«قازاقستان» تەلەراديوكورپوراتسياسىنا قاراستى «Balapan» تەلەارناسى ۇزدىك شەتەلدىك مۋلتحيكايالاردىڭ تەلەقۇقىعىمەن قوسا، ينتەرنەت قۇقىقتارىن ساتىپ الۋ باستاماسىن العاش بولىپ جۇزەگە اسىرىپ وتىر،- دەپ حابارلايدى «قازاقستان» رترك» اق.

ياعني، الداعى ۋاقىتتا ارنادان كورسەتىلەتىن شەتەلدىك انيماتسيالىق جوبالار YouTube-تاعى «BalapanTV» كانالىنا سالىنادى. دەمەك، بۇل – مۋلتسەريالداردى بالالار الەمنىڭ كەز كەلگەن نۇكتەسىنەن، قالاعان ۋاقىتىندا تاماشالاي الادى دەگەن ءسوز. ايتا كەتەرلىگى، بۇعان دەيىن شەتەلدىك جوبالاردىڭ دۋبلياجدالعان نۇسقاسىن الەۋمەتتىك جەلىلەرگە سالۋ قۇقىعى ەلىمىزدەگى ەشبىر ارنادا بولماعان.

وسى كۇنگە دەيىن بالالارىمىز الەمنىڭ وزىق مۋلتفيلمدەرىن Youtube پلاتفورماسىنان باسقا تىلدەردە كورىپ كەلسە، ەندى انا تىلىمىزدە تاماشالاۋ مۇمكىندىگىنە قول جەتكىزىپ وتىر. بۇل – قازاق ءتىلىنىڭ دامۋىنا ىقپال ەتەتىن ءارى ينتەرنەت جەلىسىندەگى قازاق تىلىندەگى ساپالى بالالار كونتەنتىنىڭ كوبەيۋىنە سەرپىن بەرەتىن ماڭىزدى باستاما دەپ سانايمىن. سونىمەن قاتار، بۇگىندە تەلەارنامىزدىڭ You tube-تەگى جازىلۋشىلار سانى ءبىر ميلليونعا جۋىقتاعانىن قۋانىشپەن ايتا الامىز.

1 ماۋسىم – حالىقارالىق بالالاردى قورعاۋ كۇنىنە وراي، بۇلدىرشىندەرگە تارتۋ رەتىندە YouTube-تاعى «BalapanTV» كانالىنا «قۇراستىرۋشى لەۆا» مۋلتسەريالىنىڭ 66 ءبولىمى سالىنادى. سونىمەن قاتار، كورەرمەندەر الداعى ۋاقىتتا «ۆيسپەر-1»، «ۆيسپەر-2»، «100 % Wolf»، «اڭدار دوستىعى»، «كاپيتان شاركي»، «كۋنگ-فۋ قويان: وت ءامىرشىسى»، «قانات قاق»، «اياز اتانى قۇتقارۋ»، «كەمەدەگى وقيعا» سىندى انيماتسيالىق جوبالاردى دا You Tube-تەن كورە الادى.

بۇدان بولەك، «Balapan» ارناسى ءتول انيماتسيانى دامىتۋ ىسىنە دە كوڭىل ءبولىپ كەلەدى. ماسەلەن، تەلەارنا تاپسىرىسىمەن 2018 جىلى 10, 2019 جىلى 14 وتاندىق مۋلتسەريال جاسالسا، 2020 جىلى 20 جوبا كىشكەنتاي كورەرمەندەرگە جول تارتپاق. ەفيردەن وتكەن بارلىق جوبالاردى ارنانىڭ YouTube كانالىنان كورۋگە بولادى.

Abai.kz