قازاقستان 2020 جىلى دۋبايدا وتەتىن ەكسپو كورمەسىنە قاتىسۋعا 9 ميلليارد تەڭگە جۇمسايدى. بۇل تۋرالى بۇگىن وكق-دا وتكەن ءباسپاسوز كونفەرەنتسياسىندا قر ساۋدا جانە ينتەگراتسيا ءمينيسترى باقىت سۇلتانوۆ مالىمدەدى، دەپ حابارلايدى Tengrinews سايتى. 

- ءبىزدىڭ پاۆيلونىمىزدى دايىنداۋ بويىنشا جۇمىستار جۇرگىزىلدى. وعان بيۋدجەتتەن شامامەن 9 ميلليارد تەڭگە بولىنگەن بولاتىن. بۇل پاۆيلون بولشەكتەنىپ، قازاقستانعا سول قاراجات ەسەبىنەن جەتكىزىلەدى. ودان ءارى ءبىزدىڭ ونىمدەرىمىز ەلوردا مەن وزگە ايماق يگىلىگى ءۇشىن پايدالانىلادى, - دەدى مينيستر.

بۇعان دەيىن دۋبايداعى ەكسپو-2020 كورمەسىندە قازاقستاندىق پاۆيلوندى سالۋ ءۇشىن اۋماعى 3420 شارشى مەتردى قۇرايتىن ەڭ ءىرى ۋچاسكەلەردىڭ ءبىرى بەرىلگەنى حابارلانعان بولاتىن.

ايتا كەتەيىك، Expo 2020 - دۋباي قالاسىندا ء(باا) وتەتىن بۇكىلالەمدىك كورمە. كورمەنى وتكىزۋ ورنى 2013 جىلعى 27 قاراشادا پاريجدە حالىقارالىق كورمە بيۋروسىنىڭ باس اسسامبلەياسىندا انىقتالدى. كورمە 2020 جىلدىڭ 20 قازانىنان 2021 جىلدىڭ 10 ساۋىرىنە دەيىن وتەدى.

ال 2017 جىلى سول ەكسپو كورمەسى استانادا وتكەن. 10 ماۋسىم مەن 10 قىركۇيەك ارالىعىندا وتكەن كورمەگە 115 ەل مەملەكەت پەن 22 حالىقارالىق ۇيىم قاتىسقان. كورمەنى 4 ميلليونعا جۋىق ادام تاماشالاعان.

استانادا ەكسپو كورمەسىن وتكىزۋ ءۇشىن رەسپۋبليكالىق بيۋدجەتتەن 2,1 ميلليارد دوللار جۇمسالعان. ەكسپو قۇرىلىسى كەزىندە بىرنەشە جاۋاپتى شەندى قىلمىستىق جاۋاپكەرشىلىككە تارتىلعان. سونىڭ ىشىندە "استانا ەكسپو-2017" كومپانياسىن باسقارعان تالعات ەرمەگياەۆقا "بيۋدجەت قارجىسىن جىمقىردى" دەگەن ايىپ تاعىلىپ، 14 جىلعا سوتتالعان.

ال شەتەلدىك جۋرناليست دجەيمس پالمەر: "استانا ەكسپو-2017 كورمەسى ەلدەگى ەكونوميكالىق داعدارىس كەزىندە ۇيىمداستىرىلعان پايداسىز يميدجدىك جوبا" دەپ سىناعان.

Abai.kz