سارسەنبى, 20 قاراشا 2019
جاڭالىقتار 1220 1 پىكىر 27 قىركۇيەك, 2019 ساعات 15:16

«تەرميندەردى ىرىكتەۋدىڭ كريتەريلەرى مەن پرينتسيپتەرى» اتتى سەمينار ءوتتى

بۇگىن الماتى قالاسىندا قازاقستان رەسپۋبليكاسى مادەنيەت جانە سپورت مينيسترلىگى ءتىل ساياساتى كوميتەتىنىڭ تاپسىرماسىمەن ش.شاياحمەتوۆ اتىنداعى «ءتىل-قازىنا» ۇلتتىق عىلىمي-پراكتيكالىق ورتالىعى «تەرميندەردى ىرىكتەۋدىڭ كريتەريلەرى مەن پرينتسيپتەرى» رەسپۋبليكالىق ادىستەمەلىك سەمينار وتكىزدى.

رەسپۋبليكالىق ادىستەمەلىك سەميناردىڭ وزەكتىلىگى – قازاقستان رەسپۋبليكاسىندا تىلدەردى قولدانۋ مەن دامىتۋدىڭ  2011-2019 جىلدارعا ارنالعان مەملەكەتتىك باعدارلاماسىن ىسكە اسىرۋ ماقساتىندا قازاق ءتىلىن عىلىم ءتىلى رەتىندە دامىتۋ ءۇشىن تەرميندەردى بىرىزدەندىرۋ جانە ىرىكتەۋ كريتەريلەرىن بەلگىلەۋ، پرينتسيپتەرىن ايقىنداۋ.

سەمينار قر مادەنيەت جانە سپورت ۆيتسە-ءمينيسترى ن.داۋەشوۆتىڭ كىرىسپە سوزىمەن اشىلدى.

تەرميندەردى ىرىكتەۋ مەن رەسمي بەكىتۋگە قويىلاتىن نەگىزگى تالاپتاردى ايقىنداۋ سەمينارداعى باياندامالاردىڭ باستى تاقىرىبى بولدى. قر ۇعا كوررەسپوندەنت مۇشەسى، فيلولوگيا عىلىمدارىنىڭ دوكتورى ش.قۇرمانبايۇلى ءوز بايانداماسىندا تەرميندەردى ىرىكتەۋدىڭ كريتەريلەرىن جانە پرينتسيپتەرىن  بەلگىلەۋ ماسەلەسىن كوتەرىپ، ناقتى ۇسىنىستارىن جەتكىزدى.

كەلەسى بايانداماشى ا.بايتۇرسىنۇلى اتىنداعى ءتىل ءبىلىمى ينستيتۋتىنىڭ عىلىمي قىزمەتكەرى، فيلولوگيا عىلىمدارىنىڭ دوكتورى ق.كۇدەرينوۆا جاڭا الىپبيگە كوشۋ بارىسىنداعى تەرميندەردىڭ جازىلۋ ۇلگىسى ماسەلەسىنە توقتالدى.

قازاق ءتىلى ءالىپبيىن لاتىن گرافيكاسىنا كوشىرۋ جونىندەگى ۇلتتىق كوميسسيا جانىنداعى تەرمينولوگيالىق جۇمىس توبىنىڭ مۇشەسى، فيلولوگيا عىلىمدارىنىڭ دوكتورى ق.ايداربەك تەرمينولوگيانىڭ تىلدىك نورماتيۆتىك شارتتارىن تالقىعا سالدى.

ەلىمىزدەگى تانىمال عالىمدار اتسالىسىپ جاتقان «قازاق تىلىندەگى 100 جاڭا وقۋلىق» جوباسىن ىسكە اسىرۋ بارىسىندا كەزدەسكەن قيىنشىلىقتار  مەن ولاردى شەشۋ جولدارى جايىندا ءسوز العان ۇلتتىق اۋدارما بيۋروسىنىڭ رەداكتورى، فيلوسوفيا عىلىمدارىنىڭ كانديداتى ءا.قۇرانبەك ءوز تاجىريبەسىمەن ءبولىستى.

ش.شاياحمەتوۆ اتىنداعى «ءتىل-قازىنا» ۇلتتىق عىلىمي-پراكتيكالىق ورتالىعى قولدانبالى لينگۆيستيكا باسقارماسىنىڭ باسشىسى، فيلولوگيا عىلىمدارىنىڭ كانديداتى س.يتەعۇلوۆا تەرمينتانۋ عىلىمىنىڭ بۇگىنگى احۋالى مەن تەرمينجاسامنىڭ باستى قاعيدالارى بويىنشا كوپشىلىككە اقپارات بەرۋگە ارنالعان ەلەكتروندىق الاڭدى تانىستىردى.

سونداي-اق اتالعان ادىستەمەلىك سەميناردا بىرقاتار عالىمدار مەن سالا ماماندارى ءسوز الىپ، ءوز پىكىرلەرىن ءبىلدىردى.

ىسشاراعا پرەزيدەنت اكىمشىلىگىنىڭ جاۋاپتى قىزمەتكەرلەرى، جەتەكشى عالىمدار، قازاقستان رەسپۋبليكاسى ۇكىمەتىنىڭ جانىنداعى رەسپۋبليكالىق تەرمينولوگيا كوميسسياسىنىڭ مۇشەلەرى، قازاق ءتىلى ءالىپبيىن لاتىن گرافيكاسىنا كوشىرۋ جونىندەگى ۇلتتىق كوميسسيا جانىنداعى تەرمينولوگيالىق جۇمىس توبىنىڭ مۇشەلەرى، ورتالىق جانە جەرگىلىكتى اتقارۋشى ورگانداردىڭ جاۋاپتى قىزمەتكەرلەرى، ءتىل سالاسى بويىنشا وڭىرلىك باسقارما باسشىلارى مەن قىزمەتكەرلەرى جانە باق وكىلدەرى قاتىستى.

رەسپۋبليكالىق ادىستەمەلىك سەميناردىڭ قورىتىندىسى بويىنشا تەرميندەردى ىرىكتەۋ كريتەريلەرىن بەلگىلەۋگە، پرينتسيپتەرىن ايقىنداۋعا باعىتتالعان قارار قابىلداندى.

Abai.kz

1 پىكىر