الماتى وبلىسىندا كەزەڭ-كەزەڭىمەن جەڭىلدەتىلگەن كارانتين شارالارى ەنگىزىلەدى. وسىعان بايلانىستى وبلىستىڭ باس مەملەكەتتىك سانيتارلىق دارىگەرى قايرات بايمۇحامبەتوۆ ءتيىستى قاۋلى قابىلدادى، - دەپ حابارلايدى وبلىس اكىمدىگى. 

قاۋلىدا ايتىلعانداي، كارانتيندىك شارالاردى جەڭىلدەتۋ اياسىندا ساعات 05.00-20.00 ارالىعىندا راستايتىن قۇجاتتارى بار بولعان جاعدايدا باۋ-باقشاعا، ساياجايلارعا باراتىن ازاماتتارعا، قوعامدىق جانە جەكە كولىكتەرگە سالىنعان تىيىم الىنىپ تاستالادى. دەگەنمەن باعباندارعا (باقشا ەگۋشىلەرگە) ۋچاسكەلەردە (ساياجايلاردا) قوناق شاقىرىپ شارا وتكىزۋگە تىيىم سالىنادى، ولار 2 مەترلىك ارا قاشىقتىقتى ساقتاپ، مەديتسينالىق ماسكالار تاعىپ، انتيسەپتيكتەر پايدالانۋدى جالعاستىرۋى ءتيىس.

ازاماتتارعا اۋلا ىشىندەگى اۋماقتار مەن بالالار الاڭدارىندا ساعات 09.00 مەن 20.00 ارالىعىندا سەرۋەندەۋگە رۇقسات ەتىلەدى. وبلىس تۇرعىندارى ءبىر-بىرىمەن قول الىسپاۋى ءتيىس، ادامدار اراسىنداعى 2 مەترلىك قاشىقتىقتى ساقتاپ، مەديتسينالىق ماسكالار تاعىپ، انتيسەپتيكتەر پايدالانا بەرۋى كەرەك.

اتاپ وتەرلىگى، COVID-19 ينفەكتسياسىنىڭ تىركەلۋىنە بايلانىستى كارانتيننىڭ كۇشەيتىلگەن رەجيمى ەنگىزىلگەن ەلدى مەكەندەر مەن نىساندار اۋماعىندا قوزعالىسقا سالىنعان تىيىم ساقتالادى.

جاڭا قاۋلىعا سايكەس اۆتوجۋ، تەحنيكالىق قىزمەت كورسەتۋ ستانتسيالارى، دوڭگەلەك جوندەۋ قىزمەتى ساعات 10.00-دەن 20.00 ارالىعىندا ءوز جۇمىستارىن جالعاستىرا الادى.

سول سياقتى تاڭەرتەڭگى 09.00-دەن كەشكى 16.00 ارالىعىندا حيميالىق تازارتۋ، كىر جۋ ورىندارى دا جۇمىستارىنا كىرىسەدى.

زاڭدىق قىزمەت كورسەتەتىن سۋبەكتىلەر (ادۆوكاتتار، سوت ورىنداۋشىلار جانە ت.ب.), سونداي-اق نوتاريۋستار تاپسىرىستار بويىنشا ساعات 10.00-نان 20.00-گە دەيىن جۇمىس ىستەيدى.

اۆتوبولشەكتەر ساتاتىن، قۇرىلىس ماتەريالدارىن ساۋدالايتىن جەكە تۇرعان دۇكەندەر دە ساعات 09.00 مەن 18.00 ارالىعىندا اشىق بولادى.

ەكىنشى دەڭگەيلى بانكتەر مەن ولارعا قاراستى اقشا ايىرباستاۋ پۋنكتتەرى، نەسيەلىك سەرىكتەستىكتەر، ميكروقارجىلىق ۇيىمدار قالىپتى رەجيمدە جۇمىستارىن جالعاستىرادى.

باۋ-باقشا سەرىكتەستىكتەرىنە، ساياجايلارعا باراتىن قوعامدىق كولىكتەر ساعات 05.00-دەن 20.00-گە دەيىن جۇرەتىن بولادى.

كۇزەت قىزمەتى ۇيىمدارى، جولدار مەن كوپىرلەردى كۇتىپ-ساقتايتىن، سونىڭ ىشىندە تەمىر جولداردا قىزمەت كورسەتەتىن نىساندار دا جۇمىسقا كىرىسەدى.

بۇل رەتتە كارانتين كەزىندە جۇمىس ىستەيتىن نىساندار سانيتارلىق-دەزينفەكتسيالىق تالاپتاردى قاتاڭ ساقتاۋى ءتيىس.

Abai.kz