قازاننىڭ 7-ءى كۇنى نۇر-سۇلتاندا وتكەن ۇكىمەت وتىرىسىندا ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ ازىرلەنگەن زاڭ جوباسىندا 2020 جىلدىڭ قاڭتارىنان باستاپ بالالارى 18 جاسقا تولماعان كوپ بالالى وتباسىلارعا تابىسىنا قاراماستان 42 مىڭنان 72 مىڭ تەڭگەگە دەيىن (109-187$) جاردەماقى بەرۋ قاراستىرىلعانىن حابارلادى. ونىڭ سوزىنشە، جاردەماقى ءار بالاعا شامامەن 10-11 مىڭ تەڭگەدەن ەسەپتەلەدى.

الەۋمەتتىك كومەكتىڭ جاڭا مەحانيزمى بويىنشا جاردەماقىنىڭ ناقتى كولەمى وڭىرلەردىڭ ەرەكشەلىكتەرىنە قاراي وزگەرەدى دەپ حابارلادى ەڭبەك جانە حالىقتى الەۋمەتتىك قورعاۋ مينيسترلىگى. ەگەر كوپ بالالى وتباسىلار تابىسى از جانۇيالار قاتارىنا ەنسە، ولارعا جاردەماقىدان وزگە اتاۋلى الەۋمەتتىك كومەك (ااك) تە بەرىلەدى. اتاۋلى الەۋمەتتىك كومەك كۇنكورىس مينيمۋمىنىڭ 70 پايىزى دەڭگەيىندە ساقتالادى. الايدا مۇنداي وتباسىلارداعى جۇمىسقا جارامدى ادامداردىڭ بارلىعى الەۋمەتتىك كەلىسىمشارت ارقىلى ەڭبەكپەن قامتۋ ورتالىقتارىمەن بەلسەندى جۇمىس ىستەۋى ءتيىس. الەۋمەتتىك كەلىسىمشارتتى ورىنداماعان وتباسىلارعا ااك بەرىلمەيدى دەيدى مينيسترلىك.

ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە بيىل توعىز ايدا ەلدە 412 مىڭ وتباسىعا نەمەسە 2 ميلليون 138 مىڭ ادامعا اتاۋلى الەۋمەتتىك كومەك بەرىلگەن.

Abai.kz