قر پرەمەر-ءمينيسترىنىڭ ورىنباسارى بەردىبەك ساپارباەۆ، قر پارلامەنتى سەناتىنىڭ ءتورايىمى داريعا نازارباەۆانىڭ توراعالىعىمەن كوميسسيا س. تورايعىروۆ اتىنداعى پاۆلودار مەملەكەتتىك ۋنيۆەرسيتەتىنىڭ رەكتورى لاۋازىمىنا مەيرام مۇحامەتراقىمۇلى بەگەنتاەۆتى تاعايىنداۋعا ۇسىندى. 

جوعارى وقۋ ورنىنىڭ ءبىرىنشى جەتەكشىسىن قر بجعم جوعارى جانە جوعارى وقۋ ورنىنان كەيىنگى ءبىلىم بەرۋ دەپارتامەنتىنىڭ ديرەكتورى ەرجان ىرگەباەۆ تانىستىردى. 

مەيرام مۇحامەتراقىمۇلى ءار جىلدارى جاۋاپتى جەتەكشىلىك لاۋازىمداردا قىزمەت ەتتى. س. تورايعىروۆ اتىنداعى پمۋ ستراتەگيالىق جوسپارلاۋ، الەۋمەتتىك جانە تاربيە ءىسى جونىندەگى پرورەكتور قىزمەتىن اتقاردى. 2012-2016 جىلدارى قر پارلامەنتى ءماجىلىسىنىڭ دەپۋتاتى بولدى. ول، سونىمەن قاتار، پاۆلودار وبلىسى اكىمىنىڭ ورىنباسارى قىزمەتىن اتقاردى. 

2019 جىلدىڭ ءساۋىر-جەلتوقسان ايلارى ارالىعىندا س. تورايعىروۆ اتىنداعى پمۋ رەكتورىنىڭ مىندەتىن اتقاردى. 

ەرجان ىرگەباەۆ ۋنيۆەرسيتەتتىڭ دامۋ باعدارلاماسى جانە الداعى ۋاقىتقا مەجەلەنگەن ماقساتتارى ەلىمىزدەگى وقۋ ورىندارىنا ۇلگى ەكەنىن ايتتى.

Abai.kz