سەيسەنبى, 22 قازان 2019
838 1 پىكىر 17 قىركۇيەك, 2019 ساعات 17:20

وزبەكستان تۇركى كەڭەسىنە كىردى

پرەزيدەنت شاۆكات ميرزياەۆ «وزبەكستاننىڭ تۇركىتىلدەس مەملەكەتتەردىڭ ىنتىماقتاستىق كەڭەسى جونىندەگى ناحچىۆان كەلىسىمىن راتيفيكاتسيالاۋ جونىندەگى» زاڭعا قول قويدى.

تۇركى كەڭەسى 2009 جىلدىڭ قازان ايىندا ازەربايجاننىڭ ناحيچەۆان وبلىسىندا قۇرىلدى. سوندا تۇركىتىلدەس ەلدەردىڭ مەملەكەت باسشىلارى ىنتىماقتاستىق كەڭەسىن قۇرۋ جونىندە كەلىسىمگە قول قويعان.

2018 جىلدىڭ ءساۋىر ايىندا تۇركيا پرەزيدەنتى رەجەپ ەردوعاننىڭ تاشكەنتكە ساپارى كەزىندە شاۆكات ميرزياەۆ وزبەكستان تۇركى كەڭەسىنە كىرەدى دەپ مالىمدەگەن.

وزبەكستان باسشىلىعى 2018 جىلعا دەيىن الەمدەگى تۇركىتىلدەس التى مەملەكەتتىڭ باس قوسۋىنا بارعان ەمەس.

بىلتىر قىركۇيەك ايىندا قىرعىزستاندا وتكەن سامميتكە وزبەك پرەزيدەنتى قۇرمەتتى قوناق رەتىندە ءبىرىنشى رەت قاتىستى.

«ءبىز تۇركى كەڭەسى اياسىندا ءوزارا ءتيىمدى بولاتىن ىنتىماقتاستىققا مۇددەلىمىز. ەلدىڭ بولاشاعى ءۇشىن بۇل شاراعا الداعى ۋاقىتتا دا قاتىسۋعا دايىنبىز»، - دەگەن ميرزياەۆ شولپان-اتادا وتكەن سامميت كەزىندە.

تۇركىتىلدەس ەلدەردىڭ ىنتىماقتاستىق كەڭەسىنىڭ ءسامميتى 2010 - 2015 جىلدار اراسىندا جىل سايىن ءوتىپ كەلدى. 2015 جىلعى سامميت قىرعىزستاندا ءوتۋى كەرەك بولعان. بىراق سول كەزدەگى قىرعىز پرەزيدەنتى المازبەك اتامباەۆتىڭ تۇركيا جانە قازاقستان باسشىلارىمەن قارىم-قاتىناسى سۋىعاننان كەيىن ءسامميتى وتكىزۋدەن باس تارتقان.

2017 جىلدىڭ كۇزىندە سايلانعان قىرعىزستاننىڭ جاڭا پرەزيدەنتى سوورونباي جەەنبەكوۆ 2018 جىلعى ءسامميتى ەلىندە وتكىزۋ جونىندە بۇيرىق شىعاردى.

Abai.kz

1 پىكىر