الماتىنىڭ باس سانيتارلىق دارىگەرى توتەنشە جاعداي رەجيمى اياقتالعاننان كەيىن دە كارانتين تالاپتارىن ساقتاۋعا شاقىرادى، دەپ حابارلايدى Almaty.tv.

الماتى قالاسىنىڭ مەملەكەتتىك باس سانيتارلىق دارىگەرى جانداربەك بەكشيننىڭ ايتۋىنشا، الماتىلىقتارعا بەتپەردە كيىپ، جەكە باسىنىڭ قاۋىپسىزدىگى مەن قاۋىپتى ىندەتتىڭ الدىن الۋ ءۇشىن دەزينفەكتسيالىق جانە انتيسەپتيكالىق قۇرالداردى پايدالانۋ كەرەك.

«بارلىق ساقتىق شارالارىنىڭ ساقتالاتىنىن ايتقىم كەلەدى. توتەنشە جاعداي رەجيمى اياقتالعان كۇننىڭ وزىندە شەكتەۋ شارالارى، سانيتارلىق-ەپيدەميولوگيالىق تالاپتار ساقتالادى. مەنىڭ ويىمشا، بۇل بىزگە ءالى دە قاجەت. ويتكەنى كوروناۆيرۋس ينفەكتسياسىن جۇقتىرۋ قاۋپى تولىق اياقتالعان جوق»، - دەدى ج.بەكشين.

بۇل رەتتە قالا تۇرعىندارىنىڭ ادامدار كوپ جينالاتىن جەرگە بارماعانى دۇرىس.

دۇكەنگە، شاشتاراز، كيىم تازالايتىن مەكەمەلەرگە بارعاندا الەۋمەتتىك قاشىقتىقتى ساقتاۋ كەرەك. سونداي-اق، قىزمەتكەرلەردەن قاراپايىم گيگيەنا ەرەجەلەرىن ساقتاۋ تالاپ ەتىلەدى. ج.بەكشين ادامدار الدىن الا جازىلۋ ءتارتىبىن ساقتاپ، جاساندى كەزەك جاساۋدان اۋلاق بولۋعا شاقىردى.

«بارلىق دۇكەندەر مەن كاسىپورىندار بارلىق سانيتارلىق-ەپيدەميولوگيالىق نورمالاردى ساقتاۋى ءتيىس. بۇل رەتتە قالاداعى بارلىق جۇمىس بەرۋشىلەرگە ايتارىم بار. ولار ءوز قىزمەتكەرلەرىن كاسىپورىننىڭ نەمەسە نىساننىڭ مەنشىك نىسانىنا قاراماستان جەكە قورعاۋ قۇرالدارىمەن قامتاماسىز ەتۋى قاجەت. بارلىق پەرسونال بەتپەردە، قولعاپ جانە ءوزىنىڭ تەحنولوگيالىق كيىمىندە بولۋى ءتيىس. دۇكەندەر مەن شاشتارازدار قىزمەتكەرلەرى مىندەتتى تۇردە بەتپەردە، باس كيىمدى جانە فيرمالىق كيىمنىڭ ۇستىنە قولعاپ كيىپ جۇرۋگە ءتيىس. بارلىق ءۇي-جايلار ۇنەمى جەلدەتىلىپ، ال جۇمىس ورىندارى دەزينفەكتسيالاۋ قۇرالدارىمەن وڭدەلۋى ءتيىس»، - دەدى باس سانيتارلىق دارىگەر.

ول سونداي-اق، بۇل ەرەجەلەر قۇرىلىس نىساندارىنا دا قاتىستى ەكەنىن اتاپ ءوتتى. قۇرىلىستا بارلىق جۇمىسشىلار وزدەرىنىڭ تەحنولوگيالىق كيىمدەرىن كيىپ جۇرگەنىنە قاراماستان، بەتپەردە كيۋلەرى مىندەتتى.

11 مامىردا الماتى قالاسىندا كارانتين رەجيمى ساقتالادى. پەريمەتر بويىنشا ورنالاسقان بلوك-بەكەتتەردىڭ جۇمىسى دا جالعاسادى. بۇعان دەيىن قابىلدانعان قالاعا كىرۋ مەن شىعۋ ەرەجەلەرى سول كۇيى ساقتالادى. جۇمىسقا رۇقسات العان كاسىپورىندار عانا جىبەرىلەدى. قوعامدىق كولىكتىڭ جۇمىس ءتارتىبى دە وزگەرىسسىز قالادى (ساعات 06.00-دەن كەشكى 19.00-گە دەيىن).

Abai.kz