ءماجىلىس دەپۋتاتى، قازاقستان رەسپۋبليكاسى «ارداگەرلەر ۇيىمى» رەسپۋبليكالىق قوعامدىق بىرلەستىگىنىڭ ورتالىق قەڭەسىنىڭ توراعاسى باقتىقوجا ىزمۇحامبەتوۆ مەملەكەت باسشىسى قول قويعان «ارداگەرلەر تۋرالى» زاڭعا قاتىستى پىكىر ايتتى، دەپ حابارلايدى قازاقپارات.

«بۇل زاڭ جەڭىستىڭ 75 جىلدىعى قارساڭىندا قابىلدانۋى سيمۆولدىق مانگە يە. بۇل قۇجات ارداگەرلەر ساناتىنا ەنگەن ادامدار ءۇشىن كەپىلدىكتەر مەن جەڭىلدىكتەردى قامتىدى. وسى ورايدا بۇعان دەيىن ءتۇرلى زاڭداردا قاراستىرىلعان كەپىلدىكتەر مەن جەڭىلدىكتەردىڭ بارلىعى شوعىرلاندى»، - دەدى ب. ىزمۇحامبەتوۆ .

سونىمەن قاتار ول وسى باعىتتا زاڭنامانى ارى قاراي جەتىلدىرۋ بويىنشا جۇمىستار جالعاسىن تاباتىنىن اتاپ ءوتتى.

«بۇل زاڭمەن وسىعان دەيىن قاراستىرىلماعان جەڭىلدىكتەر مەن جاردەماقىلار ءتۇرلى ساناتتار ءۇشىن ەسكەرىلدى»، - دەدى دەپۋتات.

سونىمەن قاتار ول زاڭ ۇكىمەت مۇمكىندىكتەرىن ەسكەرە وتىرىپ قابىلدانعانىن اتاپ ءوتتى.

وسىنداي زاڭنامانى قابىلداۋ بۇرىننان قاراستىرىلعانىنا توقتالعان ب. ىزمۇحامبەتوۆ : «زاڭ بارلىق ءتيىستى ينستانتسيالاردان ءوتىپ، وعان پرەزيدەنت قول قويدى. وسى ماڭىزدى قۇجاتتىڭ قابىلدانۋىمەن بارشا ارداگەرلەردى قۇتتىقتايمىن!»، - دەدى.

بۇدان بۇرىن حابارلانعانداي، 30 ءساۋىر كۇنى پارلامەنت سەناتىنىڭ جالپى وتىرىسىندا «ارداگەرلەر تۋرالى» زاڭى قابىلداندى.

زاڭ جوباسىنىڭ نەگىزگى ماقساتى – ارداگەرلەردى الەۋمەتتىك قورعاۋعا بايلانىستى قوعامدىق قاتىناستاردى رەتتەيتىن زاڭنامالىق اكتىلەردى جۇيەلەۋ، قايتا قاراۋ جانە ارداگەرلەردىڭ جاڭا ساناتتارىن قالىپتاستىرۋ.

سونىمەن قاتار، جالپى وتىرىستا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە الەۋمەتتىك قامسىزداندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» ىلەسپە زاڭ ەكى وقىلىمدا قارالىپ، قابىلداندى.

ونى ازىرلەۋ قاجەتتىلىگى بىرقاتار زاڭنامالىق اكتىلەردى «ارداگەرلەر تۋرالى» زاڭ جوباسىنا سايكەس كەلتىرۋمەن بايلانىستى. نەگىزگى جاڭا وزگەرىستەر الەۋمەتتىك تولەمدەرگە قاتىستى بولىپ وتىر.

Abai.kz