پرەزيدەنت قاسىم-جومارت توقاەۆ س. سەيفۋللين اتىنداعى قازاق اگروتەحنيكالىق ۋنيۆەرسيتەتىنە باردى.

مەملەكەت باسشىسى وقۋ ورنىنىڭ ءبىلىم بەرۋ جانە عىلىم-زەرتتەۋ جۇمىستارىمەن تانىستى، سونداي-اق، وقىتۋشىلارمەن، ستۋدەنتتەرمەن اڭگىمەلەستى.

ۋنيۆەرسيتەت رەكتورى اقىلبەك كۇرىشباەۆ پرەزيدەنتكە مولەكۋليارلىق بيولوگيا مەن گەندىك ينجەنەريانىڭ زاماناۋي ادىستەرىن پايدالانا وتىرىپ شىعارىلعان اۋىل شارۋاشىلىعى داقىلدارىنىڭ جاڭا سورتتارىن كورسەتتى. 5 جىل ىشىندە جوعارى وقۋ ورنىنىڭ عالىمدارى بيداي مەن ارپانىڭ قۇرعاقشىلىققا ءتوزىمدى جاڭا سورتتارىن شىعاردى.

قاسىم-جومارت توقاەۆقا بيوورگانيكالىق تىڭايتقىشتار ءوندىرۋ ۇدەرىسىندەگى  جاڭا تەحنولوگيانىڭ قولدانىلۋى، ۆەتەريناريا جۇيەسىنىڭ تسيفرلاندىرىلۋى، جانۋارلاردى ەسەپكە الۋ ۇدەرىسى جايىندا مالىمەت بەرىلدى.

مەملەكەت باسشىسى جەردى پايدالانۋ پروتسەسىن باقىلاۋعا مۇمكىندىك بەرەتىن عارىشتان مونيتورينگ جاساۋدىڭ جانە جەردى قاشىقتىقتان زوندتاۋدىڭ زاماناۋي ادىستەرىمەن تانىستى. اتالعان ادىستەر اقتوبە جانە اقمولا وبلىستارىندا قولدانىلۋدا. پرەزيدەنت مۇنداي تاجىريبەنى وزگە وڭىرلەردە دە پايدالانۋ قاجەت دەپ سانايدى.

سونىمەن قاتار، قاسىم-جومارت توقاەۆقا  ۋنيۆەرسيتەتتىڭ الەمدەگى جەتەكشى عىلىم جانە ءبىلىم بەرۋ ورتالىقتارىمەن بايلانىستارى تۋرالى باياندالدى. اقىلبەك كۇرىشباەۆتىڭ ايتۋىنشا، فرانتسيانىڭ AgroParisTech ۋنيۆەرسيتەتىمەن بىرلەسە ازىرلەنگەن، قوس ديپلومدىق ءبىلىم بەرۋ جۇيەسىنە كوشۋگە مۇمكىندىك بەرەتىن جول كارتاسىنىڭ ىسكە اسىرىلۋى قازاق اگروتەحنيكالىق ۋنيۆەرسيتەتىنىڭ حالىقارالىق ىنتىماقتاستىعىنداعى نەگىزگى باعىتتاردىڭ ءبىرى.

ستۋدەنتتەرمەن اڭگىمەلەسۋ بارىسىندا قازاقستان پرەزيدەنتى وزىق تەحنولوگيالاردى قولدانۋدىڭ وزەكتىلىگىن اتاپ ءوتتى.

– سىزدەر وتە ماڭىزدى جۇمىسپەن اينالىسىپ جاتىرسىزدار. روبوت تەحنيكاسى، تسيفرلاندىرۋ جانە جاساندى ينتەللەكت – قازىرگى زامان تالابى، اسىرەسە،  دامىعان ەلدەردە. سوندىقتان بىزگە ارتتا قالىپ قويۋعا مۇلدەم بولمايدى. جاقسى وقىساڭىزدار، سىزدەر دە مىندەتتى تۇردە كەلەشەكتە ءوز ورىندارىڭىزدى تاباسىزدار. ويتكەنى بىزگە جەكە سەكتوردا دا، مەملەكەتتىك سەكتوردا دا بىلىكتى ماماندار قاجەت، – دەدى مەملەكەت باسشىسى.

ستۋدەنتتەر پرەزيدەنتكە قولداۋ كورسەتكەنى جانە 2020 جىلدىڭ قاڭتارىنان باستاپ شاكىرتاقى كولەمىن 25 پايىزعا ارتتىرۋ جونىندەگى تاپسىرماسى ءۇشىن العىس ايتتى.

Abai.kz