ءبىلىمنىڭ تاراۋىنا نە كەدەرگى (سىبىرلاپ: ناداندار ەمەس) جانە نەگە عالىمداردىڭ بىزگە پايداسى جوق

مىنا قاراپايىم اقيقاتتى مىقتاپ ءتۇيىپ الۋ كەرەك ەكەن. بۇ جولى ۇنەمى قارعىسقا قالا بەرەتىن قيالي ناداندارعا ەمەس، مىنا كادىمگى وزىمىزگە. الەمدە سالىستىرمالى تۇردە وڭالمايتىن، ءۇمىتسىز قاراڭعى ناداندار سانى تۇراقتى 15 پايىزدى قۇرادى دەلىك. ال ەجەلەپ ۇيرەتۋدى قاجەت ەتپەيتىن، ەلدەن وزىپ بىلەتىن زەرەكتەر سانى 15 پايىزدى قۇرايدى دەسەك، بۇلار جەمە جەمگە كەلگەندە كوپ نارسەنى شەشپەيدى ەكەن.
قوعامداعى تارازى باسىن ەكى جاقتىڭ ءبىر جاعىنا بۇراتىن بۇلار ەمەس. ورتاداعى 70 پايىز.

ورتاداعىلار اسىپ بارا جاتقان دانىشپان ەمەس، بىراق دايەك پەن ايعاقتى تىرىسسا تۇسىنە الاتىن، ناداندىق پەن پاراساتتان دامەسى الما كەزەك پايدا بولاتىن، تۇپتەپ كەلگەندە قوعامعا تيگىزەر تازا پايداسى الگى ەكى شەتكى توپتان ارتىق بولاتىن تىرلىككە جارامدى ادامدار كاتەگورياسى. مەملەكەت كەلبەتىن انىقتايتىن دا وسى توپ.

بايقايتىنىم 15 پايىز ساۋاتتى قاۋىم 15-پايىز ءۇمىتسىز ناداندارمەن سوعىستا تاۋى شاعىلىپ، بۇكىل حالىقتان كوڭىلى قالسا، الگى 15 پايىز قاراڭعىلىق تاراتۋشىلار ماساتتانىپ، ورتاداعى پوتەنتسيالى بار كوپشىلىكتى ارتقا تارتا بەرەدى. ودان ەل دە، قوعام دا ەشتەڭە تاپپاي، باتقان شىرماۋىعىنا شىرمالا بەرەدى. سولارمەن قىرىلىپ، دەم تاۋىسۋدىڭ ورنىنا سەنىڭ كەمىندە ەكى سويلەمىڭە ىلەسە الاتىن ادامدارمەن جانە ءوز قاراڭعىلىعىن مارتەبە كورمەيتىندەرمەن بولىسكەنىڭ دۇرىس. ولار از ەمەس.
نەگە ينتەرنەتتە كەيدە وفلايندا وزىڭنەن باسقانىڭ ءبارى توپاس سياقتى، حالىقتىڭ ءبارى تەگىس قاراڭعى سياقتى سەزىم قالىپتاسادى؟

سەبەبى، تومەنگى 15 پايىزدىڭ داۋسى قاتتى شىعادى. ولار وزدەرىنە وتە سەنىمدى.

پىكىر جازار بۇرىن كوپ ادام ويلانادى، تارازىلايدى، كوبى ەشتەڭە جازبايدى، تاقاپ سۇراماساڭ ايتپايدى تەك وقۋمەن شەكتەلەدى.
جازىپ قويسا دا، كۇماندانىپ وتىرادى، قاتە جىبەرمەدىم بە وسى، ارتىق ايتپادىم با ەكەن دەپ. مۇنىمنان باسقانى قويىپ، ەڭ قۇرىسا وزىمە نە ءمانى بار دەپ ويلانادى.

ال كەشىرەرسىزدەر، قاراڭعى ادام ناداندىعىن تاراتپاسا ءىشى اۋىرادى.
ول نادان ءوزىڭ بولۋىڭ دا مۇمكىن. سەبەبى، سەنەن تىم ارتىق بىلەتىندەر ساعان ەسۋاس كورىنۋى دە تابيعي جاعداي.

ناتيجەسىندە جەلىگە كىرەسىڭ، وقۋدىڭ ءوزى ميىڭدى كەمى 10 مىڭ جىل كەرى قاراي سەكىرتەتىن پىكىر وقيسىڭ. پويىزعا مىنەسىڭ، ءبىر سيقىرلى يۋتيۋب كونتەنتكە تويىپ العان "حريستوس" توسەگىن توسەمەي جاتىپ، ەل-جۇرتقا سايراپ وتىرادى "كاك ونا ەست" عالامزاتتىڭ بۇكىل سىرىن شاشىپ تاستاپ.
ونى تىڭداپ، ۇندەمەگەننىڭ ءبارى توپاس پا؟

قۇداي بىلەدى، كەيبىرىنىڭ اقىلى جەتكەنىمەن، تەمپەرامەنتى كونبىس، اناۋ-مىناۋعا الاڭدامايدى. ىشىنەن، "وي، سورىڭدى ۇرايىن-اي", دەيدى دە angry birds- ءىن ويناي بەرەدى.

ءبىز باسقا ەلدەردەن قاتتى توپاس ەمەسپىز، تەك وتە ۇمىتشاقپىز. كوشپەندى ءومىر ميدا كوپ ۇعىمداردى ساقتاۋعا ۇيرەتپەگەن عوي دەيمىن.

