشى مەتردەن استام تۇرعىن ءۇي سالۋعا مۇمكىندىك بەردى.

-مەملەكەت باسشىسى قاسىم-جومارت كەمەلۇلى توقاەۆ ەلىمىزدىڭ 2019 جىلعى الەۋمەتتىك-ەكونوميكالىق دامۋ قورىتىندىلارى بويىنشا ۇكىمەتتىڭ كەڭەيتىلگەن وتىرىسىندا اتاپ كورسەتكەندەي، بۇل «Nur Otan» پارتياسىنىڭ سايلاۋ الدىنداعى باعدارلامانى جانە حالىققا جولداۋدى جۇزەگە اسىرۋ ءۇشىن ۇكىمەت پەن پارلامەنتتىڭ ۇيلەسىمدى اتقارعان جۇمىسى، – دەدى ءماجىلىس توراعاسى.

سونىمەن بىرگە، نۇرلان نىعماتۋليننىڭ پىكىرىنشە، تالقىلاۋ قورىتىندىلارى ەل باسشىلىعىنىڭ ەكونوميكانى تۇبەگەيلى رەفورمالاۋ باعدارلاماسىن جاساۋ قاجەتتىلىگى تۋرالى نۇسقاۋلارى نەگىزىندە قاراستىرىلۋى كەرەك. تۇبەگەيلى وزگەرىستى، مەملەكەت قارجىلارىنىڭ ماقساتسىز جۇمسالۋى تالاپ ەتىپ وتىر.

سونىمەن قاتار، وتىرىس بارىسىندا ۇلتتىق قوردان بولىنەتىن قاراجات ماسەلەسى قارالدى.

اتاپ ايتقاندا، دەپۋتاتتار ۇلتتىق قوردان ماقساتتى ترانسفەرتكە بايلانىستى جوعارى وقۋ ورىندارىندا جوسپارلانعان كوۆوركينگ ايماعىن اشۋ ماسەلەسىن كوتەردى. ءماجىلىس دەپۋتاتتارىنىڭ ايتۋىنشا، 2019 جىلى بۇل ماقساتتارعا 663 ميلليون تەڭگە بولىنگەن. الايدا، بۇل قاراجاتتاردىڭ يگەرىلمەۋى 100 پايىزدى قۇرادى. ۇكىمەت ەسەبىندە مۇنىڭ سەبەبى قارجىلاندىرۋدىڭ باسقا كوزدەرىن پايدالانۋ مۇمكىندىگىنە بايلانىستى وسى قاراجاتقا سۇرانىستىڭ بولماۋىمەن تۇسىندىرىلەدى.

وسى جايىندا، ءماجىلىس توراعاسى ن.نىعماتۋلين ۇلتتىق قوردىڭ قارجىسىن   شاشۋعا بولمايتىنىن، ونىڭ  ءاربىر تيىنى قاتاڭ باقىلاۋدا بولىپ، ول قارجىلاردى ەرەكشە جاعدايلارعا عانا  پايدالانۋ قاجەتتىگىن ايتتى.

سونداي-اق، تالقىلاۋ بارىسىندا الەمدىك داعدارىس جاعدايىنداعى الەۋمەتتىك-ەكونوميكالىق دامۋ ماسەلەلەرىن شەشۋدىڭ جاڭا تاسىلدەرىنە دەگەن قاجەتتىلىك تۋرالى ايتىلدى.

-.مەملەكەتتىك بيۋدجەتتىڭ  ءتيىمدى بولۋى  -  تەك عانا  بولىنگەن  جانە  يگەرىلگەن قاراجاتقا  بايلانىستى ەمەس. ول  قارجىلاردىڭ بارلىعى ناقتى ەكونوميكالىق - الەۋمەتتىك ماسەلەلەردى شەشىپ، حالقىمىزدىڭ ءومىر ساپاسىن ارتتىرۋعا ىقپال ەتۋ كەرەك. بۇل مەملەكەت باسشىسى قاسىم-جومارت كەمەلۇلى توقاەۆ قازاقستان حالقىنا جولداۋىندا دا العا قويعان نەگىزگى مىندەتتەردىڭ ءبىرى. سوندىقتان، بيۋدجەتتىڭ ءاربىر تيىنى قايدا جانە قانداي ماقساتقا جۇمسالعانى الداعى ۋاقىتتا دا دەپۋتاتتىق كورپۋستىڭ باقىلاۋىندا بولادى، - دەدى نۇرلان نىعماتۋلين.

Abai.kz