قىزىلوردا وبلىسىنىڭ اكىمى ق.ىسقاقوۆ باستاپ، قالا اكىمى مەن وبلىستىق ءماسليحات حاتشىسى، «Nur Otan» پارتياسى وبلىستىق فيليالى توراعاسىنىڭ ءبىرىنشى ورىنباسارى جانە وبلىس اكىمىنىڭ ورىنباسارلارى، وبلىس اكىمى اپپاراتىنىڭ باسشىسى "قۇمكول-قىزىلوردا" اۆتوجولىندا ورىن العان جول كولىك وقيعاسى سالدارىنان زارداپ شەككەن ازاماتتاردىڭ جاعدايىن ءبىلۋ ءۇشىن وبلىستىق مەديتسينالىق ورتالىعى مەن قالالىق اۋرۋحاناعا باردى.

سونداي-اق، قۇقىق بۇزۋشىلىق پروفيلاكتيكاسى جونىندەگى ۆەدومستۆوارالىق كوميسسيانىڭ كەزەكتەن تىس جەدەل وتىرىسىن وتكىزىپ، ءتيىستى سالا باسشىلارىنا تاپسىرما بەردى.

«سوڭعى بولعان جول كولىك وقيعاسىنا  مەملەكەت باسشىسى تاراپىنان دا نازار اۋدارىلىپ، پوليتسيا مەن جەرگىلىكتى اتقارۋشى ورگانداردىڭ قۇقىق بۇزۋشىلىق پروفيلاكتيكا جۇمىستارىنا قاتىستى ەسكەرتپەلەر ايتىلدى. پوليتسيا دەپارتامەنتى تاراپىنان بەرىلگەن ۇسىنىستارعا بارىنشا قولداۋ كورسەتىلىپ كەلەدى. ءتيىستى قارجى ءبولىنىپ، ماتەريالدىق - تەحنيكالىق بازالارىڭىز جىل سايىن جاڭارتىلۋدا. الايدا ناتيجە جوق. جۇمىس وسى قارقىندا قالاتىن بولسا، قر ىشكى ىستەر مينسترلىگىنە پوليتسيا دەپارتامەنتىنىڭ جاۋاپتى باسشىلارىنىڭ اتقارىپ وتىرعان لاۋازىمدارىنا سايكەستىگى جونىندە ۇسىنىس بەرەتىن بولامىن.»، - دەدى وبلىس اكىمى ق.ىسقاقوۆ.

ايماق باسشىسى كولىك اپاتىنان قازا تاپقان ازاماتتاردىڭ جاقىندارىنا كوڭىل ايتىپ، تۇركىستان وبلىسى مەن شىمكەنت قالاسىنىڭ اكىمدەرىنە جەدەل حات جولدادى.

«جاراقات العان ازاماتتارعا ءبىزدىڭ تاراپىمىزدان قاجەتتى كومەك كورسەتىلەتىن بولادى. ەمدەۋ شارالارى تولىقتاي جاسالادى. ەمدەلۋشىلەردىڭ تەز ساۋىعىپ، وتباستارىنا امان-ەسەن ورالۋلارىنا تىلەكتەسپىن.» - دەدى وبلىس اكىمى ق.ىسقاقوۆ.

وبلىستىق كوپبەيىندى اۋرۋحاناسىنا 17 ازامات ءتۇرلى دەنە جاراقاتىمەن جەتكىزىلىپ، ونىڭ ىشىندە 6 ادام جانساقتاۋ بولىمىنە ورنالاستىرىلدى. 5 ادامعا قاجەتتى ەم شارالارى كورسەتىلىپ، ۇيىنە قايتارىلعان. قالالىق اۋرۋحاناعا 4 ادام جەتكىزىلىپ، ونىڭ 2 جانساقتاۋ بولىمىندە. قازىر ولارعا ءتيىستى مەديتسينالىق كومەك كورسەتىلۋدە، قاجەتتى ءدارى-دارمەك تولىعىمەن قامتاماسىز ەتىلگەن.

ايتا كەتۋ كەرەك، وقيعا ورنىنا دەر كەزىندە توتەنشە جاعدايلار دەپارتمەنتى، جول-پاترۋلدىك قىزمەتى، مەديتسينالىق ورتالىق، جەدەل-جاردەم جانە سانيتارلىق اۆياتسيا قىزمەتكەرلەرى مەن قاجەتتى تەحنيكا جۇمىلدىرىلدى.

Abai.kz