26 قاراشا كۇنى الماتى قالاسىندا Junior Eurovision بايقاۋىندا ەكىنشى ورىن يەگەرى اتانعان  قازاقستاننىڭ وكىلى ەرجان ماكسيمنىڭ قاتىسۋىمەن ءباسپاسوز وتىرىسى ءوتتى. ءباسپاسوز وتىرىسىنا ەرجان ماكسيم، ونىڭ اناسى گۇلميرا الىبەك، سونداي-اق، «حابار» تەلەارناسىنىڭ ديرەكتورى دينارا بيسەمبينا قاتىستى. 

ەسكە سالا كەتەيىك، ءانشى بايقاۋدىڭ اقتىق مارەسىندە «ارمانىڭنان قالما!»  («Don’t forsake your dream») ءانىن ورىنداعان بولاتىن. تورەشىلەر مەن كورەرمەندەردىڭ داۋىس بەرۋ ناتيجەسى بويىنشا ەرجان ماكسيم 227 بالل جينادى. ءبىرىنشى ورىن پولشا ەلىنىڭ وكىلى ۆيكتوريا گابورعا (278 بالل) بۇيىردى. ءۇشىنشى ورىندى يسپانيا ەلىنەن كەلگەن مەلاني گارسيا (212 بالل) يەلەندى.

«ارمانىڭنان قالما!»  ءانىنىڭ اۆتورلارى حاميت شانعاليەۆ، دانيار الدابەرگەنوۆ جانە تيمۋر بالىمبەتوۆ. ساحنالىق قويىلىمى مەن بەينەبايانىنىڭ پروديۋسەرى – سەرگەي رۋتسكي مەن الەكساندر فلومبويم. 

«حابار» اگەنتتىگى ەۋروپالىق حابار تاراتۋ وداعىنىڭ (EBU) قاۋىمداسقان مۇشەسى بولىپ تابىلادى، بۇل مۇشەلىك بالالار ەۆروۆيدەنيەسى بايقاۋىنا ەلدەن ەكىنشى مارتە ۇمىتكەر ۇسىنۋعا مۇمكىندىك بەردى. ەلىمىزدىڭ العاش رەت قاتىسۋى وتە ءساتتى بولدى، ال بيىلعى جىلى ءبىزدىڭ ەرجان ماكسيم 19 ەلدىڭ ىشىنەن ەكىنشى ورىندى الا الدى، ايتا كەتۋ كەرەك، ول كاسىبي تورەشىلەردىڭ داۋىس بەرۋ ناتيجەلەرى بويىنشا ەڭ ۇزدىك بولىپ تانىلدى. اگەنتتىكپەن ۇلكەن دايىندىق جۇمىستارى اتقارىلدى،ەلىمىز بويىنشا مۇمكىن بولعان بارلىق الاڭدارىندا ۇگىت-نايسحات جۇمىستارى جۇرگىزىلدى. TRT, وزبەكستان جانە قىرعىزستان تەلەارنالارى ءبىزدى قولدادى. وسى ورايدا ءبىز بارشاڭىزعا زور العىس بىلدىرگىمىز كەلەدى»،- دەدى «حابار» تەلەارناسىنىڭ ديرەكتورى دينارا بيسەمبينا ءباسپاسوز وتىرىسىندا.

«مەنى قولداعان، ماعان داۋىس بەرگەن ءار جانعا راحمەت ايتقىم كەلەدى. مەن بارلىقتارىڭىزدى جاقسى كورەمىن»،- دەدى ەرجان ماكسيم.

بيىل Junior Eurovision بايقاۋىنا 19 مەملەكەت قاتىستى. كاسىبي تورەشىلەردىڭ داۋىس بەرۋ ناتيجەسى بويىنشا گرۋزيا، بەلارۋس، ۋەلس، پولشا، ۋكراينا، نيدەرلاند، سەربيا ماكسيمالدى بالل ساندارىن (12) قازاقستانعا بەردى. رەسەي، يسپانيا جانە البانيا 8 باللدان، مالتا، اۆستراليا جانە يتاليا 7 باللدان، پورتۋگاليا - 6, سولتۇستىك ماكەدونيا - 5 ، ارمەنيا - 4, يرلانديا مەن فرانتسيا - 2 باللدان بەردى. كورەرمەندەردىڭ داۋىس بەرۋى ەرجان ماكسيمگە 79 بالل بەردى. 

ءوز كەزەگىندە، قازاقستاننىڭ كاسىبي تورەشىلەرى 12 باللىن پولشاعا، يرلاندياعا – 10, اۆسترالياعا – 8 بەردى. 

Abai.kz