400-گە جۋىق شەتەلدىك ەڭبەك ميگرانتى قازاقستاننان شىعارىلعان. بۇل تۋرالى ۇكىمەتتەگى ءباسپاسوز كونفەرەنتسياسىندا ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ مالىمدەدى.

ءمينيستردىڭ ايتۋىنشا، قازاقستاندىق جانە شەتەلدىك جۇمىسكەرلەر اراسىنداعى جالاقى جانە جۇمىس جاعدايىنىڭ تەڭسىزدىگى ەلىمىزدىڭ باتىس وڭىرلەرىندە كوپ كەزدەسەدى. الايدا، وسى جىلدىڭ تامىز ايىندا ەڭبەك ينسپەكتسياسى باس پروكۋراتۋرامەن بىرگە 30-دان استام شەتەلدىك مامان تارتىلعان 95 كاسىپورىندا تەكسەرۋ جۇرگىزگەن.

ءبىرجان نۇرىمبەتوۆ، ەڭبەك جانە حالىقتى الەۋمەتتىك قورعاۋ ءمينيسترى:

- بۇل كاسىپورىنداردا ەڭبەك جانە كوشى-قون زاڭناماسىن بۇزعان 930 فاكتى انىقتالدى. سونىمەن قاتار، 25 كاسىپورىندا 474 ەڭبەكاقى جانە ەڭبەك جاعدايىنىڭ تەڭسىزدىگى انىقتالىپ، كاسىپورىن باسشىلارىنا ءتيىستى شارالار قولدانىلدى. ياعني، كاسىپورىندارعا شامامەن 92 ميلليونعا جۋىق ايىپپۇل سالىندى. قازاقستاندا جۇمىس ىستەۋگە بەرىلگەن 681 رۇقسات كەرى قايتارىلىپ، 393 شەتەلدىك جۇمىسشى ەلدەن شىعارىلدى. تەكسەرۋ ناتيجەسىندە جالاقى مەن تۇرمىستاعى تەڭسىزدىك فاكتىلەرىنىڭ بارلىعى ەسكەرىلدى.

سونىمەن قاتار، نۇرىمبەتوۆ شەتەلدىك جۇمىس كۇشىن تارتاتىن كومپانيالار زاڭ بۇزسا، وندا زاڭ تالاپتارىن كۇشەيتۋ كەرەك دەدى.

- ماجىلىستە جۇمىسشىلاردىڭ جاعدايلارىن جاساۋ ءۇشىن، جۇمىس بەرۋشىلەرگە قوسىمشا مىندەتتەر مەن جاۋاپكەرشىلىك جۇكتەۋ تۋرالى زاڭ جوباسى بار. وسى زاڭناماعا سايكەس، مەملەكەتتىك ەڭبەك ينسپەكتورى كاسىپورىندى جىل سايىن جوسپارلى تەكسەرىستەن وتكىزە المايدى. ول بەس جىلدا ءبىر رەت وتكىزىلەدى. الايدا، ءبىز ەڭبەك ينسپەكتسياسىننا كاسىپورىنداردى جىل سايىن تەكسەرۋگە مۇمكىندىك بەرەمىز، - دەدى ءبىرجان نۇرىمبەتوۆ.

ايتا كەتەيىك، 2019 جىلدىڭ ماۋسىم ايىندا اتىراۋ وبلىسىنداعى تەڭىز جۇمىسشىلار كەنتىندە جەرگىلىكتى جانە شەتەل جۇمىسشىلارىنىڭ اراسىندا قاقتىعىس بولدى. بۇل وقيعانى ساراپشىلار جالاقى تەڭسىزدىگىمەن بايلانىستىردى. ال، اتىراۋ وبلىستىق اكىمدىگىنىڭ ءباسپاسوز قىزمەتى وقيعا كەزىندە 30 ادام زارداپ شەككەنىن حابارلاعان بولاتىن.

Abai.kz