سەيسەنبى, 10 جەلتوقسان 2019
864 0 پىكىر 30 ماۋسىم, 2019 ساعات 18:27

ارىستاعى 140 بالا بۋرابايعا دەمالىسقا جىبەرىلدى

24-ماۋسىم كۇنى تۇركىستان وبلىسىنىڭ ارىس قالاسىندا اسكەري قويما جارىلدى. ارىستىق تۇرعىنداردىڭ قالانى تاستاي قاشۋىنا سەبەپ بولعان جويقىن جارىلىس، بۇكىل رەسپۋبليكا جۇرتشىلىعىن بەي-جاي قالدىرمادى. اسىرەسە، كوپشىلىك ارىستاعى بالالاردىڭ جاعدايىنا الاڭداۋشىلىق ءبىلدىردى.

بۇگىندە ارىس قالاسىنداعى اپاتتان زارداپ شەككەن تۇرعىندارعا، ولاردىڭ ىشىندە بالالارعا العاشقى كۇننەن بەرى 180 ەرىكتى پسيحولوگ-پەداگوگتار مەن پراكتيكتەر جاردەم كورسەتىپ جاتىر. مامانداردىڭ ايتۋىنشا، ونداي جارىلىستان پسيحولوگيالىق سوققى العان بالالاردىڭ قورشاعان ورتامەن، اينالاسىمەن قارىم-قاتىناسى وزگەرۋى مۇمكىن.

بۇگىندە 24 مىڭنان استام ادام قاۋىپسىز ايماققا كوشىرىلگەن ورتالىقتاردا بالالار مەن سابيلەرگە پسيحولوگيالىق كومەك كورسەتكەن گەشتالت-تەراپەۆت پسيحولوگ ماماندار وقيعا بولعان ايماقتا دا ەمدىك جۇمىستارىن جۇرگىزىپ جاتىر.

قازىر ارىس قالاسىنداعى ايەلدەر مەن بالالاردىڭ وقيعادان كەيىنگى پسيحولوگيالىق كوڭىل-كۇيلەرىن انىقتاۋ، اتالعان وقيعا تۋرالى ءتۇسىندىرۋ جۇمىستارى پسيحولوگتاردىڭ نەگىزگى جۇمىسىنا اينالعان.

سونىمەن قاتار ەرىكتى پسيحولوگ ماماندار ەل اراسىندا رادياتسيا، باكتەريولوگيالىق قارۋ-جاراق جانە كوپتەگەن اداماداردىڭ قايتىس بولعانى تۋرالى اقپاراتتاردىڭ جالعان ەكەنىن انىقتاپ، ءتۇسىندىرىپ ءجۇر.

ال، بۇگىن ارىستاعى 140 مەكتەپ بالالارى اقمولا وبلىسىنا قاراستى بۋراباي وقۋشىلار لاگەرىنە دەمالىسقا جىبەرىلگەن. سونىمەن قاتار، ەكى ءجۇز بالا نۇر-سۇلتان قالاسىنا ساياحات جاساماق. ولاردىڭ قاىپسىزدىگى ءۇشىن بىرنەشە تالىمگەرلەر جۇمىلدىرىلعان.

ارىستاعى وقۋشىلاردى لاگەرگە جىبەرۋدەگى ماقسات – اپاتتان كەيىن مەكتەپ وقۋشىلارىنىڭ ساناسىندا جاعىمسىز فاكتورلاردىڭ ساقتالماۋى ءۇشىن بولىپ وتىر. ال، بۇگىن بالالاردىڭ اتا-انالارى شىم-قالادان ءسات-ساپار تىلەپ، شىعارىپ سالدى.

ەسكە سالا كەتەيىك، ارىس قالاسىندا 19 916 بالا ءبىلىم الاتىن 40 مەكتەپ بار. ال، مەكتەپكە دەيىنگى ءبىلىم وشاقتارىندا 5071 بالا تاربيەلەنۋدە. تۇركىستان وبلىستىق اكىمشىلىگىنىڭ مالىمەتىنە سايكەس، بۇگىنگە دەيىن ارىس قالاسىنىڭ 570 بالا جازعى لاگەرگە جىبەرىلگەن.

ال، الداعى ۋاقىتتا ارىس قالاسىنىڭ 725 كە جۋىق بالالارى قازاقستاننىڭ باسقا دا ايماقتارىنا دەمالىس پەن ساياحات جاساۋعا جىبەرىلەدى. جالپى،جازعى دەمالىس ورىندارىنا ءتورت مىڭنان استام بالا جىبەرۋ جوسپارلانسا، الداعى شىلدە ايىندا بەس جۇزگە جۋىق بالا جازعى لاگەرلەردە دەمالاتىن بولادى.

ايتا كەتەيىك، بۇگىندە ارىس قالاسىن قالپىنا كەلتىرۋ ءۇشىن مەملەكەت تاراپىنان ءتيىستى جۇمىستار اتقارىلىپ جاتىر. ۇكىمەت باسشىسى اسقار ءماميننىڭ ايتۋىنشا، ارىس قالاسىنىڭ تۇرعىن ءۇي قۇرىلىمى مەن ينفراقۇرىلىمىن ءبىر ايدىڭ ىشىندە قالىپقا كەلتىرەدى. قازىر ونداعى جەتى مىڭ جەتى جۇزدەن استام باسپانا تولىعىمەن قالپىنا كەلتىرىلگەن.

ال، ارىستىق بالالاردىڭ جازعى دەمالىسىن ەلىمىزدىڭ ءار ايماعى قامتاماسىز ەتىپ وتىر. كۇنى كەشە ارىستاعى اپاتتان زارداپ شەككەن جۇزدەن استام بالا جامبىل وبلىسىنىڭ “بولاشاق”، “تاۋسامالى” ساۋىقتىرۋ كەشەندەرىنە جىبەرىلگەن.

ارىستىق بالالاردى جازعى دەمالىسپەن قامتۋ باسقا وڭىرلەردە دە جالعاسىن تاپپاق...

Abai.kz

0 پىكىر