15 ساۋىردەن باستاپ الماتى وبلىسىندا كارانتين ەنگىزىلەدى. بۇل تۋرالى وبلىستىق اكىمدىكتىڭ ءباسپاسوز قىزمەتى حابارلادى. 

بۇل تۋرالى وبلىستىڭ مەملەكەتتىك باس سانيتار دارىگەرى قايرات بايمۇحامبەتوۆ ايتتى. وسىعان بايلانىستى "الماتى وبلىسىنىڭ اۋماعىندا شارۋاشىلىق جانە (نەمەسە) وزگە دە قىزمەتى مەن تۇرمىسىنىڭ ەرەكشە شارتتارى بار كارانتين ەنگىزۋ تۋرالى" ءتيىستى قاۋلى قابىلدانعان.

قاۋلى بويىنشا وبلىس اۋماعىنا وزگە ەلدەردەن ورالعان الماتى وبلىسىنىڭ تۇرعىندارىنان باسقا، سول سياقتى جۇك تاسۋشى ادامدار مەن كولىكتەردەن، سونىڭ ىشىندە ترانزيتتىك كولىكتەردەن باسقا وزگە ءوڭىردىڭ ادامدارى مەن كولىكتەرىنە كىرۋگە تىيىم سالىنادى. ال الماتى وبلىسىنىڭ باسقا وڭىرلەرگە شىعىپ كەتكەن تۇرعىندارى وبلىس اۋماعىنا ءساۋىردىڭ 14-ىنەن 15-ىنە قاراعان كۇنگى ساعات 00.00-گە دەيىن قايتىپ كەلە الادى.

كارانتين ەنگىزىلۋىنە بايلانىستى اۋدان، قالالارعا كىرۋ-شىعۋعا، سول سياقتى ەلدى مەكەندەردىڭ ىشىندەگى قوزعالىستارعا تىيىم سالىنادى. بۇل رەتتە تۇرعىندارعا مەديتسينالىق ۇيىمدارعا، جاقىن جەردەگى دۇكەندەر مەن دارىحاناعا كۇنىنە ءبىر رەت قانا شىعۋعا رۇقسات. ءبىرىنشى كەزەكتەگى قاجەت تاۋارلاردى، ازىق-تۇلىكتەردى، ءدارى-دارمەك پەن مەديتسينالىق بۇيىمداردى، قورعانۋ جانە گيگيەنالىق قۇرالداردى، جانار-جاعارماي ماتەريالدارىن، كولىك قۇرالدارىنىڭ قوسالقى بولشەكتەرىن، وندىرىستىك قۇرالداردى جانە ت.ب. تاسىمالدايتىن ادامدار مەن كولىكتەرگە تاپسىرىستىڭ بار ەكەنىن ايعاقتايتىن قۇجاتتارى بولعان جاعدايدا; كوممۋنالدىق، اپات قىزمەتى، قوقىس جيناۋشى، بايلانىس جانە كوممۋنيكاتسيا قىزمەتكەرلەرى مەن كولىكتەرىنە، سول سياقتى تەلەكوم-وپەراتورلارىنىڭ كوممۋنيكاتسيا جەلىلەرى مەن تەحنيكالىق قولداۋدى باسقارۋدىڭ، ءوڭىردىڭ تىرشىلىگىن قامتاماسىز ەتۋگە قاجەتتى جۇك تاسىمالداۋ مەن ارنايى كولىكتەردىڭ قىزمەتكەرلەرى مەن كولىكتەرىنە جۇمىس ورنىنان انىقتاما بولعان جاعدايدا رۇقسات ەتىلەدى.

كارانتين كەزىندە جۇمىس ىستەيتىن ۇيىمداردىڭ ادامدارى مەن كولىكتەرىنە، قىزمەتكەرلەردى تاسىمالداۋشى ادامدار مەن كولىكتەرگە شەكتەۋدىڭ قاتىسى جوق. دەگەنمەن جەڭىل كولىكتە 3 ادامنان ارتىق وتىرماۋى كەرەك، اۆتوبۋستار سالوندارىنىڭ ادام تولتىرۋى 40 %-تەن اسپاۋى ءتيىس، جولاۋشىلار جەكە-جەكە وتىرۋى كەرەك، ياعني جولاۋشىلاردىڭ ارا قاشىقتىعى 1 مەتردەن كەم بولماۋى ءتيىس، سول سياقتى مەنشىك تۇرىنە قاراماستان مەديتسينالىق ۇيىمداردىڭ قىزمەتكەرلەرى، اسكەري قىزمەتشىلەر، مەملەكەتتىك جانە قۇقىق قورعاۋ ورگاندارىنىڭ، سول سياقتى ولارعا باعىنىشتى مەكەمەلەردىڭ، ۆەتەرينارلىق، دەزينفەكتسيالىق جانە وباعا قارسى قىزمەتتەردىڭ، كوروناۆيرۋس ينفەكتسياسىن دياگنوستيكالاۋ زەرتحاناسىنىڭ جانە كارانتين شارالارىن اتقارۋعا تارتىلعان باسقا دا مەكەمەلەردىڭ قىزمەتكەرلەرىنە جۇمىس ورنىنان انىقتاما نەمەسە قىزمەتتىك كۋالىگى بولعان جاعدايدا رۇقسات ەتىلەدى.

