پرەزيدەنت شاۆكات ميرزياەۆ ارنايى جارلىققا قول قويدى. سىرداريا وبلىستىق اكىمدىگىنىڭ مالىمەتىنە سۇيەنىپ Gazeta.uz سايتىنىڭ جازۋىنشا، 50 كوپقاباتتى ءۇي 2020-2021 جىلدارى ساردوبا، اقالتىن جانە ميرزاباد اۋداندارىنان سالىنباق.

جەرگىلىكتى بيلىك سۋ تاسقىنىنان زارداپ شەككەن وتباسىلاردىڭ ءتىزىمىن جاساپ، ولارعا كوپقاباتتى تۇرعىن ءۇي كەشەندەرىنەن اقىسىز پاتەر بەرمەك.

پرەمەر-مينيستر ابدۋللا اريپوۆ جەتەكشىلىك جاسايتىن سۋ تاسقىننىڭ سالدارىن جويۋ جونىندەگى ۇكىمەت كوميسسياسى زارداپ شەككەن وتباسىلارعا كومەك كورسەتۋگە جانە تاسقىن زاردابىن جويۋعا سىرداريا وبلىسىنىڭ بيۋدجەتىنە 100 ملرد سوم اقشا بولەدى. قاجەت بولعان جاعدايدا قاراجات كولەمى ۇلعايادى دەپ ايتىلادى.

سۋ شارۋاشىلىعى جانە قۇرىلىس مينيسترلىگى ساردوبا سۋ قويماسىن قالپىنا كەلتىرۋ جوسپارىن جاساۋى ءتيىس.

1 مامىردا وزبەكستاننىڭ سىرداريا وبلىسىنداعى ساردوبا سۋ قويماسى جارىلىپ، اينالاسىنداعى اۋىلداردى سۋ شايىپ كەتكەن. 1 مامىر تۇندە ساردوبانىڭ سۋى قازاقستاننىڭ وڭتۇستىگىندەگى، قازاق-وزبەك شەكاراسىندا ورنالاسقان اباي كانالىنا جەتىپ، ماقتارال اۋدانىنداعى بىرنەشە اۋىلدى سۋ العان. وسىدان سوڭ ماقتارال اۋدانىندا توتەنشە جاعداي جاريالاندى.

تۇركىستان وبلىسى اكىمدىگىنىڭ مالىمەتىنشە، ماقتارال اۋدانىندا 14 اۋىلدىڭ 31 مىڭنان استام تۇرعىنى ەۆاكۋاتسيالانعان. 845 ءۇي، 3 مەكتەپ، 5 بالاباقشا، 4 مەديتسينا عيماراتى مەن مادەنيەت ءۇيى جانە 54,7 كم كوپىر مەن جولدى سۋ العان. بۇدان بولەك، 7639 گەكتار ەگىستىك سۋ استىندا قالعان. جۇزدەگەن مال ولگەن.

وقيعاعا بايلانىستى قۇرىلعان قازاقستاندىق ۇكىمەت كوميسسياسى 6 مامىردا سۋدان زارداپ شەككەن تۇرعىندارعا ارقايسىسىنا 100 مىڭ تەڭگە (شامامەن 240 دوللار) كولەمىندە كومەك بەرىلەتىنىن ايتتى. كوميسسيا وكىلدەرى سونىمەن بىرگە ءۇيى جارامسىز قالعان وتباسىلارعا بىرنەشە ۇسىنىس جاسادى: بيلىكتىڭ كومەگىمەن باسقا جاققا كوشۋ نەمەسە اۋىلدا قالىپ، ۇيلەرىن جوندەتكىزۋ نەمەسە بيلىكتىڭ كومەگىمەن ءوز بەتىنشە جوندەتۋ. بيلىك وكىلدەرى سۋ شايعان ەگىستىك پەن مال شىعىنىن دا وتەۋگە ۋادە بەرگەن.

Abai.kz