تارازدا جان شوشىتار جامان جايتتىڭ ورىن العانى اقپاراتتا تارادى. 12 جاسار ورىمدەي عانا قىز بالا مەكتەپتىڭ اۋلاداعى دارەتحاناسىندا زورلاندى. 7 سىنىپتىڭ وقۋشىسى ەكەن. بۇل وتكەن جۇمادا، تارازداعى №6 مەكتەپتە بولعان جاعداي. ول مەكتەپتە قىرۋار وقۋشى مەن پەداگوگتىق قۇرام بار. ول مەكتەپتە پوليتسيا يسپەكتسياسى بار. ول مەكتەپتە جيىرما شاقتى بەينە باقىلاۋ كامەراسى تاعى بار.

ايتۋعا اۋىز بارمايتىن ازعىندىقتان سوڭ اعايىن-جۇرت شۋلادى، ەل دۇرلىكتى. قۇزىرلى ورگاندار قىلمىستىق ءىس قوزعاپ، كۇدىكتى رەتىندە 38 جاستاعى ەر ادام ۇستالدى. ۇستالعان ادام بۇرىن ۇرلىق جاساپ سوتتالعان ەكەن. ماسەلە اقوردانىڭ قۇلاعىنا جەتتى. پرەزيدەنت قاسىم-جومارت توقاەۆ كەشە ءوزىنىڭ «تۆيتتەر» جەلىسىندەگى پاراقشاسىندا بىلاي دەپ جازدى:

«جامبىل وبلىسىنىڭ اكىمىنە تارازداعى 12 جاستاعى مەكتەپ وقۋشىسى زارداپ شەككەن وقىس وقيعاعا بايلانىستى جانە جۇمىسىندا جۇيەلى كەمشىلىكتەر جىبەرگەنى ءۇشىن تاراز قالاسىنىڭ اكىمىن قىزمەتىنەن بوساتۋدى تاپسىردىم. وبلىس اكىمىنە ەسكەرتۋ جاسادىم».

پرەزيدەنت پارمەن بەردى. وبلىس اكىمى اسقار مىرزاحمەتوۆكە ەسكەرتۋ جاسادى. تاراز قالاسىنىڭ اكىمىن قىزمەتىنەن بوساتۋ تۋرالى ايتتى. تارازداعى جاعدايدان سوڭ، ءبىراز ادام قىزمەتتەرىنەن كەتتى. ولار:

1.تاراز قالاسىنىڭ اكىمى قايرات اسكەربەكۇلى دوساەۆ. قىزمەتىنەن كەشە بوساتىلدى. قالا اكىمىنىڭ مىندەتىن ۋاقىتشا ەندىگى ەكس-اكىمنىڭ ورىنباسارى بەيسەنبەك جانبوسىنوۆ اتقاراتىن بولدى.

2. جامبىل وبلىسى ءبىلىم باسقارماسىنىڭ باسشىسى راحيا تۇرماعانبەتوۆا ءوز ەركىمەن قىزمەتىنەن كەتتى.

3. تارازداعى №6 مەكتەپتىڭ ديرەكتورى مەن ديرەكتوردىڭ تاربيە ءىسى جونىندەگى ورىنباسارى جانە 3 مامان قىزمەتىنەن الىندى.

4. ۋچاسكەلىك ينسپەكتور ىشكى ىستەر ورگاندارىنان شىعارىلدى.

5. تاراز قالالىق جەرگىلىكتى پوليتسيا باسقارماسىنىڭ باستىعى مەن 3 ءبولىم باسشىسى قاتاڭ سوگىس الدى.

وكىنىشكە وراي، تارازداعى تراگەديادا بالا زورلانۋىنىڭ، جالپى ادام زورلانۋىنىڭ العاشقىسى ەمەس. 2019 جىلدىڭ 6 ايىنىڭ ستاتيستيكاسى بويىنشا 647 زورلاۋ فاكتىسى تىركەلگەن ەكەن. بۇل قر باس پروكۋراتۋراسى، قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتىنىڭ مالىمەتى.

جوعارىداعى جاندى اۋىرتىپ، ءتانتى تىتىركەندىرەتىن تارازداعى سۇمدىق قوعام نازارىن بالالاردىڭ زورلىققا ۇشىراۋى مەن مەكتەپ دارەتحانالارىنىڭ جاعدايىنا اۋدارتىپ وتىر.

ءماجىلىس دەپۋتاتى يرينا ۋنجاكوۆا بيىل وسى ماسەلەنى پارلامەنتتە كوتەرىپتى. 2300 مەكتەپتىڭ دارەتحاناسى دالادا ورنالاسقانىن ايتىپ دابىل قاققان ەكەن. ال بۇل سالاعا جاۋاپتى مينيسترلىك دالاداعى دارەتحانالاردىڭ شارۋاسىن 2025 جىلى تولىق شەشەتىندىكتەرىن ايتىپتى.

Abai.kz