قازاقستاننىڭ كاسىپوداقتار فەدەراتسياسى مەن «Nur Otan» پارتياسى ءوزارا ارىپتەستىك تۋرالى مەموراندۋمعا قول قويدى. ول بويىنشا الداعى ۋاقىتتا پارتيا مەن فەدەراتسيا بىرلەسە وتىرىپ، ەلدەگى ءھام ەلدەن جىراقتا جۇرگەن ەڭبەككەرلەردىڭ قۇقىعى مەن مۇددەسىن بىرلەسە قورعاماق.

بۇگىن قابىلدانعان ءوزارا ىنتىماقتاستىق تۋرالى مەموراندۋم - ەلدەگى جۇمىسكەرلەردىڭ الەۋمەتتىك ءھام ەكونوميكالىق ماسەلەلەردە قۇقىقتارىن قورعاۋ، ولاردىڭ الەۋمەتتىك كەپىلدىكتەر مەن لايىقتى ەڭبەكاقىمەن قامتىلۋىن قاداعالاۋ سەكىلدى ماڭىزدى اسپەكتىلەردى قامتىپ وتىر.

جيىندا ءسوز العان «Nur Otan» پارتياسى تقراعاسىنىڭ ءبىرىنشى ورىنباسارى باۋىردان بايبەك، ەكى ۇيىمنىڭ ماقساتى ءبىر، مۇددەسى ورتاق ەكەنىن اتاپ ءوتتى.

«مەملەكەت باسشىسى قاسىم-جومارت توقاەۆ بىلتىر تۇڭعىش رەت كاسىبي مەرەكە رەتىندە ەنگىزىلگەن كاسىپوداقتار كۇنىندە «قازىرگى كاسىپوداقتاردىڭ قوزعالىستارى ەڭبەككەرلەردىڭ جۇمىس ورنىنداعى قۇقىقتارى مەن ەڭبەك قاۋىپسىزدىگىنىڭ ساقتالۋىن، لايىقتى ەڭبەكاقى مەن الەۋمەتتىك كەپىلدىكتەر الۋىن قامتاماسىز ەتەدى»، - دەپ اتاپ وتكەن بولاتىن. وسى رەتتە، «Nur Otan» پارتياسى ارقاشان قازاقستاندىقتاردىڭ ەڭبەك قۇقىقتارىن قورعاۋعا ەرەكشە كوڭىل بولۋدە. ياعني، قىزمەتكەرلەردىڭ ەڭبەك قۇقىقتارى بويىنشا ماسەلەلەر ءبىزدىڭ ەل ءۇشىن وتە وزەكتى. ەلباسى نۇرسۇلتان نازارباەۆ «پارتيا قاراپايىم ادامداردىڭ مۇعالىمدەردىڭ، دارىگەرلەردىڭ، ونەركاسىپتىك كاسىپورىن ەڭبەككەرلەرىنىڭ مۇددەلەرىن قورعاۋى قاجەت» دەگەن بولاتىن. وسى باعىتتا بۇگىن كاسىپوداقتار فەدەراتسياسىمەن ءوزارا ىنتىماقتاستىقتى ودان ءارى دامىتۋ تۋرالى كەلىسىم جاساستىق»، - دەدى باۋىرجان بايبەك.

ءوز كەزەگىندە فەدەراتسيا توراعاسى ەرالى توعجانوۆ كاسىپوداقتار جۇمىسىنا «Nur Otan» پارتياسى تاراپىنان جاسالىپ جاتقان جان-جاقتى قولداۋدىڭ ماڭىزدىلىعىنا توقتالدى.

«Nur Otan» – ءىستىڭ پارتياسى. حالىقتىڭ جاناشىرى بوپ وتىرعان ەڭ ءىرى، بەدەلدى پارتيا. وزدەرىڭىز بىلەسىزدەر، 2012 جىلدىڭ وزىندە ەلباسى نۇرسۇلتان نازارباەۆ ەڭبەك ادامىنا بايلانىستى ۇلكەن ماسەلەلەردى كوتەرگەن بولاتىن. سول سۇراقتاردىڭ بارلىعى بۇگىن دە كۇن تارتىبىندە تۇر» - دەدى ەرالى توعجانوۆ.

ايتا كەتەيىك، قازىرگى تاڭدا ەلىمىزدە 9 ميلليوننان استام ەڭبەك ادامى بار بولسا،  سولاردىڭ 2 ميلليوننان استامى قازاقستاننىڭ كاسىپوداقتار فەدەراتسياسىنا مۇشەلىكتە. ال كاسىپوداقتىڭ 600-دەن اسا ادامى «Nur Otan» پارتياسىنىڭ مۇشەسى ەكەن. سونداي-اق، كاسىپوداق ۇيىمدارىنىڭ وبلىستىق دەڭگەيدەگى 10 وكىلى، اۋداندىق جانە قالالىق دەڭگەيدەگى 16 وكىلى «Nur Otan» پارتياسى اتىنان ءماسليحات دەپۋتاتتارى بولىپ سايلانعان.

ال پارتيا جانىنداعى «Jas Otan» جاستار قاناتى مەن «كەلەشەك» كاسىپوداق جاستار كەڭەسىنىڭ بەلسەندىلەرى بۇگىنگى مەموراندۋمنان كەيىن قولعا الىناتىن بىرلەسكەن جوبالارعا بەلسەندى اتسالىسۋعا نيەتتى ەكەندىكتەرىن جەتكىزدى.

Abai.kz