بيىل اقپان ايىندا وسىنداي اشىق ليۋكتەردىڭ بىرىندە 12 جاسار بالانىڭ مۇردەسى تابىلدى. قۇدىققا قۇلاعان بالا ءۇش كۇن وتكەن سوڭ تابىلدى. وتكەن جىلى قاراشا ايىندا وسىعان ۇقساس جاعداي بولدى. قۇتقارۋشىلار قىز بالانىڭ دەنەسىن الىپ شىقتى.

وكىنىشكە قاراي مۇنداي جاعدايلار استانادا عانا ەمەس، ايماقتاردا دا بولىپ تۇرادى.
وتكەن جەكسەنبىدە ميسك ادام قۇقىقتارى مەكتەبىنىڭ ۇسىنىسىمەن اكتسياعا قاتىستىق.

استانا ىرگەسىندەگى قاراوتكەل كەنتىنە بارىپ اشىق جاتقان ليۋكتەردى تەكسەرىپ كەلدىك. ءبىر-ەكى اپتا بۇرىن اۋزى اڭقيىپ جاتقان قۇدىقتار قار استىنا جاسىرىنىپ ۇلگەرىپتى. سونىڭ وزىندە بەتى اعاش تاقتايلارمەن جابىلعان، شالا جابىلعان، اشىق ليۋكتەردى كوردىك. اقپاندا قۇدىققا ءتۇسىپ كوز جۇمعان بالاعا قاتىستى سوت ءالى بولىپ جاتىر. كىنالى مىناۋ دەپ كەسىپ ايتۋ قيىن.

استانادا 63 مىڭعا جۋىق ليۋك بار. قالا وسكەن سايىن بۇل سان دا كوبەيۋدە.
سوڭعى ۋاقىتتا قۇدىقتاردىڭ بەتىن تسەمەنت جابىنمەن جابا باستادى. بىراق بۇل دا ۇرلىقتى توقتاتا قويعان جوق. ءتىپتى تسەمەنتتەلگەن قاقپاقتاردىڭ ءوزىن الىپ كەتەدى دەيدى. ءتۇرلى-ءتۇستى مەتالل قابىلداۋ پۋنكتتەرىنە ليۋكتەر ءۇشىن سالىناتىن ايىپپۇل دا پروبلەمانى شەشپەدى. پوليمەر ماتەريالدان جاسالعان قاقپاقتار ءبىزدىڭ كليماتقا كەلمەيدى دەيدى. ليۋكتەردى ۇرلاۋ-ورناتۋ-ۇرلاۋ تىزبەگىن قالاي بۇزۋ كەرەك؟

P.S. اشىق ليۋك كورسەڭىز، 109 نومەرىنە قوڭىراۋ شالىپ حابارلاڭىز. ءسىزدىڭ قوڭىراۋىڭىز ادامدى قۇتقارۋى مۇمكىن.

بەللا ورىنبەتوۆانىڭ facebook پاراقشاسىنان 

Abai.kz