قازىرگى تاڭدا قىزىلوردا وبلىستا 5118 شاعىن جانە ورتا كاسىپكەرلىك سۋبەكتىسى تىركەلگەن. ولاردىڭ 85 پايىزدان استامى تۇراقتى تۇردە جۇمىس ىستەپ تۇر،- دەپ حابارلايدى اباي-اقپارات.

اتالعان كاسىپكەرلىك سۋبەكتىلەرىندە 93 مىڭنان اسا ادام تۇراقتى جۇمىسپەن قامتىلعان. بۇل تۋرالى وبلىستىق كاسىپكەرلىك جانە تۋريزم باسقارماسىنىڭ باسشىسى فەردوۋسي قوجابەرگەنوۆ حابارلادى.

باسقارما باسشىسىنىڭ سوزىنشە، جاپپاي كاسىپكەرلىكتى دامىتۋ ماقساتىندا وتكەن جىلى ءارتۇرلى قارجى كوزدەرىنەن 32 ملرد تەڭگە تارتىلسا، ونىڭ 3 ملرد تەڭگەسى ستارتاپ جوبالارعا باعىتتالعان كورىنەدى. بيىل وڭىردە بيزنەستى ورىستەتۋ ءۇشىن 34 ملرد تەڭگە بولىنگەن.

– ونىڭ ىشىندە، 5 ملرد تەڭگە مەملەكەتتىك باعدارلامالار اياسىندا قارجىلاي ەمەس قولداۋعا، قايتارىمسىز گرانتتار بەرۋگە جانە شاعىن نەسيەلەرمەن قامتاماسىز ەتۋگە باعىتتالعان، - دەدى فەردوۋسي ابىلقاسىمۇلى.

سونداي-اق، وڭىردە 2013 جىلدان بەرى «بيزنەستىڭ جول كارتاسى – 2020» مەملەكەتتىك باعدارلاماسى شەڭبەرىندە يندۋستريالىق-يننوۆاتسيالىق جوبالاردى جۇزەگە اسىرۋ ءۇشىن شاعىن كاسىپكەرلىك سۋبەكتىلەرىنە 3 ملن تەڭگەگە دەيىن قايتارىمسىز گرانتتار بەرۋ جۇرگىزىلۋدە. ايتا كەتەتىن جايت، كاسىبىن جاڭا باستاعان جاس كاسىپكەرلەر مەن مۇمكىندىگى شەكتەۋلى ازاماتتارعا باسىمدىق بەرىلەتىن بولادى. باعدارلاما تالاپتارىنا سايكەس جوبانى ىسكە اسىرۋ ءۇشىن سۇرالاتىن گرانت قارجىنىڭ 10 پايىزى مولشەرىندە ءوزىنىڭ ۇلەسىن قوسۋى نەمەسە كاسىپكەر قارجىلاي نەمەسە جىلجىمايتىن/جىلجىمالى مۇلىكپەن قاتىسىپ، مىندەتتى تۇردە جۇمىس ورنىن قۇرۋى قاجەت. قايتارىمسىز گرانتتى الۋ ءۇشىن «بيزنەستىڭ جول كارتاسى – 2020» نەمەسە «ەڭبەك» مەملەكەتتىك باعدارلاماسى اياسىندا كاسىپكەرلىك نەگىزدە ءبىلىم الۋى ءتيىس. ەستەرىڭىزگە سالا كەتەيىك، وقۋدان وتكەندىگى جونىندە سەرتيفيكات 2 جىل مەرزىمگە عانا جارامدى.

قازىرگى تاڭدا مەملەكەتتىك گرانتتار بەرۋ كونكۋرسى بويىنشا وبلىستا 381 كاسىپكەر جالپى قۇنى 398 ملن تەڭگە قايتارىمسىز قاراجاتقا يە بولعان. گرانتتار بەرۋ كونكۋرسىنا قاتىسۋعا وتىنىمدەر قابىلداۋ 10 ماۋسىمنان باستالىپ، 21 ماۋسىمعا دەيىن جالعاسادى. ونى وتكىزۋ ءۇشىن رەسپۋبليكالىق بيۋدجەتتەن 31 ملن تەڭگە، «جاستار جىلى» اياسىندا 21 ملن تەڭگە جاس كاسىپكەرلەرگە قارالعان.

مامانداردىڭ سوزىنشە، وڭىردە شاعىن جانە ورتا كاسىپكەرلىكتىڭ دامۋى جاڭا جۇمىس ورىندارىنىڭ اشىلۋىنا جانە سالىقتىق بازانىڭ ۇلعايۋىنا ىقپال ەتپەك.

Abai.kz