نۇر-سۇلتاندا اۋا-رايىنىڭ قولايسىزدىعىنا بايلانىستى توتەنشە جاعداي رەجيمى جاريالاندى. بۇل تۋرالى قر ءىىم وكىلى مالىمدەدى.

"بىزدە نۇر-سۇلتان بويىنشا توتەنشە جاعداي جاريالاندى. ول ادىلەت باسقارماسىنىڭ تىركەۋىنەن ءوتتى، قازىرگى ۋاقىتتا التى وڭىردە تج كوميسسيالارىنىڭ وتىرىسى دايىندالىپ جاتىر. ءبىرىنشى كەزەكتە اقمولا، شىعىس قازاقستان، پاۆلودار وبلىستارى. ول جەرلەردە ەلدى مەكەندەرگە قاتىناۋ مۇمكىندىگىنىڭ قيىنداۋىنا بايلانىستى تج جاريالانادى.

تج جاريالاۋ سەبەبى - ءومىر ءسۇرۋ مۇمكىندىكتەرىنىڭ قيىنداۋى، ادامداردى تۇرعىلىقتى جەرىنە جانە جۇمىس ورنىنا دەر كەزىندە جەتكىزۋ، سونداي-اق ازىق-تۇلىكپەن جانە مەديتسينالىق قىزمەتپەن قامتاماسىز ەتۋ ماسەلەسى", - دەدى ىشكى ىستەر ءمينيسترىنىڭ ورىنباسارى يۋري يلين.

ال وسىعان دەيىن نۇر-سۇلتان قالاسى اكىمدىگى مەن قۇزىرلى ورگاندار قالا تۇرعىندارىنا ۇندەۋ جاريالاعان. نۇر-سۇلتان قالالىق پوليتسيا دەپارتامەنتىنىڭ باسشىسى ەرجان سادەنوۆ، تجد باسشىسى باۋىرجان سىزدىقوۆ جانە قالا اكىمىنىڭ ورىنباسارى التىنبەك قايساعاليەۆ جوو-لار مەن ورتا ءبىلىم مەكەمەلەرىندە ساباقتار وتپەيتىنىن حابارلاعان. ال بيزنەس-قۇرىلىمدار مەن جەكەلەگەنە ۇيىمدارعا، مەكەمەلەرگە جۇمىس كۇنىن قىسقارتۋدى، سونداي-اق قاۋىپسىزدىك ءۇشىن قوعامدىق كولىكتەرمەن ءجۇرۋدى، اسا مۇقتاجدىق بولماعان جاعدايدا ەشقايدا شىقپاۋدى سۇراعان.

Abai.kz