1932-1933 جىلدارداعى «گولودومور» كەزىندە قازا تاپقان ۋكرايندىقتاردىڭ سانىن ۋكراينانىڭ ەكىنشى دۇنيەجۇزىلىك سوعىس كەزىندەگى شىعىندارىمەن سالىستىرۋعا بولادى، دەدى پرەزيدەنت ۆلاديمير زەلەنسكي.

ستاليندىك رەجيم ۇيىمداستىرعان 1932-1933 جىلدارداعى «گولودوموردى»، ونداعى ۋكرايندەردىڭ ءولىمىن حالىق ەشقاشان ۇمىتپايدى جانە كەشىرمەيدى. بۇل تۋرالى ۋكراينا پرەزيدەنتى ۆلاديمير زەلەنسكي 23 قاراشادا كيەۆتە «گولودومور» قۇرباندارىن ەسكە الۋ اكتسياسى كەزىندە ايتتى.

«بۇگىن ءبىز «گولودومور» قۇرباندارىن ەسكە الامىز - توتاليتارلىق ستاليندىك رەجيم حالقىمىزعا، ۋكراينا حالقىنا قارسى جاساعان گەنوتسيد. بۇل تراگەديانىڭ سەبەپتەرى مەن اپاتتارى تۋرالى ايتا بەرۋگە بولادى. بىراق فاكتىلەر مەن دالەلدەردىڭ كوپتىگى اقىلعا دا، جۇرەككە دە جاۋاپ بەرمەيدى: نە ءۇشىن؟ قالاي بۇكىل حالىقتى قۇرتۋى مۇمكىن؟»، دەدى زەلەنسكي.

زەلەنسكي ءار ءتۇرلى دەرەكتەرگە سايكەس 1932-1933 جىلدارداعى «گولودومور» كەزىندە ءتورت ميلليوننان سەگىز ميلليونعا دەيىن ۋكرايندىقتار قايتىس بولعانىن ايتتى. مۇنداي شىعىنداردى ەكىنشى دۇنيەجۇزىلىك سوعىستا قازا بولعاندارمەن سالىستىرۋعا بولادى دەدى.

«ءبىز ۋكرايندىقپىز جانە ءبىز ءبارىن جاساي الامىز. بىراق ءبىزدىڭ قولىمىزدان كەلمەيتىن ەكى نارسە بار. ول - ءبىز «گولودوموردى» ۇمىتا المايمىز جانە ونى كەشىرە المايمىز»، دەدى ۋكراينا پرەزيدەنتى.

ۋكراينادا 1932-1933 جىلداردا كسرو ۇكىمەتى جاپپاي جاساندى اشارشىلىق ۇيىمداستىرىپ، ۋكراين كەڭەس سوتسياليستىك رەسپۋبليكاسىنىڭ تەرريتورياسىنداعى سەلولىق جەرلەردە ميلليونداعان ادامداردىڭ ءومىرىن قيعان ۋكراين حالقىنىڭ گەنوتسيدتىك ارەكەتى رەتىندە قاراستىرىلادى.

ۋكراينادا «گولودومور» قۇرباندارىن ەسكە الۋ كۇنى قاراشانىڭ ءتورتىنشى سەنبىسىندە اتاپ وتىلەدى.

2016 جىلى ۋكراينانىڭ جوعارى راداسى دەموكراتيالىق ەلدەرگە ۇندەۋ تاستادى. 1932-1933 جىلدارداعى «گولودوموردى» ۋكراين حالقىنىڭ گەنوتسيدى دەپ تانۋدى سۇرادى. ۋكراينانىڭ ءسىم سايتىندا حابارلانعانداي، بۇگىنگى كۇنگە دەيىن الەمنىڭ 24 مەملەكەتى «گولودوموردى» ۋكراين حالقىنىڭ گەنوتسيدى دەپ تانىدى.

ماتەريالدى ازىرلەگەن كەرىمسال جۇباتقانوۆ

Abai.kz