نارازى توپپەن جاڭاوزەن قالاسى اكىمى ماقسات يباعاروۆ، ماڭعىستاۋ وبلىستىق ەنەرگەتيكا جانە تۇرعىن ءۇي شارۋاشىلىعى باسقارماسى باستىعىنىڭ ورىنباسارى بەردىبەك قارتباەۆ پەن «قازاق گاز وڭدەۋ زاۋىتى» كومپانياسىنىڭ ديرەكتورى ناقبەرگەن تۇلەپوۆ كەزدەستى.

جينالعانداردىڭ اتىنان ءسوز العان قالا تۇرعىنى نۇرلىبەك نۇرعاليەۆ گاز باعاسىنىڭ 55 تەڭگەدەن 65 تەڭگەگە ءوسۋى حالىقتىڭ قالتاسىنا سالماق سالىپ وتىرعانىن ايتتى.

- گازدى ورتادا ساتىپ وتىرعان دەلدالدار اۋادان اقشا جاساپ وتىر. گاز باعاسىنىڭ كوتەرىلۋى كۇنىن ارەڭ كورىپ وتىرعان ەلدىڭ اشۋ-ىزاسىن تۋدىرىپ وتىر. بۇل ماسەلەنى اكىمدەر شەشە المايتىن بولعاندىقتان پرەمەر-مينيستر اسقار مامين مەن ەنەرگەتيكا ءمينيسترى نۇرلان نوعاەۆتىڭ جاڭاوزەنگە كەلۋىن تالاپ ەتەمىز. حالىقتان ۇلكەن ەمەس شىعار، - دەدى نۇرلىبەك نۇرعاليەۆ.

«قازاق گاز وڭدەۋ زاۋىتىنىڭ» ديرەكتورى ناقبەرگەن تۇلەپوۆ جينالعاندارمەن كەزدەسۋدە وندىرىلگەن گاز ەلەكتروندى ساۋدا الاڭىندا ساتىلعانعا دەيىن بىرنەشە دەلدال ارقىلى جەتكىزىلىپ كەلگەنىن ايتتى. ال ەلەكتروندى ساۋدا الاڭىنا شىعارىلعان گازدى كەز كەلگەن جەكە كاسىپكەر ساتىپ الىپ، قايتا ساتىلىمعا شىعارادى.

جاڭاوزەن قالاسى اكىمى ماقسات يباعاروۆ Instagram پاراقشاسىنا گاز ماسەلەسى بويىنشا جەكە كاسىپكەرلەرمەن كەزدەسكەنىن جازىپ، قالاعا بولىنگەن گازدى 55 تەڭگەدەن ساتۋ تۋرالى شەشىم قابىلدانعانىن حابارلادى.

ماڭعىستاۋ وبلىسىندا سۇيىتىلعان گازدىڭ جالعىز ءوندىرۋشىسى - 1973 جىلى سالىنعان «قازاق گاز وڭدەۋ زاۋىتى». زاۋىت اي سايىن 14-14,5 مىڭ توننا گاز وندىرەدى. ايماقتا گازعا سۇرانىس – 17 مىڭ توننا. ەنەرگەتيكا مينيسترلىگى جەتپەگەن گاز كولەمىن «اقتوبەمۇنايگاز-سنپس» اكتسيونەرلىك قوعامى ەسەبىنەن جاۋىپ كەلەدى. بىراق ءىس جۇزىندە ءبارى جەتكىلىكتى كورىنگەنىمەن، گازدىڭ باعاسى بىرنەشە جىلدان بەرى تۇراقتالماي كەلەدى. 2011 جىلدارى ايماقتا گاز باعاسى 30-35 تەڭگە بولاتىن. ودان كەيىن دە جاڭاوزەندە گاز باعاسى بىرنەشە رەت وسكەن.

Abai.kz