«قازاقستان رەسپۋبليكاسىندا بەيبىت جينالىستاردى ۇيىمداستىرۋ جانە وتكىزۋ ءتارتىبى تۋرالى» زاڭ جوباسىنىڭ تۇجىرىمداماسى قوعام تالقىلاۋىنا شىعارىلدى. بۇل تۋرالى قر اقپارات جانە قوعامدى دامۋ ءمينيسترى داۋرەن اباەۆ Facebook-تە جازدى.

«قۇرمەتتى دوستار! وزدەرىڭىزگە ءمالىم، مەملەكەت باسشىسى ۇلتتىق قوعامدىق سەنىم كەڭەسى وتىرىسىندا بەيبىت جينالىستار تۋرالى جاڭا زاڭ ازىرلەۋدى تاپسىردى. بۇگىن ءبىزدىڭ مينيسترلىك «اشىق ۇكىمەت» سايتىندا وسى نورماتيۆتىك-قۇقىقتىق اكت تۇجىرىمداماسىنىڭ جوباسىن ورنالاستىردى. كەلىپ تۇسكەن ۇسىنىستار مەن جەتەكشى حالىقارالىق تاجىريبەلەر نەگىزىندە بىرقاتار جاڭا ەنگىزىلىمدەر ۇسىنىلادى»، - دەدى مينيستر.

ەندى 10 جۇمىس كۇنى ىشىندە ءار ازامات ءوز ەسكەرتپەسى مەن تۇسىنىكتەمەسىن سايتتا قالدىرا الادى. ولار الداعى ۋاقىتتا قاراستىرىلاتىن بولادى.

«جۋرناليستەردى، ۇكىمەتتىك ەمەس سەكتوردىڭ وكىلدەرىن، ازاماتتىق بەلسەندىلەردى وسى جۇمىسقا قاتىسۋلارىڭىزدى سۇرايمىن»، - دەدى د.اباەۆ.

ايتا كەتەيىك، پرەزيدەنت ق.توقاەۆ 2019 جىلدىڭ قىركۇيەگىندە حالىققا جاريالاعان جولداۋىندا ميتينگتەر تۋرالى زاڭنامانى جەتىلدىرۋ قاجەتتىگىن اتاپ وتكەن بولاتىن.

«كونستيتۋتسياعا سايكەس ازاماتتارىمىزدىڭ ءوز ويىن ەركىن ايتۋعا قۇقىعى بار. ەگەر بەيبىت اكتسيالار زاڭنىڭ شەڭبەرىنەن شىقپايتىن جانە ازاماتتارىمىزدىڭ تىنىشتىعىن بۇزبايتىن بولسا، بۇعان تۇسىنىستىكپەن قاراپ، جيىنداردى وتكىزۋ ءۇشىن ارنايى ورىن ءبولۋ قاجەت. مۇنداي ورىندار قالانىڭ شەتىندە بولماۋى ءتيىس. الايدا، زاڭعا قايشى جانە بۇزاقىلىق ارەكەتتەرگە شاقىراتىن ۇندەۋلەرگە زاڭ شەڭبەرىندە توسقاۋىل قويىلادى»، - دەدى مەملەكەت باسشىسى.

ال وسى جىلدىڭ جەلتوقسانىندا وتكەن ۇلتتىق قوعامدىق سەنىم كەڭەسىنىڭ 2-وتىرىسىندا قازاقستان پرەزيدەنتى ەلىمىزدە ميتينگتەردى ۇيىمداستىرۋدىڭ الدىن الا ەسكەرتۋ ءپرينتسيپىن ەنگىزۋ كەرەكتىگىن مالىمدەدى.

«ميتينگتەردى ۇيىمداستىرۋدىڭ ەسكەرتۋ ءپرينتسيپىن ەنگىزۋگە كىرىسۋ كەرەك. ميتينگتەردى وتكىزۋگە بولادى، ەگەر دە ولار زاڭدى، قوعامدىق ءتارتىپتى بۇزباسا جانە ازاماتتاردىڭ تىنىشتىعىنا كەدەرگى كەلتىرمەسە. بۇل - مەنىڭ تۇبەگەيلى ۇستانىمىم»، - دەدى ق. توقاەۆ.

مەملەكەت باسشىسى اتاپ وتكەندەي، پرەزيدەنت جولداۋىن جۇزەگە اسىرۋ بويىنشا جوسپاردى ورىنداۋ اياسىندا «بەيبىت جيىندار تۋرالى» زاڭ جوباسى ازىرلەندى. وندا بەيبىت جيىنداردىڭ بارلىق فورمالارى ناقتى ايقىندالىپ، ارنايى ورىنداردى انىقتاۋ بويىنشا ءماسليحاتتار قۇزىرەتى بەكىتىلەدى. سونىمەن قاتار، «ۇيىمداستىرۋشىنىڭ مارتەبەسى»، «قاتىسۋشى مەن بايقاۋشى مارتەبەسى» تۇسىنىكتەرى، ولاردىڭ قۇقىقتارى مەن مىندەتتەرى قامتىلادى.

«بۇل تۇرعىدا قولدانىستاعى زاڭعا وزگەرىستەر ەمەس، كونتسەپتۋالدى جاڭا زاڭ تۋرالى ايتىلىپ وتىر. بۇل قۇجات بەيبىت جيىنداردىڭ بارلىق فورمالارىن ۇيىمداستىرۋ مەن وتكىزۋ ماسەلەلەرىن رەگلامەنتتەيدى. ۇكىمەت پارلامەنت قاراۋىنا زاڭ جوباسىن ەنگىزۋى كەرەك»، - دەدى قر پرەزيدەنتى.

Abai.kz