9 ساۋىردە تاجىكستان پرەزيدەنتى ەمومالي راحمون قازاقستان پرەزيدەنتى قاسىم-جومارت توقاەۆقا تەلەفون سوقتى. گۋمانيتارلىق كومەك رەتىندە 5 مىڭ توننا ۇن جىبەرگەنى ءۇشىن العىس ايتتى.

سونىمەن قاتار ول تاجىكستاننىڭ ازاماتتارىن وتانىنا قايتارۋعا جانە قازاقستان شەكاراسىنان جۇك تاسىمالىن توقتاۋسىز وتكىزۋگە ىقپال ەتكەنى ءۇشىن ريزاشىلىق بىلدىرگەن.

بۇگىندە بۇكىل الەم COVID-19 پاندەمياسىمەن كۇرەسىپ جاتىر. الايدا، دۇنيەجۇزىلىك دەنساۋلىق ساقتاۋ ۇيىمى اتالعان ىندەتتىڭ تاجىكستاندا مۇلدە تىركەلمەگەنىن ايتادى.

ال، قازاقستاندا كوروناۆيرۋس جۇقتىرعانداردىڭ سانى كۇن سايىن ارتىپ كەلەدى. وسىعان وراي قازاقستان دا باسقا مەملەكەتتەردەن كومەك الۋعا مۇددەلى بولعان.

رەسەيدەن كەلگەن كومەك

1-ءساۋىر كۇنى قازاقستان ەلدە تارالعان ىندەتكە بايلانىستى رەسەيدەن گۋمانيتارلىق كومەك سۇرادى.

«ءبىز بارلىق ەلدەرگە، سونىڭ ىشىندە رەسەي فەدەراتسياسىنا دا گۋمانيتارلىق كومەك كورسەتۋ تۋرالى ءوتىنىش جىبەردىك»، - دەدى قازاقستاننىڭ سىرتقى ىستەر مينيسترلىگى.

بۇل تۋرالى tsargrad.tv دەيتىن سايت «ارقامىزدان پىشاق سۇققان قازاقستانعا كومەك بەرەمىز بە، ويلانامىز با؟» دەپ مىسقىلداي ماقالا جازدى.

ءسويتىپ، قازاقستاننان، قازاقتان كورگەن «قياناتىن» جىپكە ءتىزىپ شىعىپتى. اقىر اياعى قازاقستاننىڭ رەسەيگە العىس ايتۋى ەكىتالاي ەكەنىن ايتىپ، ونى «اتا-اناسىنا ەشقاشان العىس ايتپايتىن بالاعا» تەڭەپتى.

قىتايدان كەلگەن كومەك

ال، 2-ءساۋىر كۇنى قازاقستانعا قىتايدان گۋمانيتارلىق كومەك كەلدى. گۋمانيتارلىق كومەككە سىناقتار جيىنتىعىنا ءبىر رەت قولدانىلاتىن مەديتسينالىق اياق كيىم، قولعاپ، كوزىلدىرىك جانە مەديتسينالىق كيىم كىرەدى.

ءسىم جاقىن ۋاقىتتا قىتايدان مەديتسينالىق قورعانىس قۇرالدارىن جەتكىزۋدى كۇتىپ وتىرعانىن مالىمدەدى. ال،قازاقستانداعى قىتاي باس كونسۋلىنىڭ ورىنباسارى مياو حۋمبو بۇل سوڭعى كومەك ەمەس ەكەنىن ايتتى.

دجەك ما جىبەرگەن كومەك

سونداي-اق، بۇگىن حەبەي پروۆينتسياسىنان «دجەك ما» جانە «Alibaba» قورلارى الماتىعا 4,5 مىڭ توننا گۋمانيتارلىق كومەك جولدادى. ونىڭ ىشىندە 500 مىڭ توننا ءتۇرلى مەديتسينالىق ماسكا، 5 مىڭ قورعانىش كوستيۋم، 50 مىڭ مەد.قولعاپ جانە تەرمومەترلەر بار.

ال، قر پرەزيدەنتى ق.توقاەۆ دجەك مانىڭ كومەگىنە العىسىن ءبىلدىردى.

ءباا جىبەرگەن كومەك

سونىمەن قاتار، 6-ءساۋىر كۇنى قر ءسىم  Twitter جەلىسىندە قازاقستانعا بىرىككەن اراب امىرلىكتەرىنەن 13 توننا گۋمانيتارلىق كومەك كەلگەنىن جازدى.

اقش جىبەرگەن كومەك

8-ءساۋىر كۇنى مەملەكەت باسشىسى ق.توقاەۆ اقش-تىڭ مەملەكەتتىك حاتشىسى مايكل پومپەومەن تەلەفون ارقىلى سويلەسىپ، اقش-تىڭ قازاقستانعا قولداۋ ءبىلدىرىپ، گۋمانيتارلىق كومەك كورسەتكەنى ءۇشىن ريزاشىلىعىن ءبىلدىردى. 

ءتۇيىن. جاپپاي تارالعان كوروناۆيرۋس پاندەمياسى كەز-كەلگەن ەلدىڭ ەكونوميكاسىنا ۇلكەن سوققى بولعانى بەلگىلى. الايدا، كورشى قىتاي اتالعان ىندەتتىڭ ەكونوميكالىق زاردابىن جويۋ ءۇشىن ءوندىرىس ورىندارىن جانداندىرىپ، قۋاتتى كاسىپورىنداردى ۇيىمداستىرۋعا كىرىستى. وزبەكستان پرەزيدەنتى ميريزيوەۆ تا ەلدەگى ءوندىرىس كولەمى مەن جۇمىس ورىندارىن ساقتاۋ، كاسىپورىنداردىڭ جۇمىسىن جالعاستىرۋ اسا قاجەت ەكەنىن ايتتى.

ايتپاقشى، بۇگىن وزبەكستاننىڭ يننوۆاتسيالىق دامۋ مينيسترلىگى جانىنداعى زاماناۋي تەحنولوگيالار ورتالىعىنىڭ قىزمەتكەرلەرى كوروناۆيرۋستى انىقتايتىن سىناما جۇيە جاساپ شىعارعانى بەلگىلى بولدى.

وزبەك بيلىگى كوروناۆيرۋس ينفەكتسياسىن انىقتاۋ بويىنشا بىرقاتار يننوۆاتسيالىق جوبالارعا بايقاۋ جاريالاعان ەكەن. ءسويتىپ وزبەك عالىمدارى كوروناۆيرۋستى انىقتايتىن سىناما ازىرلەگەن. بۇدان بولەك، قول جەتىمدى دارىلەردىڭ انتيۆيرۋستىق ناتيجەلەرىن زەرتتەپ جاتىر ەكەن.

قوش، بۇل وزبەكتەر. بىزدەگى جالقى سۇراق - قازاق عالىمدارىندا، قازاقستاننىڭ ۆيرۋسولوگتار مەن ينفەكتسيونيستەرىندە نە جاڭالىق؟

Abai.kz