پاۆلودارداعى تورايعىروۆ ۋنيۆەرسيتەتىندە «قالماققىرعان تاۋلارىنداعى ارحەولوگيالىق-ەتنوگرافيالىق زەرتتەۋلەر» اتتى حالىقارالىق عىلىمي-تاجىريبەلىك كونفەرەنتسيا ءوتتى. كونفەرەنتسيانىڭ پلەنارلىق وتىرىسىنا پاۆلودار وبلىسىنىڭ اكىمى بولات باقاۋوۆ، بەلگىلى عالىمدار، زيالى قاۋىم وكىلدەرى، ستۋدەنتتەر مەن وقۋشىلار قاتىستى.

​ پلەنارلىق وتىرىستىڭ اشىلۋىندا ءسوز العان ايماق باسشىسى بولات باقاۋوۆ كونفەرەنتسيانىڭ وسكەلەڭ ۇرپاققا تاريحي سانانى سىڭىرۋدەگى  ماڭىزدىلىعىنا توقتالىپ ءوتتى.

– حالقىمىزدىڭ ەجەلدەن كەلە جاتقان تاريحى وسكەلەڭ ۇرپاققا زور تاعىلىم مەن ونەگە بەرەدى، وتكەننەن ساباق الۋ ارقىلى جارقىن بولاشاققا جول اشامىز. كەلەشەك ۇرپاقتىڭ تاربيەسىندە وتانعا، تاريحقا دەگەن قۇرمەت ماڭىزدى ورىن الادى، – دەدى بولات باقاۋوۆ.

كونفەرەنتسياعا وراي ۇيىمداستىرىلعان كورمەدە ۋنيۆەرسيتەت عالىمدارى قۇراستىرعان «سەرەكتاس شايقاسى» كىتابىنىڭ تانىستىرىلىمى ءوتتى. جيناقتا تاريحشى، ەتنوگراف عالىمداردىڭ «قالماققىرعان» تاريحي شايقاسى تۋرالى ماقالالارى توپتاستىرىلعان.

جيناق اۆتورلارىنىڭ ءبىرى - ە.بەكماحانوۆ اتىنداعى تاريح جانە ەتنوگرافيا ورتالىعىنىڭ ديرەكتورى، فيلوسوفيا عىلىمدارىنىڭ كانديداتى، پروفەسسور امانتاي قۇداباەۆ الداعى ۋاقىتتا كىتاپتىڭ ەكىنشى تومى شىعاتىنىن جەتكىزدى.

– جينالعان ماتەريالدىڭ 30 پايىزى عانا وسى جيناققا ەندى. كىتاپ ءتورت بولىمنەن تۇرادى. ءبىرىنشى ءبولىم «قازىنالى قازبالار» دەپ اتالادى. مۇندا ارحەولوگيالىق زەرتتەۋلەر توپتاستىرىلعان. كەلەسى «تاريحتان تابارىك»، «ءباھادۇر بابالار»، «اڭىز بەن اقيقات» بولىمدەرىندە قازاق-قالماق شايقاستارىنا بايلانىستى زەرتتەۋلەر، كونەكوز قاريالاردىڭ ەستەلىكتەرى، ولكەتانۋشىلار مەن جۋرناليست قاۋىمنىڭ ماقالالارى كەلتىرىلگەن. وسى كىتاپ ارقىلى ءبىز «قالماققىرعان» تاريحي وقيعاسىنىڭ قاشان، قاي جەردە بولعاندىعىن دالەلدەپ، وعان قاتىسقان باتىرلاردىڭ ەسىمدەرىن جاڭعىرتتىق، – دەيدى امانتاي قۇداباەۆ.

​ كونفەرەنتسيادا ءال-فارابي اتىنداعى قازاق ۇلتتىق ۋنيۆەرسيتەتىنىڭ پروفەسسورى يرينا ەروفەەۆا، رەسەي عىلىم اكادەمياسىنىڭ عىلىمي قىزمەتكەرى ۆلاديمير تەپكەەۆ، تاريحشى-ولكەتانۋشى داۋرەن اياشينوۆ، ءا.مارعۇلان اتىنداعى ارحەولوگيالىق عىلىمي-زەرتتەۋ ورتالىعىنىڭ ديرەكتورى، دوتسەنت ۆيكتور مەرتس، ە.بەكماحانوۆ اتىنداعى تاريح جانە ەتنوگرافيا ورتالىعىنىڭ ديرەكتورى امانتاي قۇداباەۆ ءسوز سويلەپ، قازاق-قالماق شايقاستارىنىڭ تاريح پەن عىلىمدا الاتىن ورنى تۋرالى بايانداما جاسادى.

Abai.kz