قر پرەزيدەنتى قاسىم-جومارت توقاەۆتىڭ شەشىمىمەن بەردىبەك ساپارباەۆ جامبىل وبلىسىنىڭ اكىمى بولىپ تاعايىندالدى.  

بەردىبەك ماشبەكۇلى ساپارباەۆ جامبىل وبلىسىنىڭ اكىمى بولىپ تاعايىندالسىن، ول قازاقستان رەسپۋبليكاسى پرەمەر-ءمينيسترىنىڭ ورىنباسارى قىزمەتىنەن بوساتىلسىن ،- دەلىنگەن پرەزيدەنت جارلىعىندا.

ساپارباەۆ 2019 جىلدىڭ تامىزىنان بەرى قر پرەمەر-ءمينيستردىڭ ورىنباسارى  قىزمەتىن اتقارعان.

ال، وسىعان دەيىن اقوردا جامبىل وبلىسىنىڭ اكىمى اسقار مىرزاحمەتوۆتىڭ قىزمەتىنەن كەتكەنىن حابارلاعان بولاتىن.

ايتا كەتەيىك، بەردىبەك ساپارباەۆ مينيسترلەر كابينەتى اپپاراتىنىڭ باسشىسى، قىزىلوردا وبلىسىنىڭ اكىمى، وڭتۇستىك قازاقستان وبلىسىنىڭ اكىمى، كەدەندىك باقىلاۋ اگەنتتىگىنىڭ توراعاسى، قارجى ۆيتسە-ءمينيسترى قىزمەتتەرىن اتقارعان ەدى.

2009 جىلدىڭ 4 ناۋرىزىنان 2014 جىلدىڭ 11 قاراشاسىنا دەيىن شىعىس قازاقستان وبلىسىن باسقارعان. 2014 جىلى 11 قاراشادا قازاقستان پرەمەر-ءمينيسترىنىڭ ورىنباسارى بولىپ تاعايىندالعان. ال 2015 جىلى قىركۇيەكتە اقتوبە وبلىسىنىڭ اكىمى قىزمەتىنە كىرىسكەن.

2019 جىلى اقپاندا ەڭبەك جانە حالىقتى الەۋمەتتىك قورعاۋ ءمينيسترى بولىپ، بۇل قىزمەتتە جارتى جىلداي جۇمىس ىستەگەن.

Abai.kz