ۆيتسە-پرەمەر بەردىبەك ساپارباەۆ باستاعان ۇكىمەتتىڭ جۇمىس توبى جاڭاوزەن قالاسىنداعى بىرقاتار الەۋمەتتىك ماڭىزى بار نىسانداردى ارالادى. الدىمەن، قالاداعى وندىرىستىك الاڭنىڭ جۇمىسىمەن تانىستى. 30 گەكتار اۋماقتى الاتىن تەحنوپاركتىڭ نەگىزگى مىندەتى ءونىم ءوندىرۋ سالاسىنداعى جۇمىس جاسايتىن كاسىپكەرلەردى ءبىر جەرگە ورنالاستىرۋ.

وسى ۋاقىتقا دەيىن الاڭعا ىشكى جانە سىرتقى ينجەنەرلىك جەلىلەر تارتىلىپ، اكىمشىلىك عيماراتى مەن انگار سالىنىپ، بولىنگەن قاراجات تولىعىمەن يگەرىلگەن.

قازىرگى تاڭدا، جاڭاوزەن قالاسى اكىمدىگى جانە "اتامەكەن كاسىپكەرلەر پالاتاسى" اراسىندا جۇمىس توبى قۇرىلىپ، "بيزنەستىڭ جول كارتاسى - 2020" بيزنەستى قولداۋ جانە دامىتۋدىڭ بىرىڭعاي باعدارلاماسى اياسىندا وندىرىستىك الاڭنان كاسىپكەرلەرگە جەر ۋچاسكەلەرىن وڭىرلىك ۇيلەستىرۋ كوميسسياسى ارقىلى ءبولۋ جۇمىستارى تالقىلانۋدا.

بۇگىنگى كۇنگە دەيىن وندىرىستىك الاڭعا ورنالاسۋ بويىنشا 37 كاسىپكەردەن ۇسىنىس تۇسكەن. ونىڭ ىشىندە جيھاز وندىرەتىن تسەح، تىگىن شەبەرحاناسى، قاعاز، پوليەتيلەن پاكەتىن ءوندىرۋ جانە ت.ب. بار.

مۇنان سوڭ جۇمىس توبى قالاداعى مەديتسينالىق ورتالىقتىڭ قۇرىلىسىمەن تانىستى. وسىعان دەيىن «قازمۇنايگاز ينجينيرينگ» جشس قاراستى «قازنيپيمۋنايگاز»، «وزەنمۇنايگاز» اق، ماڭعىستاۋ وبلىستىق دەنساۋلىق ساقتاۋ باسقارماسى وكىلدەرىنىڭ  قاتىسۋىمەن ارنايى كوميسسيا وتىرىسى ءوتىپ، وندا مەديتسينالىق ورتالىق قۇرىلىسىن جانداندىرۋ ماقساتىندا اتقارىلاتىن شارالار لەگى تالقىلانعان بولاتىن. ورتالىق قۇرىلىسىن كەزەڭ-كەزەڭىمەن جۇرگىزۋ شارالارىنا ناقتى مەرزىم بەكىتىلىپ، مەديتسينالىق ورتالىق قۇرىلىسىن 2020 جىلى پايدالانۋعا بەرۋ تۋرالى تاپسىرما بەرىلدى.

سونىمەن قاتار، كاسىپكەرلەرگە قىزمەت كورسەتۋ ورتالىعىنا دا باردى. وندا «اتامەكەن» ۇلتتىق كاسىپكەرلەر پالاتاسىنىڭ جاڭاوزەن قالاسىنداعى فيليالىنىڭ، ونداعى وزىنە-ءوزى قىزمەت كورسەتۋ ايماعىنىڭ، قىزمەتكەرلەرىنىڭ جۇمىس بارىسىمەن تانىستى.

وسىعان دەيىن جاڭاوزەن قالاسىنا قر «اتامەكەن» ۇلتتىق كاسىپكەرلەر پالاتاسىنىڭ باسقارما توراعاسى ابىلاي مىرزاحمەتوۆپەن بىرگە جۇمىس توبى كەلگەن بولاتىن. جۇمىس توبى 2 اپتا بويى جاڭاوزەن قالاسىنداعى كاسىپكەر ماماندارمەن كەزدەستى. ارنايى نۇر-سۇلتان قالاسىنان كەلگەن ماماندار جەكە جانە زاڭدى تۇلعالاردى اقپاراتتاندىرىپ، قالالىق كاسىپكەرلىك جانە اۋىل شارۋاشىلىق ءبولىمىنىڭ ماماندارىمەن بىرلەسە وتىرىپ كاسىپكەرلىك سالاسىنداعى ماسەلەلەردى، ونىڭ شەشۋ جولدارىن قاراستىرىپ، كاسىپكەرلەرگە قىزمەت كورسەتتى.

قازىرگى تاڭدا جاڭاوزەن قالاسىندا 7 قازاندا باستالعان «كاسىپ ءتۇبى-ءناسىپ» جوباسى ناتيجەلى جۇزەگە اسىرىلۋدا. بۇگىنگى كۇنگە دەيىن جوبانىڭ جۇمىس توبى 500-گە جۋىق ادامعا كەڭەس بەردى. ونىڭ 15% قارجى قىزمەتتەرى بويىنشا، 10%- ماركەتينگتىك، 10% قۇقىقتىق كەڭەس بەرۋ ت.ب.قۇرايدى.

جاڭاوزەن قالاسىندا جۇمىسسىزدىقتى بولدىرماۋ ماقساتىندا كاسىپورىندارمەن بىرلەسىپ 5 وقۋ كۋرسى اشىلدى. ولاردا نارىققا قاجەتتى تىگىن، اۆتوەلەكتريك، روبوتوتەحنيك، گازەلەكتر دانەكەرلەۋشى، كران جۇرگىزۋشىسى ماماندارى وقىتىلاتىن بولادى.

جوبا اياسىندا "باستاۋ بيزنەس" بويىنشا 140 ادام وقىتىلدى. "باستا"  الاڭىندا تابىستى كاسىپكەرلەر 300-دەي ادامعا كاسىپ سىرىن ۇيرەتتى. ميكرو قارجى ۇيىمىنىڭ كەڭەسشىلەرى 70 ادامعا كەڭەس بەرىپ، ناقتى 4 ادامنىڭ كاسىپ اشۋىنا نەسيەگە قۇجات جيناقتادى. مەملەكەتتىك ساتىپ الۋلار بويىنشا 50 كاسىپكەرگە ارنالعان ترەنينگ ۇيىمداستىرىلدى.

ۇكىمەت مۇشەلەرى ارنايى بارعان تاعى ءبىر نىسان جاڭاوزەن قالاسىنا قاراستى راحات اۋىلىندا «جاقسى» سپورت كەشەنى. اۋماعى 2000 شارشى مەتردى قۇرايتىن كەشەن اۋىل بالالارىنىڭ سپورتپەن شۇعىلدانۋى مۇمكىندىك بەرىلىپ، ءار ءتۇرلى سپورت سەكتسيالارى ەسىگىن ايقارا اشتى. سپورت كەشەنىندە قازىرگى تاڭدا بوكس، ەركىن كۇرەس، كاراتە-دو، دزيۋدو، شاعىن فۋتبول جانە اۋىر اتلەتيكا سياقتى باسقا دا تۇرلەرى قامتىلعان. جاستاردى جاتتىقتىرۋعا 25 باپكەر جۇمىسقا قابىلدانعان.

Abai.kz