«بىزدەگى قاپتاعان بۋكمەكەرلىك كەڭەسەلەردىڭ يەلەرى كىمدەر جانە ولار بيۋدجەتكە سالىق تولەپ جارىتىپ جاتىر ما؟» دەگەن ساۋال كوپشىلىكتى مازالايدى.

قولىنا ۇيالى تەلەفون ۇستاعان قازاق بالاسى ويىن بيزنەسىنىڭ ءبىر سالاسى بۋكمەكەرلىك ءباس تىگۋدىڭ جارناماسىنان ەش قاشىپ قۇتىلا المايتىن بولدى. ءبىر كەزدەرى گولوۆكينگە ءباس تىگىپ «اۆتوكولىك پەن باسپاناسىز قالعاندار» قانشاما. قانشا ايتقانمەن «سپورتقا ءباس تىگۋدىڭ» اسىعى الشىسىنان ءتۇسىپ تۇر. ءارى جارناماسى ءباس تىكپەسىڭە قويمايدى. بۋكمەكەرلەر قانشاما شاڭىراقتى قارجىلىق جاقتان جارعا جىعىپ تا ۇلگەردى. عالامتور مەن قالا كوشەلەرىندەگى ءباس تىگۋ جارنامالارى الەكەدەي جالاڭداپ وزىنە تارتادى.

كۇن سايىن قۇمارپازداردىڭ اۋجايىن جاقسى بىلەتىن ءتۇرلى دەڭگەيدەگى بۋكمەكەرلەر قالتالارىن  ميلليون ەمەس، كەرەك دەسەڭىز ميلليارد تەڭگەگە قامپيتىپ جاتقان جايى بار. تاياۋدا ەلىمىزدىڭ 8 ايماعىندا 10 ادامعا دەيىن قىزمەت ىستەيتىن “Finbet” بۋكمەكەرلىك كەڭسەلەرىنىڭ وفيستەرىنە ءتىنتۋ جۇرگىزىلدى. قارجىلىق مونيتورينگ بويىنشا كوميتەتتىڭ دەرەگىنە سۇيەنسەك اتالعان ۇيىم جىل سايىن ەڭ قۇرىعاندا 3 ميلليارد تەڭگە تابىس تاۋىپ وتىرعان. وسى كەڭسەلەردىڭ لاۋازىمدى تۇلعالارى ۇستالىپ، ۋاقىتشا تەرگەۋ ورنىنا قامالدى. 

الەكساندر جاريكوۆ جەتەكشىلىك ەتەتىن “فاۆوريت” جشس قاراستى “Finbet” بۋكمەكەرلىك كەڭسەلەرى ميلليارد تەڭگە تابىس تاۋىپ وتىرعانىنا قاراماستان شاعىن كاسىپورىن سانالادى. 

2011 جىلدان بەرى ءوز بيزنەسىن دوڭگەلەتىپ كەلە جاتقان “فاۆوريت” جشس 2017 جىلى 112,5 ميلليون تەڭگە سالىق تولەسە، 2018 بار جوعى 32 ميلليون تەڭگەنى ەل قازىناسىنا قۇيعان. ال، 2019 جىلى اۋزىن قۋ شوپپەن ءسۇرتىپ،  10 ميلليون تەڭگەنى سالىققا تولەپ اتىمتاي جومارتتىق جاساپتى. 

بۇل بىلىعى اشىلعان ءبىر عانا بۋكمەكەرلىك كەڭەسە. ال، جالعاندى جالپاعىنان باسىپ جۇرگەندەرى قانشاما.

بەتىمەن كەتكەن بۋكمەكەرلەردى اۋىزدىقتايتىن زاڭ كەرەك-اق!

ءابىل-سەرىك الىاكبار

Abai.kz