مەملەكەتتىك قىزمەت ىستەرى اگەنتتىگىنىڭ توراعاسى انار جايىلعانوۆا قاسىم-جومارت توقاەۆقا پرەزيدەنتتىك جاستار كادرلىق رەزەرۆىن جاساقتاۋعا بايلانىستى كونكۋرستىڭ وتكىزىلۋى جونىندە باياندادى.

مەملەكەت باسشىسى ءادىل ءارى اشىق بايقاۋ وتكىزىپ، ەڭ ۇزدىك كانديداتتاردى ىرىكتەۋدىڭ، سونداي-اق، تاياۋ جىلدارى ولاردى جۇمىسقا ورنالاستىرۋ ماسەلەسىن شەشۋدىڭ ماڭىزدىلىعىن ايتتى.

قاراعاندى وبلىسىنىڭ اكىمى جەڭىس قاسىمبەك قاسىم-جومارت توقاەۆقا بيىلعى 9 ايدىڭ قورىتىندىسى بويىنشا ءوڭىردىڭ الەۋمەتتىك-ەكونوميكالىق دامۋى، جۇزەگە اسىرىلىپ جاتقان ينۆەستيتسيالىق جوبالار، الەۋمەتتىك ينفراقۇرىلىمنىڭ احۋالى، دەنساۋلىق ساقتاۋ جانە ءبىلىم بەرۋ سالالارىنداعى نىسانداردىڭ قۇرىلىسى، سونداي-اق، تۇرعىن ءۇي جانە  اۆتوجول سالۋ جۇمىستارىنىڭ بارىسى تۋرالى مالىمەت بەردى.

مەملەكەت باسشىسى الەۋمەتتىك ماڭىزى بار ازىق-تۇلىكتەردىڭ باعاسىن، جىلۋ بەرۋ ماۋسىمىنىڭ وتكىزىلۋىن، سونىمەن قاتار، اتاۋلى الەۋمەتتىك كومەكتىڭ بەرىلۋىن باقىلاۋدا ۇستاۋعا بايلانىستى بىرقاتار تاپسىرما بەردى.

شىمكەنت قالاسىنىڭ اكىمى ەرلان ايتاحانوۆ قاسىم-جومارت توقاەۆقا تۇرعىنداردىڭ ءال-اۋقاتىن ارتتىرۋ جانە قالاعا قوسىلعان اۋماقتاردىڭ ينفراقۇرىلىمىن دامىتۋ جايىندا باياندادى. سونداي-اق كەزدەسۋ بارىسىندا پرەزيدەنتكە شىمكەنت قالاسىن دامىتۋدىڭ ۇشجىلدىق جوسپارى ۇسىنىلدى.

مەملەكەت باسشىسى شىمكەنت قالاسىنىڭ اكىمىنە قالا توڭىرەگىن ەلەكتر قۋاتى، گاز، اۋىزسۋ جانە جول سەكىلدى قاجەتتى ينفراقۇرىلىمدارمەن قامتاماسىز ەتۋ جۇمىستارىن بەلسەندى  جۇرگىزۋ اسا ماڭىزدى ەكەنىن ايتتى.

Abai.kz