قر دەنساۋلىق ساقتاۋ مينيسترىلىگىنىڭ رەسمي وكىلى دياس احمەتشارىپ ەلىمىزدە قىتايدىڭ 248 ازاماتى كارانتينگە جاتقىزىلعانىن ايتتى. 

مينيسترلىك مالىمەتىنە سايكەس، 6 قاڭتار مەن 1 ناۋرىز ارالىعىندا قازاقستانعا قىتايدان 32 456 ادام كەلگەن، دەپ جازادى tengrinews.kz سايتى.

"كەلگەندەردە ۆيرۋس دەڭگەيى جوعارى. ولار 1 "ا" كاتەگورياسىنا جاتاتىندار، ياعني قحر مەن يران ەلدەرىنەن كەلگەندەر. 2020 جىلدىڭ 20 اقپان - 4 ناۋرىز ارالىعىندا قىتايدان كەلگەن بارلىعى 315 ادام وقشاۋلاندى. ولاردىڭ 64-ءى - قازاقستان ازاماتتارى. 251 شەتەلدىك بار، ولاردىڭ 248-ءى - قىتاي ازاماتتارى. يراننان 24 ادام كەلدى. ولاردىڭ 9-ى - قازاقستاندىق، 15-ءى - يراننان كەلگەندەر", - دەدى دياس احمەتشارىپ.

سونداي-اق، 63 ادام كوروناۆيرۋسقا تەكسەرىلگەن، بىراق ولاردا ۆيرۋس انىقتالماعان.

ال، بۇگىن Nege.kz سايتى كارانتينگە جاتقىزىلعان قىتاي ازاماتتارى بيۋدجەت ەسەبىنەن ەمدەلەتىنىن جازدى. سايت مالىمەتىنە سايكەس، اتالعان جايتقا الماتى قالالىق دەنساۋلىق ساقتاۋ باسقارماسىنىڭ باسشىسى تىلەۋحان ابىلداەۆ جاۋاپ بەرگەن:

- كەشە 12 ادام كارانتيننەن شىقسا، سونىڭ 10-ى – قىتاي ازاماتتارى. ولاردى ەلدىڭ ىشىنە جىبەرسەك نە بولادى؟ ءيا، ولارعا قارجى مىندەتتى الەۋمەتتىك مەديتسينالىق ساقتاندىرۋ قورىنىڭ تاراپىنان تولەنۋدە.

قازىر ءار ادامعا كەتكەن شىعىن ەسەپتەلىپ جاتىر. سول ءتاريفتىڭ كولەمىندە شىعىنىن انىقتايمىز. بۇل قارجى رەسپۋبليكالىق بيۋدجەت ەسەبىنەن تولەنەدى. شەتەلدەن كەلگەندەر ميللياردەر نە كەدەي بولسا دا، كارانتيندە جاتقىزامىز. ەگەر باسقا اۋرۋمەن اۋىرسا، اقشاسىن الامىز. ال قولىندا انىقتاماسى بار ازاماتتار دەنساۋلىعىنىڭ جاقسى ەكەنىنە سەنىمدى. بىزگە كەلسە، قابىلداۋعا مىندەتتىمىز. تاعى ايتام، ولار كوروناۆيرۋستان تازا، – دەدى ابىلداەۆ.

ايتا كەتەيىك، وسى ۋاقىتقا دەيىن مينيسترلىك تاراپىنان اتالعان ۆيرۋسقا قاتىستى قاۋىپ جوق ەكەنى ايتىلعان. الايدا، ماماندار ساقتىق شارالارىن كۇشەيتۋ كەرەكتىگىن ەسكەرتەدى.

ولاردىڭ ايتۋىنشا، كۇندەلىكتى ەكى رەت دەنە قىزۋىن تەكسەرىپ، بولمەنى جەلدەتىپ، گيگيەنا ساقتاۋ قاجەت. سونداي-اق، دارىگەرلەر دەنە قىزۋى كوتەرىلىپ، جوتەل بولعان جاعدايدا بىردەن جەدەل جاردەم شاقىرۋعا كەرەگىن ايتادى.

Abai.kz