پارلامەنت سەناتى توراعاسىنىڭ ورىنباسارى اسقار شاكىروۆ جانە ءبىر توپ سەناتورلار قازان كرەملىندە تاتارستان رەسپۋبليكاسىنىڭ پرەزيدەنتى رۋستام ميننيحانوۆپەن كەزدەستى.

كەزدەسۋگە سونداي-اق رەسەي فەدەراتسياسى فەدەرالدىق جينالىسى فەدەراتسيا كەڭەسى اراسىنداعى ىنتىماقتاستىق جونىندەگى كوميسسيانىڭ تەڭ توراعاسى يلياس ۋماحانوۆ، تاتارستان رەسپۋبليكاسى مەملەكەتتىك كەڭەسىنىڭ توراعاسى فاريد مۇحامەتشين، سەناتورلار مۇحتار قۇل-مۇحاممەد، ولگا پەرەپەچينا، تالعات مۇساباەۆ، ۆلاديمير ۆولكوۆ تا قاتىستى.

تاتارستان پرەزيدەنتى كەزدەسۋدى اشا وتىرىپ ەكى ەل اراسىنداعى ىنتىماقتاستىقتى پارلامەنتارالىق دەڭگەيدە دامىتۋ وتە ماڭىزدى ەكەنىن اتاپ ءوتتى.

ا.شاكىروۆ ءوز كەزەگىندە قازاقستان رەسەي فەدەراتسياسىنىڭ جەتەكشى ءارى ەكونوميكالىق دامىعان سۋبەكتىلەرىنىڭ ءبىرى بولىپ تابىلاتىن تاتارستان رەسپۋبليكاسىمەن ىنتىماقتاستىقتى قارقىندى دامىتۋعا مۇددەلى ەكەنىن اتاپ ءوتتى. «ءبىزدىڭ حالىقتارىمىزدى تاريحي جانە مادەني تامىرلاستىق بايلانىستىرادى. بۇگىندە قازاقستاننىڭ تاتارستانمەن قارىم-قاتىناسى بارلىق سالادا جوعارى دەڭگەيدە دامىپ كەلە جاتقانىن كورسەتەدى»، - دەدى توراعا ورىنباسارى.

كەزدەسۋ بارىسىندا توقتاپ قالعان نۇر-سۇلتان-قازان تىكەلەي اۋە باعىتىن اشۋ، ەكى جاقتى تاۋار اينالىمىن ودان ءارى دامىتۋ، عىلىم مەن ءبىلىم سالاسىنداعى ىنتىماقتاستىقتى كەڭەيتۋ ماسەلەلەرى تالقىلاندى. بۇگىندە تاتارستاننىڭ جوعارى وقۋ ورىندارىندا 1300-دەن استام قازاقستاندىق ستۋدەنتتەر ءبىلىم الۋدا.

Abai.kz