جەكسەنبى, 22 قىركۇيەك 2019
1189 4 پىكىر 11 قىركۇيەك, 2019 ساعات 11:38

شقو سوتى جاكىشەۆتىڭ اپەللياتسيالىق شاعىمىن قاناعاتتاندىرمادى

10 قىركۇيەكتە وسكەمەندەگى شىعىس قازاقستان وبلىستىق سوتى تۇرمەدە وتىرعان "قازاتومونەركاسىپ" كومپانياسىنىڭ بۇرىنعى جەتەكشىسى مۇحتار جاكىشەۆتىڭ اپەللياتسيالىق شاعىمىن قاراپ، ونى قاناعاتتاندىرمادى.

24 شىلدە كۇنى سەمەي قالاسىنىڭ №2 سوتى تۇرمەدە وتىرعانىنا 10 جىلدان اسقان 56 جاستاعى مۇحتار جاكىشەۆتىڭ مەرزىمىنەن بۇرىن شارتتى بوستاندىققا شىعارۋ تۋرالى ءوتىنىشىن قاناعاتتاندىرۋدان باس تارتقان. سەمەي سوتى "جاكىشەۆ مەملەكەتكە كەلتىرگەن 99,6 ميلليارد تەڭگە كولەمىندە شىعىندى وتەمەدى" دەگەن. كەيىن ول اپەللياتسيالىق شاعىم بەرگەن.

10 قىركۇيەكتە وتكەن وسكەمەندەگى سوتتا ادۆوكات نۇرلان بەيسەكەەۆ سۋديادان وتىرىسقا مۇحتار جاكىشەۆتىڭ قاتىسۋىن قامتاماسىز ەتۋدى تالاپ ەتتى. بىراق سۋديا جاكىشەۆتى ۆيدەوكونفەرەنتسيامەن قوسۋعا "تەحنيكالىق مۇمكىندىك جوعىن" ايتتى. وسىدان كەيىن ادۆوكات سوتتى كەيىنگە قالدىرۋدى سۇرادى. بىراق سۋديا "ارىزدى جاكىشەۆسىز قاراي بەرۋگە بولادى" دەپ، ادۆوكات شاعىمىن قابىلدامادى. وسىدان سوڭ بەيسەكەەۆ شىعىس قازاقستان وبلىستىق سوتىنىڭ بارلىق سۋدياسىنا سەنىمسىزدىك تانىتتى. سۋديا ادۆوكاتتىڭ بۇل شاعىمىن دا قاناعاتتاندىرمادى.

10 قىركۇيەكتە وسكەمەندە سوت اپەللياتسيالىق شاعىمدى قاراپ جاتقان ساتتە الماتىدا بەلسەندىلەر بيلىكتەن جاكىشەۆتى بوساتۋدى تالاپ ەتتى. مۇنداي شارالار ەلدە ءبىر ايدان بەرى ءوتىپ كەلەدى.

Freedom House حالىقارالىق قۇقىق قورعاۋ ۇيىمى دا مالىمدەمە جاساپ، قازاقستان بيلىگىنەن جاكىشەۆتى دەرەۋ بوساتۋدى سۇرادى.

مۇحتار جاكىشەۆ "ۆەنادا (اۆستريا) "قازاتومونەركاسىپ" كومپانياسىنىڭ زاڭسىز وكىلدىگىن اشۋ ارقىلى پايدا تاپتى، استىرتىن كاسسا ۇستادى، كۇزەتشىسىنە قوسىمشا ەڭبەكاقى تولەپ كەلگەن" دەگەن ايىپپەن 14 جىلعا سوتتالعان. تۇرمەدە وتىرعان كەزدە ءۇشىنشى توپ مۇگەدەكتىگىن العان جاكىشەۆ وزىنە تاعىلعان ايىپتارمەن كەلىسپەيدى.

قازاقستاندا بىرنەشە ايدان بەرى بيلىكتەن مۇحتار جاكىشەۆتى بوساتۋدى تالاپ ەتكەن پيكەتتەر مەن نارازىلىق شارالارى ءوتىپ كەلەدى. قازاقستانداعى قۇقىق قورعاۋشىلار جاكىشەۆتى "ساياسي تۇتقىندار" تىزىمىنە قوسقان.

Abai.kz

4 پىكىر