رەسمي بۇقارالىق اقپارات قۇرالدارى قىزمەتكەرلەرىنىڭ قولىندا رەداكتسيالىق تاپسىرماسى بولعان جاعدايدا، قۇرىلىس جانە جول جوندەۋ مەكەمەلەرى قىزمەتكەرلەرىنىڭ، مەملەكەتتىك نىساندار قۇرىلىسىنا تارتىلعان قاجەتتى مامانداردىڭ، سول سياقتى ارنايى ينكاسساتورلىق قىزمەت ماماندارى مەن كولىكتەرىنىڭ ءتيىستى بەلگىلەرى مەن رۇقسات قۇجاتتارى بولعان جاعدايدا، بىرگە جەرلەۋ ءراسىمىنىڭ اۆتوكولىكتەرىنە سانى وننان ارتىق ەمەس اداممەن بىرگە، جانىندا ەكىدەن ارتىق ەمەس اداممەن بىرگە قولىندا مەديتسينالىق كورسەتىلىمدەرى بار ازاماتتارعا قولىندا ءتيىستى قۇجاتتارى بولعان جاعدايدا شەكتەۋ جاسالمايدى.

بۇل رەتتە مەديتسينالىق ۇيىمداردىڭ قىزمەتى، سونىڭ ىشىندە مەنشىك تۇرىنە قاراماستان ستوماتولوگيالىق مەكەمەلەر; ۆەتەرينارلىق قىزمەتتەر، سونىڭ ىشىندە ۆەتەرينارلىق جانە مال شارۋاشىلىعىنىڭ جەدەل جاردەم قىزمەتى; زەرتحانانىڭ بارلىق ءتۇرى; سۋپەرماركەتتەر، ازىق-تۇلىك دۇكەندەرى، سونىڭ ىشىندە ساۋدا-ويىن-ساۋىق ورتالىقتارىنىڭ ىشىندەگى ازىق-تۇلىك ساتاتىن دۇكەندەر، كوپ قاباتتى تۇرعىن ۇيلەر; ءدارىحانالار، سول قاتاردا ۆەتەرينارلىق ءدارىحانالار قىزمەتى ۋاقىتشا توقتاتۋعا جاتپايدى.

وبلىستاعى كوممۋنالدىق قىزمەتتەر مەن ينفراقۇرىلىمدار، ەلەكتروەنەرگەتيكالىق كومپانيالار، سۋمەن قامتۋ/جىلۋمەن قامتۋ، ورتكە قارسى جانە اپاتتىق-قۇتقارۋ قىزمەتى، تۇرعىن ءۇي قورىن باسقارۋ سالاسىنداعى قىزمەتتەر (ەلەكتريكتەر، سانتەحنيكتەر، اۋلالار مەن عيماراتتاردى تازالاۋ، اپات قىزمەتى، سونىڭ ىشىندە ليفتىلەرگە قىزمەت كورسەتۋ), كوشەلەر مەن عيماراتتاردى تازالاۋ، قوقىستار مەن قالدىقتاردى جيناۋ، وڭدەۋ جانە جويۋ، دەزينفەكتسيالىق قىزمەتتەر، جول قوزعالىسىن رەتتەۋدىڭ تەحنيكالىق قۇرالدارىنىڭ جۇمىسىن قامتاماسىز ەتەتىن ۇيىمدار; تەلەكوممۋنيكاتسيا مەن بايلانىس (ينجەنەرلىك قىزمەتتىڭ جۇمىسشىلارى ءۇشىن (كارانتين كەزىندە جابىق بولاتىن بارلىق نىساندارعا، سونىڭ ىشىندە بايلانىس وپەراتورلارىنىڭ بازالىق ستانسالارى مەن (نەمەسە) قۇرال-جابدىقتارى ورنالاسقان ساۋدا نىساندارىنا رۇقساتى بار ۇيالى بايلانىستىڭ بازالىق ستانسالارىن مونتاجداۋ مەن قۇرىلىسىن جۇرگىزۋشىلەر، جوندەۋ بريگادالارى، كوممۋنيكاتسيا مەن تەحنيكالىق قولداۋ جۇيەلەرىن باسقارۋ ورتالىعىنىڭ جۇمىسشىلارى) جۇمىسىن جالعاستىرادى.

سول سياقتى الدىن الا تاپسىرىس بەرىلۋىنە قاراي تۇقىم، كوشەت، مينەرالدى تىڭايتقىشتار، اۋىل شارۋاشىلىعى تەحنيكالارىنىڭ قوسالقى بولشەكتەرىن ساتاتىن نىساندار; كوكتەمگى ەگىس جۇمىستارىنا، قۇرىلىس جانە جول جوندەۋ جۇمىستارىنا قاتىسى بار نىساندار جۇمىس ىستەيدى.

