وتكەندە، 13 جەلتوقسان كۇنى ەسىم-سويى الەم حالقىنا بەلگىلى فۋتبولشى مەسۋت ءوزىل ءوزىنىڭ «تۆيتتەر» جەلىسىندەگى جەكە پاراقشاسىندا قىتايداعى از ۇلتتارعا، ونىڭ ىشىندە مۇسىلماندارعا جاسالىپ جاتقان قۋدالاۋدى ايىپتاپ، جازبا جاريالاعان ەدى.

تەگى تۇرىك فۋتبولشى «تۆيتتەردە»: «ولار قۇراندى جويىپ جاتىر. ولار مەشىتتەردى جاۋىپ جاتىر. مەدرەسەلەرگە تىيىم سالۋدا. قۇدايشىلداردى بىرتىندەپ ولتىرۋدە. ەركەكتەردى كۇشتەپ لاگەرلەرگە جاۋىپ، ولاردىڭ وتباسىلارىن قىتاي ەركەكتەرىمەن الماستىرۋدا. قىزداردى كۇشتەپ قىتايلارعا كۇيەۋگە بەرىپ جاتىر»، دەپ جازدى.

اعىلشىندىق «ارسەنالدىڭ» ويىنشىسى مەسۋت ءوزىلدىڭ بۇل جازباسىن دۇنيە حالقى ءسوز ەتتى. جازباسىن قىزۋ تالقى قىلدى. ءوزىلدىڭ جازعاندارىنا قاتىستى پىكىرلەر دە ءارالۋان. قولداعاندار دا، كەرىسىنشە نارازىلىق ايتقاندار دا بولدى.

وسىدان كەيىن، قىتاي بيلىگى «ارسەنال» - «مەنچەستەر سيتي» ويىنىن ەل اۋماعىندا كورسەتپەيتىن بولدى. وعان قوسا، مەسۋت ءوزىلدىڭ الەۋمەتتىك جەلى اككاۋنتتارىن قىتاي تەرريتورياسىندا بۇعاتتاعان. قىتاي ءسىم وكىلدەرى مەسۋت ءوزىلدى شىڭجاڭداعى جاعدايدى ءوز كوزىمەن كەلىپ كورۋگە شاقىرعان.

ال اقش مەملەكەتتىك حاتشىسى مەيك پومپەو «تۆيتتەردەگى» پاراقشاسىندا «ارسەنال» ويىنشىسىنا قولداۋ ءبىلدىرىپ جازبا جاريالادى.

«قىتاي كوممۋنيستىك پارتياسىنىڭ پروپوگاندالىق ارنالارى ءوزىل مەن «ارسەنال» ويىنىن بۇكىل ماۋسىم بويى بۇعاتتاۋى مۇمكىن. بىراق ادىلەت (شىندىق) ءتۇبى سالتانات قۇرادى. كومپارتيا الەم حالقىنان ۇيعىرلار مەن باسقا دا ءدىني كونفەسسيا وكىلدەرىنە قارسى جاسالىپ جاتقان ادام قۇقىقتارىن بۇزۋشىلىقتى جاسىرىپ قالا المايدى»، دەپ جازدى اقش مەملەكەتتىك حاتشىسى.

Abai.kz