باسىلىمنىڭ مالىمەتىنە سەنسەك، جىلجىمايتىن مۇلىك جەنەۆا كانتونىنداعى كوللونج-بەلريۆ كوممۋناسىندا ورنالاسقان. جەر تەلىمى دينارا قۇلىباەۆا بىلتىر ساتىپ العان بەلريۆ سالتاناتتى سارايىنىڭ اۋماعىمەن شەكتەسىپ جاتىر. گازەتتىڭ اقپاراتىنا سەنسەك، 1,5 گەكتارداي بولاتىن جەردى قۇلىباەۆا موناكو رەزيدەنتى مارك سەرسوكتان ساتىپ العان.

17 عاسىردا سالىنعان بەلريۆ سارايى - ۇلتتىق ماڭىزى بار تاريحي نىسان. وتكەن جىلدىڭ ناۋرىزىندا بيلىكتەن كەتكەن ەكس-پرەزيدەنتتىڭ قىزى سارايدى دا ءدال سول قوجايىننان العان. شۆەيتساريا باسىلىمدارىنىڭ بىلتىرعى جازعاندارىنا سەنسەك، اعايىندى سەرسوكتار – بۇۇ-نىڭ بوسقىندار جونىندەگى بۇرىنعى جوعارى كوميسسارى سادرۋددين اگا-حاننىڭ مۇراگەرلەرى. ول بولسا مۇسىلمان-يسمايليتتەردىڭ يمامى، پرينتس اگا-حان ءىىى-ءتىڭ ۇلى. يەلەرى سارايدى 120 ميلليون فرانكقا ساتپاق بولعانىمەن، ۇزاق ۋاقىت الۋشى تابا الماعان. اقىر سوڭىندا ونى دينارا قۇلىباەۆاعا 62 ميلليون فرانكقا ساتقان. سول كەزدە ءباسپاسوز اعايىندى سەرسوكتاردىڭ جەنەۆا كانتونىنداعى ەكى جەر تەلىمىن ساتاتىنى تۋرالى دا حابارلاعان. امەريكالىق Forbes جۋرنالى 3,2 ميلليارد دوللار بايلىعى بار دەپ بولجاعان دينارا قۇلىباەۆا سول جەر تەلىمدەرىنىڭ ءبىرىن السا كەرەك.

2009 جىلى قۇلىباەۆا وسى ەلدەگى انەر كوممۋناسىندا شامامەن 75 ميلليون فرانكقا ۆيللا ساتىپ العان ەدى.

“اتامەكەن” ۇلتتىق كاسىپكەرلەر پالاتاسىنىڭ جانە مۇناي-گاز جانە ەنەرگەتيكا كەشەنى ۇيىمدارىنىڭ KAZENERGY قاۋىمداستىعىنىڭ باسشىسى قىزمەتىن اتقاراتىن كۇيەۋى – تيمۋر قۇلىباەۆپەن بىرگە بۇل جۇپ ورتالىق ازياداعى ەڭ باي اۋلەتتىڭ ءبىرى سانالادى. المەكس كومپانياسى ارقىلى بۇل وتباسى قازاقستانداعى ەڭ ءىرى بانك – حالىق بانككە قوجالىق ەتەدى. Forbes جۋرنالىنداعى ميللياردەرلەر تىزىمىندە قۇلىباەۆتار بىلتىر 715-ورىندى يەلەنگەن.

Abai.kz