بۇعان دەيىن، 29 قاڭتاردان باستاپ اۆتوبۋس قاتىناسى، ال 1 اقپاننان باستاپ پويىز قاتىناسى ۋاقىتشا توقتاعان.
بۇعان قوسا قىتاي ازاماتتارىنا ۆيزا بەرۋ دە ۋاقىتشا توقتاتىلدى.
قازاقستانڭ دەنساۋلىق ساقتاۋ مينيسترلىگىنىڭ حابارلاۋىنشا, جەدەل رەسپيراتورلىق ۆيرۋستىق ينفەكتسيا (جرۆي) بەلگىسىمەن بارلىعى 80 ادام اۋرۋحاناعا، كوپشىلىكتەن وقشاۋ جاتقىزىلعان، ونىڭ 39-ى ساۋىعىپ شىقان. قازىر ستاتسيوناردا 41 ادام قالدى.
اۋرۋحاناعا جاتقىزىلعانداردىڭ بارلىعىنىڭ سىناماسى قوسىمشا باقىلاۋ ءۇشىن الماتىداعى ايقىمباەۆ اتىنداعى اسا قاۋىپتى جۇقپالى اۋرۋلار ۇلتتىق عىلىمي ورتالىعىنا جىبەرىلدى. "بۇل ورتالىق جاڭا كوروناۆيرۋستى پتر-دياگنوستيكالاۋ ادىستەمەسىن يگەرگەن" دەلىنگەن حابارلامادا.
ەلدە تەراپيا ءۇشىن قاجەتتى ءدارى-دارمەك پەن مەديتسينالىق بۇيىمدار بار، جۇقپالى اۋرۋحانالاردى وقشاۋلاۋعا ارنالعان بوكستار، ارنايى دارىگەرلىك جانە ورتا مەديتسينالىق پەرسونال دايىندالعان دەپ حابارلايدى مينيسترلىك. رەسمي اقپاراتپەن دەنساۋلىق ساقتاۋ مينيسترلىگىنىڭ Facebook پاراقشاسىنان تانىسۋعا جانە كەز كەلگەن سۇراق بويىنشا تاۋلىك بويى جۇمىس ىستەيتىن 1406 بايلانىس ورتالىعىنا قوڭىراۋ شالۋعا بولادى.
قىتايمەن شەكارالاس مەملەكەتتەردەن كەلگەن ازاماتتارعا مونيتورينگ جالعاسىپ جاتىر. 2020 جىلعى 6 قاڭتار مەن 2 اقپان ارالىعىندا قازاقستانعا وزگە ەلدەردەن 27 448 ادام كەلگەن.
ۋحاندا تاراعان ۆيرۋس جۇققاندار سانى بويىنشا 2002-2003 جىلى قىتايدى اۋرەگە سالعان SARS ۆيرۋسىنان دا اسىپ ءتۇستى. SARS ۆيرۋسىنان 600-دەن استام ادام ولگەن.
قازىر قىتايدا ءورشىپ تۇرعان ۆيرۋستىڭ بەلگىلەرى – ناۋقاس جوتەلىپ، دەنە قىزۋى كوتەرىلەدى. بۇدان بولەك، ۆيرۋستى جۇقتىرعان ادامنىڭ تىنىس الۋى قيىندايدى.
قىتاي ۆيرۋس العاش تىركەلگەن حۋبەي پروۆينتسياسىنداعى 17 قالانى جاۋىپ تاستادى.
اۆستراليا قىتايدا جۇرگەن 600 ازاماتىن الىپ كەتۋ جاعىن قاراستىرىپ جاتىر. ەۋروپا وداعى ەلدەرى، اقش، جاپونيا، ۇلىبريتانيا جانە سولتۇستىك كورەيا دا قىتايداعى ازاماتتارىن اكەتۋ شاراسىنا كىرىستى.
الەمدەگى اۋە كومپانيالارىنىڭ كوبى قىتايعا ۇشاتىن رەيستەرىن توقتاتىپ جاتىر. دۇنيەجۇزىلىك دەنساۋلىق ساقتاۋ ۇيىمى قازىر قىتايداعى ۆيرۋسقا بايلانىستى حالىقارالىق دەڭگەيدە توتەنشە جاعداي جاريالاۋ ماسەلەسىن تالقىلاپ جاتىر.
ۆيرۋس ۋحانداعى تەڭىز ونىمدەرى بازارىنان تاراعان. كەي اقپارات قۇرالدارىنىڭ جازۋىنشا، بازار 1 قاڭتاردا جابىلعانعا دەيىن وندا تەڭىز ونىمدەرى عانا ەمەس، جارقانات، تاۋىق، قويان مەن جىلان زاڭسىز ساۋدالانىپ كەلگەن. 22 قاڭتار كۇنى "مەديتسينالىق ۆيرۋسولوگيا" جۋرنالىندا زەرتتەۋ جاريالاعان عالىمدار "ۆيرۋستىڭ جىلاننان تاراعانىن" جازدى. مۇنى راستايتىن نە جوققا شىعاراتىن زەرتتەۋلەر ءالى جاريالانبادى.
Abai.kz
