بۇل تۋرالى پرەمەر-مينيستر اسقار ءمامين قول قويعان ۇكىمەت قاۋلىسى قازاقستاننىڭ نورماتيۆتىك قۇقىقتىق اكتىلەرىنىڭ اقپاراتتىق-قۇقىقتىق جۇيەسى سايتىندا جاريالاندى.

قاۋلىعا سايكەس، ءباا شەيحى حاليف بين زاەد ءال-ناحايانعا سۇڭقارمەن تۇركىستان وبلىسىنداعى ارىس جانە قاراتاۋ قورىعىنىڭ اۋماعىندا 43 دۋاداق جانە جامبىل، قىزىلوردا مەن تۇركىستان وبلىستارىنداعى وڭتۇستىك قازاقستان قورىعىندا 90 دۋاداق اۋلاۋعا رۇقسات بەرىلگەن.

ءباا-ءنىڭ تاعى ەكى شەيحى – سۋرۋرۋ جانە سەيف بين مۇحاممەد ءال-ناحاياننىڭ ارقايسى ماڭعىستاۋ وبلىسىنداعى كەندىرلى – قاياسان قورىعىنان 43 دۋاداق اۋلاۋعا رۇقسات العان.

قاتار شەيحى جاسەم بين حاماد بين حاليفا ءال-تانيگە جامبىل وبلىسىنداعى اڭداساي قورىعى اۋماعىندا 27 دۋاداق جانە الماتى مەن جامبىل وبلىستارىنداعى جۋساندالا قورىعىندا 30 دۋاداق اۋلاۋعا رۇقسات بەرىلگەن.

ۇكىمەت الماتى، جامبىل، قىزىلوردا، ماڭعىستاۋ جانە تۇركىستان وبلىستارى اكىمدەرىنە شەتەلدىكتەرگە "قاجەتتى جاردەم كورسەتۋ", ال كەدەن قىزمەتىنە قازاقستانعا شەيحتەر ساياتشىلىق ماقساتىمەن اكەلەتىن جانە اكەتەتىن يتەلگىلەردى ءتيىستى ءتارتىپ بويىنشا راسىمدەۋدى تاپسىرعان.

شەيحتەر قازاقستان اۋماعىندا اۋلاعان ءار قۇسقا ەل بيۋدجەتىنە 260 ايلىق ەسەپتىك كورسەتكىش (656 600 تەڭگە نەمەسە 1700 دوللار) كولەمىندە اقشا تولەۋى ءتيىس.

قازاقستاندا دۋاداق جويىلۋعا شاق تۇرعان سيرەك قۇس رەتىندە قىزىل كىتاپقا ەنگىزىلگەنىمەن ۇكىمەت تالاي جىلدان بەرى شەتەلدىك شەيحتەرگە ونى اۋلاۋعا رۇقسات بەرىپ كەلەدى.

Abai.kz