ەلدىڭ ءبارى عالىم بولۋى شارت ەمەس ءارى قاجەت تە ەمەس. عالىمدار جالپى ماتەريالدىق تۇرعىدا ەڭ پايداسىز حالىق. سودان عوي، ميللياردەر بولىپ كەتكەن عالىمدار از. عالىمعا وبال ما؟ جوق. وبال ەمەس. عىلىم مەن ءبىلىم ەكى بولەك. ءبىزدىڭ ءومىردى جەڭىلدەتەتىن عالىمدار ەمەس. ينجەنەرلەر. تەحنولوگتار. عالىمدار كۇندەلىكتى پايداسى بار شوپاق تا وندىرمەيدى. وسى تۇستا، ماعان رەنجۋىڭىز مۇمكىن. عالىمدار پايداسىز با سوندا؟

جوق. عالىمدار ونەرتاپقىش ينجەنەرلەرى جوق ەل ءۇشىن عانا پايداسىز. سەبەبى عالىمنىڭ ماقساتى پايدالى بىردەڭە جاساۋ ەمەس، عىلىم كوكجيەگىن كەڭەيتۋ. قورشاعان ورتا تۋرالى پايدالى-پايداسىز اقپارات جيناۋ. ونى سورتتاپ، پايداعا اسىراتىن ونەرتاپقىشتار.

عىلىمداعى 99 پايىز اقپاراتتىڭ پايداسى جوق. ازىرگە. سەبەبى ينجەنەر-تەحنولوگتار ول ءبىلىمدى كۇندەلىكتى پايداعا اسىرۋ جولىن ءالى ويلاپ تاپپادى.
عالىم مەنتاليتەتى مەن ونەرتاپقىش مەنتاليتەتى ەكى بولەك دۇنيە. عالىم كوبەلەكتى نە ءۇشىن زەرتتەۋ كەرەك دەپ باسىن قاتىرمايدى. زەرتتەيدى، تاپقانىن تىركەيدى. بولدى.

كوبىمىز ونەرتاپقىشتار سياقتى پايدا كاتەگورياسىمەن ويلايمىز. ەلگە، جەرگە، وزىمە، وتباسىما پايدا قايسى دەپ. نە ءۇشىن دەگەن ساۋالعا جاۋاپ ىزدەيمىز. عىلىم ويتپەيدى. ونەرتاپقىش پسيحولوگياسى بيزنەسمەن پسيحولوگياسىنا جاقىن. عالىم - كىشكەنتاي بالا سياقتى. ءبارىمىز ول ساتىدان تىم ەرتە ءوسىپ كەتەمىز دە، پايدا الەمىنە سۇڭگيمىز.

سوندىقتان، اقپارات تىم كوپ بولسا، بىردەن قورعانىس مەحانيزمى ىسكە قوسىلادى ميدا، "ماعان ءدال وسى، ءدال قازىر كەرەك پە؟"

اقپارات تىم كوپ، ءارى كۇردەلى بولسا، ءتىپتى دە "اقشا بولا ما جوق پا، سونى ايتشى، مىجىماي" دەگەن اپاتتىق سيگناليزاتسيا قوسىلادى. ونىڭ ءبارى تابيعي رەاكتسيا.

اقپاراتتان قۇتىلا المايسىڭ، دەمەك ءتۇبى ميىڭ تولىپ قالادى. ونىڭ دۇرىس دۇنيەمەن تولۋى ءۇشىن دەگەنمەن، ءبىز فيلترلەرىمىزگە كۇتىم جاساۋىمىز كەرەك. كەيدە فيلترلەردى شىعارىپ، قاعىپ، تازارتىپ، جاڭاسىنا الماستىرىپ وتىرۋدا ءمان بار.

كەشەگى كۇنگە دەيىن قىتايدا بانانعا سپيد ۆيرۋسىن شپريتسپەن سالىپ بايعۇس قازاققا ساتاتىنى جايلى پىكىرگە سەنگەن ەل ەكەنىمىزدى دە ۇمىتپايىق.
فيلترلەرىمىز قاۋاعىمىزعا تولاتىن اقپاراتتىڭ دالدىگىن انىقتاۋى كەرەك، ونىڭ جاعىمدىلىعىن ەمەس. ءدال كەرەك كەزدە سەنىمىڭدى اقتامايتىن قىزىق بىراق جالعان اقپاردىڭ پايداسىنان زيانى كوپ. ودان ىشپىستىرارلىق شىنايى اقپار ءتاۋىر. سوندىقتان، اقپاراتتى وعان كۇندەرىڭ تۇسپەي تۇرىپ تەكسەرىپ العان پايدالى.

ودان بولەك دەڭگەيىڭدى ەسكەر. سەنەن تىم كوپ بىلەتىن اداممەن اڭگىمەڭ جاراسپاي قالۋى مۇمكىن. پوتەنتسيال سۇحباتتاسىڭ سەنەن كەڭ بولىپ، اڭگىمەڭ جاراسسا دا، سەن ونى سالىستىرمالى اقىماقتىعىڭمەن ارنەنى سۇراپ شارشاتىپ جىبەرۋىڭ مۇمكىن. ۆىشماتتان ساباق بەرە الاتىن ادامعا قوسۋ-الۋدى ۇيرەتۋىن تەگىن تالاپ ەتۋ داعدىعا، بىلىمگە جاسالعان قيانات.

قىسقاسى، بىردەڭە ۇيرەنەم دەسەڭ وزىڭنەن ول سالادان ءسال عانا كوبىرەك حاباردار ادامعا جۇگىن، ۇيرەتەم دەسەڭ دە وزىڭنەن حابارى ءسال ازىراق ادامعا ۇيرەت، سوندا ءبىلىم سۋسىنى ناداندىقتىڭ تىك جارىنا سوقتىقپاي، تەكپىشەكپەن كەرەك جەرىنە جەتەدى.

اسقار بازاربايدىڭ الەۋمەتتىك جەلىدەگى جازباسى

Abai.kz