الماتى وبلىسى مەن باسقا دا ايماقتاردان كەلگەن كولىكتەر توتەنشە جاعدايدىڭ اياقتالۋىنا بايلانىستى الماتى قالاسىنا كىرگىزۋدى تالاپ ەتتى. جەكە كولىكتەرگە وزگە بلوكپوستتان وتۋگە ۇمتىلعان جاياۋ ادامدار دا كۇرت كوبەيدى.
بۇعان دەيىن، مامىردىڭ 11-ىنە قازاقستانداعى توتەنشە جاعداي رەجيمى اياقتالعانىمەن كارانتين جاريالانعان قالالار مەن ەلدىمەكەندەردە شەكتەۋ شارالارى ءارى قاراي جالعاسا بەرەتىنى حابارلانعان. الماتى قالاسىنداعى توتەنشە جاعداي بويىنشە جەدەل شتابتىڭ حابارىنا قاراعاندا، جۇمىس ىستەۋگە رۇقسات ەتىلگەن كاسىپورىندار مەن مەكەمەلەردىڭ كولىكتەرى عانا ءجۇرىپ-تۇرادى. الماتى اكىمدىگى قالاعا سىرتتان كەلەتىن اۆتوكولىكتەر قاشان كىرگىزىلەتىنىن ايتپاعان.
الماتى وبلىسى اكىمدىگىنىڭ ءباسپاسوز قىزمەتى الماتىعا كىرە بەرىستەگى احۋال مەن كولىك كەپتەلىسى جايلى اقپارات بەرۋدەن باس تارتتى.
قازاقستاندا كوروناۆيرۋسقا بايلانىستى 16 ناۋرىزدا توتەنشە جاعداي جاريالانعان. 19 ناۋرىزدا نۇر-سۇلتان مەن الماتى كارانتينگە جابىلعان بولاتىن. كەيىنىرەك وزگە ايماقتاردا شەكتەۋ شارالارى ەنگىزىلدى. وتكەن اپتادا دەنساۋلىق ساقتاۋ مينيسترلىگى ەلدە ەپيدەميا شارىقتاۋ شەگىنە جەتتى دەپ مالىمدەگەن. وسىدان كەيىن الماتى مەن نۇر-سۇلتاندا كارانتين شارالارى جۇمسارىپ، بىرقاتار بيزنەس نىساندارىنا جۇمىس ىستەۋگە رۇقسات ەتىلگەن بولاتىن.
سوڭعى مالىمەت بويىنشا، قازاقستاندا كوروناۆيرۋس جۇقتىرعاندار 5138 ادامعا جەتتى. 1941 ادام جازىلدى. 31 ادام قايتىس بولدى.
Abai.kz
