سەنبى, 7 جەلتوقسان 2019
1293 1 پىكىر 9 تامىز, 2019 ساعات 10:34

اقوردا قىرعىزستانداعى وقيعالاردى كورشى ەلدىڭ "ىشكى شارۋاسى" سانايدى

قازاقستان پرەزيدەنتى قاسىم-جومارت توقاەۆ قىرعىزستانداعى وقيعانى كورشى ەلدىڭ ىشكى شارۋاسى دەپ سانايدى. بۇل تۋرالى پرەزيدەنتتىڭ ءباسپاسوز حاتشىسى بەرىك قۇرمانعالي Facebook الەۋمەتتىك جەلىسىندە جازدى.

"قازاقستان پرەزيدەنتى قىرعىزستانداعى بولىپ جاتقان جاعدايدى مۇقيات باقىلاپ وتىر. مەملەكەت باسشىسى باۋىرلاس كورشى ەلدەگى احۋال قىرعىز رەسپۋبليكاسىنىڭ ىشكى شارۋاسى دەپ ەسەپتەيدى. قاسىم-جومارت توقاەۆ بۇل جاعداي جۋىق ارادا ەلدىڭ قولدانىستاعى زاڭى اياسىندا شەشىلەتىنىنە ۇمىتتەنەدى" دەپ جازعان اقوردانىڭ ءباسپاسوز حاتشىسى.

7 تامىزدا قىرعىزستاننىڭ كوي-تاش اۋىلىندا ەلدىڭ بۇرىنعى پرەزيدەنتى المازبەك اتامباەۆتى تەرگەۋ ورىندارىنا كۇشپەن جەتكىزۋ ءۇشىن الىپ كەتۋگە بارعان قىرعىز ارنايى جاساعىنا اتامباەۆتىڭ جاقتاستارى قارسىلىق تانىتقان. جانجال سالدارىنان، سوڭعى مالىمەت بويىنشا، وق تيگەن ارنايى جاساقتىڭ ءبىر قىزمەتكەرى قازا تاۋىپ، 40-تان استام ادام جارالانعان.

اتامباەۆ بۇعان دەيىن تەرگەۋ ورىندارى قىلمىستىق ىسكە بايلانىستى جاۋاپ الۋ ءۇشىن ءۇش رەت شاقىرتقاندا بارماي قويعان سوڭ، ارنايى جاساق كوي-تاشتاعى ونىڭ ۇيىنە بارعان. 8 تامىزدا اتامباەۆ ۇستالىپ، قىرعىزستان ۇلتتىق قاۋىپسىزدىك مەملەكەتتىك كوميتەتىنە جەتكىزىلدى.

قىرعىز باس پروكۋراتۋراسى اتامباەۆقا 2011-2017 جىلدارى بيلىكتە بولعان كەزىندە "جەمقورلىققا باردى", "قىزمەت بابىن تەرىس پايدالاندى", "زاڭسىز بايىدى" جانە "كانىگى باۋكەسپە ازيز باتۋكاەۆتى تۇرمەدەن زاڭسىز بوساتۋعا قاتىستى" دەگەن سياقتى جالپى سانى بەس ايىپ تاققان. اتامباەۆ ول ايىپتاردىڭ ءبارىن جوققا شىعارىپ، وزىنە قارسى ءىستىڭ ساياسي استارى بار دەپ مالىمدەگەن.

بيىل مامىردا قىرعىزستان پارلامەنتى بۇرىنعى پرەزيدەنتكە تيىسپەۋشىلىك تۋرالى زاڭعا وزگەرتۋلەر ەنگىزگەن. 27 ماۋسىمدا پارلامەنت اتامباەۆتى ەكس-پرەزيدەنت جانە تيىسپەۋشىلىك مارتەبەسىنەن ايىرعان سوڭ تەرگەۋ ورىندارى اتامباەۆتى جاۋاپ الۋعا شاقىرا باستاعان.

Abai.kz

1 پىكىر