كۋرەرلىك جەتكىزۋ نىساندارى دا قىزمەت كورسەتەدى. رەسمي بۇقارالىق اقپارات قۇرالدارى، ونەركاسىپتىك، وندىرىستىك ورىندار، «ازاماتتارعا ارنالعان ۇكىمەت» مەملەكەتتىك كورپوراتسياسى» كەاق فيليالدارىنىڭ بايلانىس ورتالىقتارى، سول سياقتى ەلدى مەكەننەن تىس جەرلەردەگى جانار-جاعارماي جانە گاز تولتىرۋ ستانسالارى قالىپتى رەجيمدە، ال ولاردىڭ ەلدى مەكەن ىشىندەگىلەرى ساعات 8.00-دەن 20.00-گە دەيىن جۇمىس جاسايدى.

ازىق-تۇلىكتىك ەمەس تاۋارلار، سونىڭ ىشىندە ءبىرىنشى كەزەكتەگى قاجەتتى تاۋارلار، قۇرىلىس ماتەريالدارى مەن تۇرمىستىق حيميا ساتاتىن نىساندار جەتكىزۋ ۇيىمداستىرىلعان جاعدايدا جۇمىس ىستەي الادى.

ارنايى كولىك قۇرالدارى، ەلدى مەكەن ىشىندەگى قوعامدىق كولىكتەر مەن رەسمي تاكسي قىزمەتى قىزمەت كورسەتۋدى جالعاستىرادى. دەگەنمەن تاكسي قىزمەتىنىڭ اۆتوكولىكتەرى ءتيىستى بەلگىلەرمەن جابدىقتالعان بولۋى جانە جۇرگىزۋشىنىڭ جەكە مالىمەتتەرى جولاۋشىعا كورىنەتىن جەردە تۇرۋى ءتيىس. وسىعان دەيىنگى تالاپتارداعىداي، جەڭىل كولىكتە جۇرگىزۋشىنى قوسقاندا ءبىر وتباسى مۇشەلەرىنەن باسقا ءۇش ادامنان ارتىق بولماۋى كەرەك. سانيتارلىق-گيگيەنالىق شارالاردى ساقتاۋ تالابى كۇشەيتىلدى. قالالىق جانە اۋداندىق اۆتوبۋستاردىڭ جولاۋشىلارمەن تولۋى وتىراتىن ورىنداردىڭ 40 %-ىنەن استپاۋى ءتيىس، بۇل رەتتە قوعامدىق كولىكتە ماسكاسىز جۇرۋگە تىيىم سالىنعان.

ساۋدا-لوگيستيكالىق ورتالىقتار، قويمالار، ولاردىڭ جۇمىسىن قامتاماسىز ەتەتىن تۇلعالار مەن ۇيىمدار; جەرلەۋ قىزمەتىنىڭ نىساندارى، زيراتتار; جەكە ورنالاسقان پوشتا بايلانىسى نىساندارى مەن ەكىنشى دەڭگەيلى بانكتەر سانيتارلىق-دەزينفەكتسيالىق شارالاردى كۇشەيتىپ، كەلۋشىلەردىڭ كەمىندە 1 مەتر قاشىقتىقتا تۇرۋىن قامتاماسىز ەتە وتىرىپ، جۇمىستارىن جالعاستىرادى. ءبىرىنشى باسشىلاردىڭ شەشىمى بويىنشا مەملەكەتتىك باسقارۋدى ۇزدىكسىز جۇرگىزۋدى قامتاماسىز ەتەتىن مەملەكەتتىك ورگاندار مەن ولاردىڭ باعىنىشتى ۇيىمدارى ءوز قىزمەتىن جۇرگىزەدى.

رۇقسات ەتىلگەن قىزمەت تۇرلەرىنىڭ تىزىمىندە جوق سالالاردىڭ ۇيىمدارى مەن كاسىپورىندارى وسى قاۋلى كۇشىندە بولاتىن ۋاقىت ارالىعىندا قالىپتى رەجيمدەگى جۇمىسىن توقتاتۋعا ءتيىس ەكەنى اتاپ ءوتىلدى. ولار ءوز جۇمىسىن قاشىقتان ىستەۋ رەجيمىندە، سونىڭ ىشىندە ونلاين رەجيمدە جالعاستىرا الادى. شەكتەۋ ەنگىزىلگەن ۋاقىتتاردا جۇمىس ىستەيتىن نىسانداردىڭ بارلىعى دا سانيتارلىق جانە دەزينفەكتسيالىق رەجيم تالاپتارىن قاتاڭ ساقتاۋعا ءتيىس.

الماتى وبلىسى اۋماعىندا كارانتين ەنگىزۋ تۋرالى قاۋلى 2020 جىلعى 14 ساۋىردەن 15-ىنە قاراعان تۇندە ساعات 00.00-دە كۇشىنە ەنەدى.