ۇكىمەت باسشىلارى سۋ باسقان ماقتاارال اۋدانى اۋماعىن ارالاپ، نۇرلىجول، ورگەباس جانە فيردوۋسي اۋىلدارىندا بولىپ، سۋ تاسقىنى سالدارىن جويۋ اياسىندا جۇرگىزىلىپ جاتقان جۇمىستارمەن تانىسقان.

اقپاراتقا قاراعاندا، اپاتتىق-قۇتقارۋ جۇمىستارىنا 1300-دەن استام ادام مەن 220 بىرلىك تەحنيكا، ونىڭ ىشىندە وزبەكستاننان 200-دەن استام مامان مەن 100-گە جۋىق ءورت ءسوندىرۋ ماشينالارى، ەكسكاۆاتورلار، تراكتورلار، سۋ سورعىشتار جانە باسقا دا تەحنيكالىق قۇرالدار جۇمىلدىرىلعان.

مىرزاكەنت اۋىلىندا ەكى ەلدىڭ پرەمەر-مينيسترلەرى جاڭا شاعىن اۋداننىڭ قۇرىلىس جوسپارىمەن تانىسىپ، العاشقى تۇرعىن ۇيلەردىڭ ىرگەتاسىن قالاۋ راسىمىنە قاتىسىپ، تۇرعىندارمەن كەزدەسۋ وتكىزگەن.

مىرزاكەنت كەنتىندە سۋ تاسقىنىنىڭ سالدارىنان زارداپ شەككەن جەڭىس، جاڭا تۇرمىس، دوستىق ەلدى مەكەندەرىنەن 500 وتباسى ءۇشىن جەكە تۇرعىن ۇيلەر، مەكتەپتەر، بالاباقشا مەن فەلدشەرلىك پۋنكتتەر سالۋ جوسپارلانعان. قۇرىلىس جۇمىستارىن قر جانە ءور ماماندارى بىرلەسىپ جۇرگىزەتىن بولادى.

اسقار مامين سۋ تاسقىنىنان زارداپ شەككەن تۇركىستان وبلىسى ماقتاارال اۋدانىنىڭ تۇرعىندارى جاڭا نەمەسە جوندەلگەن باسپانامەن تولىق قامتاماسىز ەتىلەتىنىن اتاپ ءوتتى. ولاردىڭ ارقايسىسىنا رەسپۋبليكالىق بيۋدجەتتەن 100 مىڭ تەڭگەدەن بەرىلەدى.

1 مامىردا وزبەكستاننىڭ سىرداريا وبلىسىنداعى ساردوبا سۋ قويماسى جارىلىپ، اينالاسىنداعى اۋىلداردى سۋ شايىپ كەتكەن. 1 مامىر تۇندە ساردوبانىڭ سۋى قازاقستاننىڭ وڭتۇستىگىندەگى، قازاق-وزبەك شەكاراسىندا ورنالاسقان اباي كانالىنا جەتىپ، ماقتارال اۋدانىنداعى بىرنەشە اۋىلدى سۋ العان. وسىدان سوڭ ماقتارال اۋدانىندا توتەنشە جاعداي جاريالانىپ، مىڭداعان تۇرعىن ەۆاكۋاتسيالانعان. جۇزدەگەن ءۇيدى سۋ باسىپ، جارامسىز قالعان.

Abai.kz