جۇما, 18 قازان 2019
46 - ءسوز 1091 13 پىكىر 7 قازان, 2019 ساعات 13:19

"دۇنيە جاڭارىپ جاتقاندا دىنگە دە ءبىر سىلكىنىس، سەرپىلىس كەرەك"

پاپا فرانتسيسك: "مەن دە، مەنىڭ ءسوزىم دە دوگما ەمەس..."

"دۇنيە جاڭارىپ جاتقاندا دىنگە دە ءبىر سىلكىنىس، سەرپىلىس كەرەك. مەن دە، مەنىڭ ءسوزىم دە دوگما ەمەس بۇدان بىلاي..." دەيدى پاپا فرانتسيسك.

ريم پونتيفيگى بوپ سايلانا سالا پاپا فرانتسيسك وزىنەن بۇرىنعىلار بۇلجىتپاي ورىنداعان بىرنەشە پروتوكولدى بۇزادى.

ادەتتە جاڭادان سايلانعان پاپالار ءسان سالتاناتى كەلىسكەن، جاعاسى سۋساردىڭ تەرىسىنەن تىگىلگەن، القىزىل مانتيا كيىپ شىعادى ەكەن ەلدىڭ الدىنا.

سول مانتيادان باس تارتادى پاپا فرانتسيسك.

"ۇلدە مەن بۇلدەگە ورانعاننان وپا تابام با وسى؟ ويتكەننەن ەلدىڭ الدىندا سۇيكىمىم ارتا قويماس. كارناۆالعا باراتىنداي كيىنگەنىم ۇيات. مۇندايدىڭ زامانى الدەقاشان وتكەن..." دەيدى ول.

دەيدى دە اق ماتادان تىگىلگەن ادەپكى كيىممەن شىعادى ەل الدىنا.

كاردينالدارىنا (وزىنەن كەيىنگىلەرگە) ۇندەۋ جاساۋ ءۇشىن الگىلەردىڭ توبەسىنەن ءتونىپ تۇراتىن تاققا دا وتىرمايدى.

"تومەندە تۇرىپ سويلەسەم ءوتىم جارىلىپ كەتپەس..." دەيدى پاپا فرانتسيسك.

ءسويتىپ تاعى ءبىر تاپتاۋرىن تۇسىنىكتى بۇزادى.

كەيىن اۋليە پەتر سوبورىنىڭ الدىندا پاپانىڭ ءتۇر-تۇلعاسىن كورۋگە جينالعان توپتى تاڭ-تاماشا قىلادى.

"حالقىم، سەندەرگە باتا بەرمەيمىن بۇل جولى. وزدەرىڭ دۇعا جاساڭدار. تىلەگەن تىلەكتەرىڭ بولسا جاراتقان يەم الدارىڭدا تۇرعان مەن ارقىلى قابىل قىلسىن..." دەيدى ول.

ەل اراسىندا "پاپانىڭ كولىگى" اتانىپ كەتكەن ۇزىندىعى ەسىك پەن توردەي ءليمۋزيندى دە (Merسedes Benz) كەرەك ەتپەيدى. ءريمنىڭ ىشىندە ەسكى فورد فوكۋسپەن جۇرەدى ول.

پاپالارعا ارنالعان ءزاۋلىم پەنتحاۋسقا قونىستانۋدان باس تارتىپ، ۆاتيكان سارايىنىڭ تۇبىندەگى قوناق كۇتەتىن ۇيگە ورنالاسادى. پاپا فرانتسيسك الىگە دەيىن سوندا تۇرادى.

بورسىپ، ىشتەن ءشىرىپ، كۇناعا بەلشەدەن باتقان شىركەۋدى ءدال وسى فرانتسيسك قۇتقارىپ قالادى.

ۆاتيكان بانكىندەگى كوررۋپتسيامەن كۇرەسەدى الدىمەن. بانكتىڭ باسىنداعى جىلدار بويى تاپجىلماي وتىرعان جەمقورلاردى تاعىنان تايدىرىپ، ورنىنا رەفورماتورلاردى قويادى.

ءدىني دوكترينالار مەن دوگمالاردى وزگەرتۋگە قاتىستى جابىق ەسىك جاعدايىندا وتەتىن جىل سايىنعى سينودتىڭ ءتارتىبىن بۇزادى پاپا فرانتسيسك.

"نەنى وزگەرتىپ، نەنى وزگەرتپەۋ كەرەكتىگىن نەگە ءبىز شەشۋىمىز كەرەك؟ ەلدىڭ پىكىرىن دە ەسكەرەيىك. ەلدىڭ دە الىپ-قوسارى بار شىعار بۇعان..." دەيدى پاپا.

ءبىر جولى برازيليادان ريمگە قايتىپ كەلە جاتقان فرانتسيسكە جۋرناليستەر ساۋال قويادى: "كوگىلدىرلەرگە كوزقاراسىڭىز قالاي؟" دەپ...

"ولاردى ايىپتايتىنداي مەن سونشاما كىممىن؟.." دەيدى ول.

دەيدى دە وسى كۇنگە دەيىن كوگىلدىرلەرگە كۇن كورسەتپەي كەلگەن شىركەۋدىڭ كانوندارىن كۇيرەتىپ تىنادى.

كەيىن بۇل ءسوزىن بىلاي دەپ تۇسىندىرەدى ول:

"دۇنيە جاڭارىپ جاتقاندا دىنگە دە ءبىر سىلكىنىس، سەرپىلىس كەرەك. ادامدى اۋليەلەر مەن كۇناھارلارعا بولەتىن ءدىننىڭ ءداۋىرى ءوتتى. كىمنىڭ جۇماققا، كىمنىڭ توزاققا اتتانارىن شىركەۋ شەشپەيدى.
قۇدايسىزداردى قارعاپ-سىلەۋگە دە قاقىمىز جوق. مەن دە، مەنىڭ ءسوزىم دە دوگما ەمەس بۇدان بىلاي...
شىركەۋ ەندىگى جەردە مۇنداي داۋدان اۋلاق ءجۇرۋى كەرەك. ءدىننىڭ ماقساتى جاقسىلىق جاساۋ، جارلى-جاقىبايعا كومەكتەسۋ. ءدىننىڭ دوكتريناسى - مەيىرىم..." دەيدى پاپا فرانتسيسك.

دەموكراتيالى باتىستا ءمىنسىز ادام جوق.
پاپانىڭ بويىندا دا ءمىن كوپ. جەر-جەردەگى كاتوليكتەردىڭ بالا زورلاعانى جاريا بولعالى فرانتسيسكتىڭ تىرنەكتەپ جيناعان ابىرويى، شەلەكتەپ توگىلۋدە..

دۋمان بىقايدىڭ facebook پاراقشاسىنان

Abai.kz

13 پىكىر