قازاقستان ءبىلىم بەرۋ بويىنشا ۇزدىك 73 ەلدىڭ ىشىندە 70-ءشى ورىن الدى. بۇل تۋرالى Ranking.kz جازدى.

سايت مالىمەتىنشە، 2019 جىلدىڭ ءۇشىنشى توقسانىندا ەلىمىزدە مەكتەپكە دەيىنگى ءبىلىم بەرۋ سالاسىندا 92,6 ملرد تەڭگەگە قىزمەت كورسەتىلگەن. ونىڭ 79,9%-ى بيۋدجەت قاراجاتى، 19,7%-ى اتا-انالاردىڭ اقشاسى، 0,4%-ى كاسىپورىنداردىڭ قاراجاتى.

سونداي-اق، ماماندار بۇل سالاداعى قىزمەتتەردىڭ تەڭ جارتىسى حالىق تىعىزدىعىمەن ەرەكشەلەنەتىن وڭتۇستىكتەگى 5 ايماقتا ورنالاسقان دەپ سانايدى. ولار:

تۇركىستان - 11,8 ملرد تەڭگە;

الماتى - 9,6 ملرد تەڭگە;

الماتى وبلىسى - 7,9 ملرد تەڭگە;

جامبىل وبلىسى - 7,7 ملرد تەڭگە;

نۇر-سۇلتان قالاسى - 7,5 ملرد تەڭگە جۇمساعان.

ءبىلىم ساپاسى بويىنشا رەيتينگ ءۇش كريتەري نەگىزىندە جاسالعان. ول - دامىعان مەملەكەتتىك ءبىلىم جۇيەسىنىڭ بولۋى، ەل ازاماتتارىنىڭ جوعارى ءبىلىم الۋىن جوسپارلاۋ جانە مەملەكەت ساپالى ءبىلىم بەرۋدى قامتاماسىز ەتەدى دەگەن سەنىمنىڭ بولۋى نەگىزگە الىنادى.

مۇندا العاشقى بەستىككە اقش، ۇلىبريتانيا، كانادا، گەرمانيا، فرانتسيا مەملەكەتتەرى كىرگەن. ال، قازاقستان 73 ەلدىڭ ىشىندە 70 ورىنعا تۇراقتاپ، ليۆان (69-ورىن) مەن ميانما (71-ورىن) اراسىندا ورنالاسقان.

سونداي-اق، قازاقستان بالا تاربيەسىنە قولايلى الەم ەلدەرىنىڭ رەيتينگىندە 73 ەلدىڭ ەڭ سوڭىندا قالدى. بۇل تىزىمدە دانيا، شۆەتسيا، نورۆەگيا، كانادا جانە نيدەرلاندى ەلدەرى كوش باستاپ تۇر. رەيتينگ بۇكىلالەمدىك ساۋالناما ارقىلى سەگىز سانات بويىنشا جاسالعان. ولار:

- ادام قۇقىعىن ساقتاۋ;

- وتباسىن قۇرمەتتەۋ;

- گەندەرلىك تەڭدىك;

- جالپى باقىت سەزىمى;

- ءادىل، تەڭ تابىس مۇمكىندىگى;

- قاۋىپسىزدىك;

- الدىڭعى قاتارلى ءبىلىم بەرۋ;

- دامىعان دەنساۋلىق ساقتاۋ جۇيەسى.

سونىمەن بىرگە، قازاقستاندا 18 ءىرى قالانىڭ 8-ىندە مەكتەپكە دەيىنگى مەكەمەلەردىڭ باعاسى كوتەرىلگەندىگى ايتىلادى.

Abai.kz